حضرت عیسیٰ علیہ السلام کا اسلامی عقیدہ سن کر عیسائی خاتون مسلمان

میں پوری طرح سے اسلام کی حقانیت اورصداقت کی قائل ہوگئی ہوں،کینیڈین خاتون کی مشرف بہ اسلام ہونے کے بعدگفتگو

اتوار 21 جنوری 2018 13:40

ریاض(اُردو پوائنٹ اخبار آن لائن۔ اتوار 21 جنوری 2018ء) کینیڈا کی ایک عیسائی خاتون اسلام میں حضرت عیسیٰ علیہ السلام کے مقام و رتبے سے متعارف ہونے کے بعد حلقہ بگوش اسلام ہوگئی۔عرب ٹی وی کے مطابق سعودی طالب علم محمد العتیبی کاکہناتھا کہ ایک عیسائی طالبہ کینیڈا کی یونیورسٹی میں ہم جماعت تھی۔ وہ مسلمانوں کے اخلاق اور دینی تعلیمات کی پابندی سے متاثر ہوکر اسلام کے بارے میں وقتاً فوقتاً سوالات کرتی رہتی تھی۔

(جاری ہے)

جب بھی وہ اسلام سے متعلق کوئی بات دریافت کرتی ہم اسے اسلام کی روا داری ، اسلام میں انسانی حقوق کے احترام،فرد اور معاشرے کی حیثیت کی بابت مستند معلومات پیش کردیتے تھے۔ آخری بار اس نے دریافت کیا کہ مسلمان، عیسیٰ علیہ السلام کی بابت کیا عقیدہ رکھتے ہیں۔ اس کے جواب میں بتایا گیا کہ مسلمان انہیں اللہ کا پیغمبر مانتے ہیں۔ اللہ کا بندہ تسلیم کرتے ہیں جبکہ نصرانیت میں حضرت عیسیٰ علیہ السلام کی مغالطہ آمیز تصویر کی بابت بھی چشم کشا حقائق پیش کئے گئے۔ 8ماہ بعد اس نے یہ کہہ کر اسلام قبول کرلیا کہ میں پوری طرح سے اسلام کی حقانیت اورصداقت کی قائل ہوگئی ہوں۔