بحرین میں نوکری سے پہلے میڈیکل کے حوالے سے بڑی تبدیلی کردی گئی

منامہ ( اُردو پوائنٹ اخبارتازہ ترین ۔ 08 اگست 2022ء ) بحرین میں نوکری سے پہلے میڈیکل کے حوالے سے بڑی تبدیلی کردی گئی اور حکومت نے ملازمت سے قبل گھریلو ملازمین کے ہیلتھ چیک اپ کی نجکاری کر دی، اس فیصلے کا مقصد تقرریوں کے لیے صحت سے متعلق جانچ کے عمل کو تیز کرنا ہے تاکہ صحت کی مجموعی حفاظت کو برقرار رکھا جا سکے۔ بحرین نیوز ایجنسی کی رپورٹ کے مطابق ایک سینئر اہلکار نے بتایا ہے کہ گھریلو ملازمین کے لیے ملازمت سے قبل صحت کی جانچ کی اب بحرین میں مکمل طور پر نجکاری کر دی گئی ہے، وزارت صحت میں میڈیکل کمیشن کی چیف ڈاکٹر عائشہ احمد حسین نے کہا کہ یہ اقدام 2022ء کے فیصلے (21) کے نفاذ کے لیے ہے، جس میں 2017 کے فیصلے (30) کی کچھ شقوں میں ترمیم کی گئی ہے، جو غیر ملکیوں کے لیے طبی معائنے کے ضابطے سے متعلق ہے۔

(جاری ہے)

انہوں نے تصدیق کی کہ اس فیصلے کا مقصد صحت کی تقرریوں اور جانچ کے عمل کو تیز کرنا ہے تاکہ صحت سے متعلق مجموعی حفاظت کو برقرار رکھا جا سکے، گھریلو ملازمین کے لیے طبی معائنے کے طریقہ کار کو اپ ڈیٹ کرنے کا مقصد مملکت میں تمام غیر ملکی کارکنوں کے لیے ایک جامع ڈیٹا بیس کو مضبوط کرنا، طبی معائنے کے طریقہ کار کو بہتر اور معیاری بنانا ہے، ساتھ ہی ساتھ ان ٹیسٹوں کے انعقاد میں نجی شعبے کے کردار کو مزید تقویت دینا ہے۔

ڈاکٹر عائشہ احمد حسین نے کہا کہ ایک ورکنگ گروپ تشکیل دیا گیا ہے جس میں متعلقہ اسٹیک ہولڈرز شامل ہیں، فیصلے پر عمل درآمد کے طریقہ کار کو اپ ڈیٹ کرنے کے لیے وزارت صحت، انفارمیشن اینڈ ای گورنمنٹ اتھارٹی، لیبر مارکیٹ ریگولیٹری اتھارٹی، اور نیشنل ہیلتھ ریگولیٹری اتھارٹی کو اس ورکنگ گروپ میں شامل کیا گیا ہے۔ انہوں نے کہا کہ گھریلو ملازمین کو مملکت میں داخلے کی تاریخ سے 5 دنوں کے اندر ان امتحانات سے گزرنا ہوگا، انہیں مقام اور لاگت کے لحاظ سے اپنے اور ان کے آجروں کے لیے قریب ترین اور آسان ترین صحت کے ادارے کا انتخاب کرنے کی آزادی ہے، وہ قومی پورٹل Bahrain.bh کے ذریعے اپوائنٹمنٹ کی تاریخیں بک اور تبدیل کر سکتے ہیں، نیز یہاں سے نتائج اور فٹنس سرٹیفکیٹ پرنٹ بھی کرسکتے ہیں۔