برطانوی عدالت نے بیماری میں مبتلا بچے کو مرنے کی اجازت دے دی

بچے کو زندہ رکھنے سے تکلیف میں اضافہ ہوگا،زندہ رکھنے والے مصنوعی آلات ہٹا دہیے جائیں،عدالت کا فیصلہ

جمعہ 28 جولائی 2017 12:20

لندن(اُردو پوائنٹ اخبار آن لائن۔ ہفتہ 29 جولائی 2017ء)برطانیہ کی ہائی کورٹ نے مستقلاً بیمار بچے چارلی گیرڈکو اسپتال سے خارج کرنے کی اجازت دے دی ہے تاکہ وہ سکون سے مر سکے۔غیرملکی خبررساں ادارے کے مطابق عدالت کے اس فیصلے سے بچوں کے حقوق میں ریاست کے کردار اور صحت کی دیکھ بھال پر جاری گرما گرم بحث مباحثہ اپنے اختتام کو پہنچ گیا ۔

ہائی کورٹ نے یہ فیصلہ اس وقت کیا جب چارلی کے والدین اور لندن کے گریٹ آرمنڈ سٹریٹ ہاسپیٹل کے درمیان گیارہ ماہ کے بچے کی زندگی کے خاتمے پر کوئی تصفیہ نہیں ہو ا۔ بچہ اسپتال میں زیر علاج تھا۔عدالتی حکم میں کہا گیا ہے کہ یہ بچے کے اپنے مفاد میں نہیں ہے کہ اس کے لیے مصنوعی تنفس جاری رکھی جائے ۔ اس لیے ان آلات کا ہٹایا جانا قانونی اور بچے کے بہترین مفاد میں ہے۔

(جاری ہے)

چارلی ایک جینیاتی خرابی کی بیماری کے ساتھ پیدا ہوا تھا۔ دنیا میں ایسے مریضوں کی تعداد صرف 16 ہے۔ وہ دیکھ نہیں سکتا، سن نہیں سکتا، وہ چیخ نہیں سکتا، کوئی چیز نگل نہیں سکتا، حرکت نہیں کر سکتا، حتی کہ خود سانس بھی نہیں لے سکتا۔ اسے وقفے وقفے سے مرگی کے دورے بھی پڑتے ہیں۔اس سال چار اگست کو وہ ایک سال کا ہو جائے گا۔اس سال کے شروع میں چارلی کا علاج کرنے والے اسپتال نے عدالت سے یہ کہتے ہوئے لائف سپورٹ کے آلات ہٹانے کی اجازت مانگی تھی کہ بچے کو زندہ رکھنے سے اس کی تکالیف میں مزید ہو رہا ہے۔

بچے کے والدین کرس گیرڈ اور کونی یاٹیز نے اسپتال کے موقف پر اعتراض کرتے ہوئے چارلی کو تجرباتی علاج کے لیے امریکہ لے جانے کی اجازت طلب کی تھی۔لیکن برطانیہ کی عدالتوں اور انسانی حقوق کی یورپی عدالت نے اسپتال کے موقف کی حمایت کی۔انسانی حقوق کی عدالت نے کہا کہ ایک ایسے تجرباتی علاج کا کوئی فائدہ نہیں ہے جس میں کامیابی کے امکانات نہ ہونے کے برابر ہیں اور اس طرح کا علاج بچے کی تکلیف میں مزید اضافے کا سبب بنے گا۔

اس معاملے نے جلد ہی دنیا بھر کی توجہ حاصل کر لی اور امریکی صدر ڈونلڈ ٹرمپ اور پوپ فرانسس سمیت عالمی راہنماؤں نے بیانات دیے اور علاج کرانے کی پیش کش کی۔اس ہفتے کے شروع میں چارلی کے والدین گیرڈ اور یاٹس نے یہ تسلیم کرتے ہوئے قانونی جنگ سے علیحدگی اختیار کر لی کہ بچے کی بیماری لا علاج ہے۔اس کے بعد انہوں نے درخواست کی کہ بچے کو گھر لے جانے کی اجازت دی جائے لیکن اسپتال نے یہ کہتے ہوئے انکار کر دیا کہ لائف سپورٹ کے آلات ان کے گھر میں نصب نہیں کیے جاسکتے۔

برطانوی قانون کے تحت بچے کے اپنے والدین سے ہٹ کر بھی حقوق ہیں، جس کا مطلب یہ ہے کہ علاج سے متعلق فیصلے میں والدین کو مکمل اختیارات حاصل نہیں ہیں۔اسپتال کی جانب سے جاری ہونے والے ایک بیان میں کہا گیا ہے کہ ہم اس معاملے پر ڈاکٹروں اور چارلی کے والدین کے درمیان اختلافات پر معذرت کرتے ہیں۔ ہم ہمیشہ والدین کے آالات کا احترام کرتے ہیں اور ہم کبھی ایسا کام نہیں کریں گے جو ہمارے مریضوں کے لیے غیر ضروری اور طویل عرصے تک جاری رہنے والی پریشانیوں اور مشکلات کا سبب بنے۔ ہمارے طبی عملے کی ترجیج ہمیشہ چارلی کی صحت رہی ہے۔

Facebook Twitter Google + Share on Whatsapp

برطانوی عدالت نے بیماری میں مبتلا بچے کو مرنے کی اجازت دے دی

بچے کو زندہ رکھنے سے تکلیف میں اضافہ ہوگا،زندہ رکھنے والے مصنوعی آلات ہٹا دہیے جائیں،عدالت کا فیصلہ

ہفتہ 29 جولائی 2017 کی مزید خبریں