عالمی اداروں اوردوست ممالک کا اعتماد بحال ہورہا ہے۔زاہد حسین

کراچی (اُردو پوائنٹ اخبارتازہ ترین - آن لائن۔ 25 مئی2024ء) نیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولزفورم وآل کراچی انڈسٹریل الائنس کے صدراورسابق صوبائی وزیرمیاں زاہد حسین نے کہا ہے کہ متحدہ عرب امارات کے صدرشیخ محمد بن زید النہیان کی جانب سے پاکستان میں دس ارب ڈالرکی سرمایہ کاری کی یقین دہانی خوش آئند ہے۔ یواے ای کے صدر نے یہ یقین دہانی وزیراعظم شہبازشریف سے ایک خصوصی ملا قات کے دوران کی۔

عالمی اداروں اوردوست ممالک کا پاکستان پراعتماد بحال ہورہا ہے جس سے جلد ہی ملکی صورتحال میں خوشگوارتبدیلی کا امکان ہے۔ میاں زاہد حسین نے کاروباری برادری سے بات چیت کرتے ہوئے کہا کہ وزیراعظم نے پاکستان اورمتحدہ عرب امارات کی آئی ٹی کمپنیوں کے درمیان شراکت داری پرراؤنڈ ٹیبل سیشن سے خطاب کے بعد دبئی میں کام کرنے والی آئی ٹی کمپنیوں کے پیشہ ورانہ ماہرین سے ملاقات کی اورابوظبی فنڈ فارڈیولپمنٹ کے ڈائریکٹرجنرل سے بھی ملاقات کی جس میں پاکستان اورمتحدہ عرب امارات کے مابین تعاون کے فروغ پرتبادلہ خیال کیا گیا۔

(جاری ہے)

انھوں نے دوست ملک کے صدرسے ملاقات میں سیاسی، اقتصادی اوردفاعی شعبوں میں تعاون پرتبادلہ خیال کیا۔ وزیراعظم نے انفارمیشن ٹیکنالوجی، قابل تجدید توانائی اورسیاحت کے شعبوں میں تعاون کے فروغ کے عزم کا اعادہ بھی کیا۔ انھوں نے متحدہ عرب امارات کی پاکستان میں توانائی، پورٹ آپریشنز، غذائی تحفظ، مواصلات، معدنیات، بینکنگ اورمالیاتی سروسز کے شعبے میں سرمایہ کاری کے منصوبوں پرعملدرآمد کویقینی بنانے کیعزم کا بھی اظہار کیا۔

ان ملاقاتوں میں نائب وزیراعظم ووزیر خارجہ اسحٰق ڈار، وزیرتجارت جام کمال خان، وزیردفاع خواجہ محمد آصف اورمعاون خصوصی طارق فاطمی بھی شریک تھے جنھوں نے مختلف حکام سے نتیجہ خیزتبادلہ خیال کیا۔ میاں زاہد حسین نے کہا کہ وزیراعظم شہبازشریف پاکستان اورمتحدہ عرب امارات کے درمیان برادرانہ اورتعاون پرمبنی تعلقات کومزید مضبوط بنانے کے کوشاں ہیں جس کی بزنس کمیونٹی مکمل حمایت کرتی ہے۔

میاں زاہد حسین نے کہا کہ وزیراعظم شہبازشریف پاکستان کا امیج بہتربنانے اورسرمایہ کاری ملک میں لانے کے لئے کوشاں ہیں۔ ان کی کوششوں کی وجہ سے وہ ممالک جوسابقہ حکومت کی غیرذمہ داری کی وجہ سے ناراض ہوگئے تھے اب دوبارہ پاکستان کے قریب آگئے ہیں۔ میاں زاہد حسین نے مزید کہا کہ پاکستان کی آبادی میں اکثریت نوجوانوں کی ہے جس کی وجہ سے پاکستان میں ترقی کے بہت مواقع موجود ہیں۔

ہماری آبادی کی 60 فیصد اکثریت کی عمریں 15 سے 30 سال کے درمیان ہیں تاہم انھیں روزگارکی تلاش میں مسائل کا سامنا ہے نئی سرمایہ کاری ہونے سے ملازمتوں کے مواقع میں بھی اضافہ ہوگا جبکہ نوجوانوں کو بڑی تعداد میں آئی ٹی کی تربیت دے کر اپنے پیروں پر کھڑا کیا جا سکتا ہے اور تربیت یافتہ افرادی قوت کو بیرون ملک روزگار کے حصول کے لیے بھیجنے کے مواقع پیدا کیے جائیں تو ملک میں تیزی سے خوشحالی آ سکتی ہے۔ اس مقصد کے لیے حکومت کو بڑی تعداد میں آئی ٹی کی تربیت اور دیگر ہنر سکھانے کے اداروں کا جال بچھانا ہوگا۔ #