Live Updates

دہشت گرد عناصر اسلام کے تشخص کو مجروح کرنے کی مذموم کوشش کر رہے ہیں،راجہ جاویداخلاص

بدھ 30 ستمبر 2026 18:01

گوجرخان(اُردو پوائنٹ اخبارتازہ ترین - این این آئی۔ 30 ستمبر2026ء) مسلم لیگ (ن)کے رہنما و سابق وفاقی پارلیمانی سیکرٹری راجہ جاوید اخلاص نے کہا ہے کہ اسلام کا دہشت گردی سے کوئی تعلق نہیں،دہشت گرد عناصر اسلام کے تشخص کو مجروح کرنے کی مذموم کوشش کر رہے ہیں،پاکستان کی سیاسی و عسکری قیادت اور تمام سیکیورٹی ادارے دہشت گردی کے خلاف ایک پیج پر ہیں اور ملک کے امن و سلامتی کے لیے بے شمار قربانیاں دی جا چکی ہیں۔

ایک بیان میںانہوں نے کہا کہ پاکستان نے ایران اور امریکہ کے درمیان جنگ روکنے کے لیے کلیدی کردار ادا کیا اور خطے میں امن کے لیے اپنا کردار ادا کر رہا ہے۔راجہ جاویداخلاص نے کہا کہ پاکستان میں دہشت گردی کی لہر کے تانے بانے بھارت سے ملتے ہیں اور اس حوالے سے پاکستان کی جانب سے شواہد بھی پیش کیے جا چکے ہیں۔

(جاری ہے)

راجہ جاوید اخلاص نے میر علی میں سیکیورٹی فورسز کی کامیاب کارروائی کے دوران 3 خارجی دہشت گردوں کی ہلاکت اور بھاری اسلحہ برآمد ہونے پر افواجِ پاکستان اور سیکیورٹی فورسز کو خراجِ تحسین پیش کیا۔

انہوں نے کہا کہ دہشت گردوں کے خلاف سیکیورٹی فورسز کی بروقت اور موثر کارروائی ان کی پیشہ ورانہ مہارت، جرات اور ملک دشمن عناصر کے خلاف غیرمتزلزل عزم کا واضح ثبوت ہے،افواجِ پاکستان کے جوان وطن عزیز کے امن و سلامتی کے تحفظ کے لیے دن رات اپنی ذمہ داریاں انتہائی بہادری اور قومی جذبے کے ساتھ انجام دے رہے ہیں۔انہوں نے کہا کہ دہشت گردی کے خلاف جنگ میں سیکیورٹی فورسز کی قربانیاں پوری قوم کے لیے باعثِ فخر ہیں،پاکستان کے بہادر محافظ ملکی سلامتی،عوام کے جان و مال کے تحفظ اور مادرِ وطن کے دفاع کے لیے ہر محاذ پر سینہ سپر ہیں۔

راجہ جاوید اخلاص نے کہا کہ دہشت گرد عناصر اپنے مذموم عزائم کے ذریعے پاکستان کے امن کو نقصان پہنچانے کی کوشش کر رہے ہیں، تاہم افواجِ پاکستان اور دیگر سیکیورٹی اداروں کے مضبوط عزم اور مثر کارروائیوں کے باعث دہشت گردوں کے عزائم کو ناکام بنایا جا رہا ہے۔انہوں نے مزید کہا کہ پوری قوم اپنی بہادر افواج اور سیکیورٹی فورسز کے ساتھ کھڑی ہے اور دہشت گردی کے مکمل خاتمے تک اپنے محافظوں کی حمایت جاری رکھے گی۔ وطن عزیز کے دفاع میں جانوں کا نذرانہ پیش کرنے والے شہدا اور غازیوں کی قربانیاں قوم کے لیے ہمیشہ باعثِ عزت و افتخار رہیں گی۔