پاکستان بھر سے پوزیشن ہولڈر طلبہ کا 38رکنی وفد ایک ماہ کا یورپی دورہ مکمل کر کے آج وطن واپس پہنچے گا،وطن واپسی سے قبل جرمنی میں فرینکفرٹ کمیونٹی کی طرف سے پوزیشن ہولڈرز کے اعزاز میں استقبالیہ،طلبہ نے سویڈن‘ جرمنی اور برطانیہ میں دنیا کی 25بہترین یونیورسٹیوں کے مختلف شعبہ جات کا دورہ کیا،برطانوی‘ سویڈش اور سکاٹش پارلیمنٹ کے دورے ‘ طلبہ نے یورپ کے قابل دید مقامات بھی دیکھے،پاکستان بھر کے طالب علموں کے لئے شہبازشریف کسی مسیحا سے کم نہیں-دورے سے واپسی پر طلبہ کے تاثرات

پیر 13 جولائی 2015 08:53

لاہور(اُردو پوائنٹ اخبارآن لائن۔13 جولائی۔2015ء) وزیراعلیٰ پنجاب فلیگ شپ پروگرام کے تحت پاکستانی پوزیشن ہولڈر طلبہ کا 38 رکنی وفد ایک ماہ کا یورپی دورہ مکمل کر کے وطن واپس پہنچ رہا ہے۔وطن واپسی سے قبل جرمنی میں فرینکفرٹ کمیونٹی کی طرف سے پوزیشن ہولڈرطلباء و طالبات کے اعزاز میں استقبالیہ دیاگیا۔استقبالیہ کا اہتمام ایم پی اے رانا لیاقت نے کیا۔

پنجاب‘ سندھ‘ بلوچستان‘ خیبرپختونخوا‘ آزادجموں و کشمیر‘ گلگت بلتستان اور وفاقی بورڈ کے پوزیشن ہولڈر طلبہ کے وفد نے سویڈن‘ جرمنی اور برطانیہ میں ٹیکنیکل یونیورسٹی برلن‘ ہائیڈل برگ یونیورسٹی‘ آکسفورڈ یونیورسٹی‘ کیمبرج یونیورسٹی اور یونیورسٹی آف سرے سمیت دنیا بھر کی 25بہترین یونیورسٹیوں کا دورہ کیا۔

(جاری ہے)

جہاں انہوں نے جدیدترین ٹیکنالوجی سے مزین لیبارٹریوں‘ لائبریریوں اور مختلف شعبہ جات کے دورے کئے۔ طلبہ کو دورے کے دوران سائنسدانوں‘ فیکلٹی ممبران‘ سینئر اساتذہ اور طالب علموں سے تبادلہ خیال کا موقع ملا۔ دورہ مکمل کرنے پر طلبا نے اپنے تاثرات بیان کرتے ہوئے کہا کہ پاکستان بھر کے طالب علموں کے لئے شہبازشریف کسی مسیحا سے کم نہیں۔

شہبازشریف کی طرف سے پوزیشن ہولڈر طلبہ کے لئے اعلیٰ یورپی یونیورسٹیوں کے دورے کا اہتمام کرنا ان کی صلاحیتوں کے اعتراف کا بہترین نمونہ ہے۔ پاکستانی پوزیشن ہولڈر طلبہ نے برطانیہ‘ سویڈن اور جرمنی میں اوورسیز پاکستانیز کمیونٹی سے ملاقاتیں کیں اور قابل دید مقامات کا دورہ بھی کیا۔ پاکستانی وفد نے برطانوی‘ سویڈش اور سکاٹش پارلیمنٹ کے دورے بھی کئے۔