سندھ بلوچستان کی سرحدی پٹی پرجرائم پیشہ افراد کیخلاف ٹارگیٹڈ آپریشن کی تیاریاں مکمل

پولیس کاجیکب آباد سے ملنے والی بلوچستان کی حدود کا معائنہ سروے مکمل کرلیا، جلد آپریشن کا امکان

بدھ 15 مارچ 2017 23:02

جیکب آباد(اُردو پوائنٹ اخبار آن لائن۔ جمعرات 16 مارچ 2017ء) سندھ بلوچستان کی سرحدی پٹی کے علاقہ میں جرائم پیشہ افراد کے خلاف ٹارگیٹڈ آپریشن کی تیاریاں مکمل، پولیس نے جیکب آباد ضلع سے ملنے والی بلوچستان کی حدود کا معائنہ کرکے مزید چیک پوسٹیں قائم کرنے کا سروے مکمل کرلیا، جلد آپریشن کا امکان۔ تفصیلات کے مطابق سیہون سانحہ کے بعد نیشنل ایکشن پلان کے تحت سندھ اور بلوچستان کی پولیس کی جانب سے سندھ اور بلوچستان کے سرحدی علاقوں میں جرائم پیشہ افراد کے خلاف آپریشن کا فیصلہ کیا گیا ہے اس سلسلے میں چند روز قبل ڈی آئی جی لاڑکانہ اور ڈی آئی جی نصیر آباد کے درمیان اہم ملاقات بھی ہوئی تھی جس میں آپریشن کے متعلق اہم فیصلے کئے گئے ،جرائم پیشہ افراد کے خلاف ٹارگیٹڈ آپریشن کے متعلق ہونے والے اجلاس سے سندھ اور بلوچستان کے اعلیٰ حکام کو بھی آگاہ کیا گیا ہے ، معلوم ہوا ہے کہ ضلع جیکب آباد سے ملنے والی بلوچستان کی سرحدی پٹی کے علاقوں آر ڈی 44،آر ڈی 52، باہوکھوسوتھانہ ، کریم بخش کھوسو تھانہ، عمرانی لاڑو سمیت دیگر داخلی و خارجی راستوں پر مزید چیک پوسٹیں اور پولیس چوکیاں قائم کرنے کے لیے سروے مکمل کیا گیا ہے اور جلد چوکیاں قائم کرکے آپریشن شروع کیا جائے گا معلوم ہوا ہے کہ سندھ اور بلوچستان پولیس کی جانب سے جرائم پیشہ اور تخریبکاروں کے خلاف کئے جانے والے مشترکہ آپریشن کی نگرانی سندھ اور بلوچستان کے ایس ایس پیز کریں گے اوراس حوالے سے دیگر اضلاع سے بھی پولیس کو طلب کیا جائے گا جبکہ رینجرز کوبھی آپریشن میں شامل کئے جانے کا امکان ہے۔

(جاری ہے)

اس سلسلے میں رابطہ کرنے پر ایس ایس پی جیکب آباد سرفراز نواز شیخ نے کہا کہ سندھ بلوچستان کے سرحدی علاقہ میں اکثر چوکیاں غیر فعال تھیں جنہیں اب فعال کیا جارہا ہے 32چوکیاں فعال کرکے اہلکار مقرر کئے جائیں گے تاکہ بارڈر ایریا پر سخت نگرانی کی جاسکے ،جرائم پیشہ عناصر ان علاقوں سے سندھ میں داخل ہوتے ہیں اور کرائم کرنے کے بعد فرار ہوجاتے ہیں۔