بحرین نے ویزہ پالیسی میں بڑی تبدیلی کردی

غیر ملکی اب کہیں سے بھی بحرین کے ریذیڈنسی اور ورک پرمٹ کی تجدید کرسکتے ہیں

ساجد علی منگل 5 ستمبر 2023 10:34

بحرین نے ویزہ پالیسی میں بڑی تبدیلی کردی

منامہ ( اُردو پوائنٹ اخبارتازہ ترین ۔ 05 ستمبر 2023ء ) خلیجی ملک بحرین نے اپنی ویزہ پالیسی میں بڑی تبدیلی کردی جس کے تحت غیر ملکی اب کہیں سے بھی بحرین کے ریذیڈنسی اور ورک پرمٹ کی تجدید کرسکتے ہیں۔ ڈیلی ٹریبیون نیوز آف بحرین کے مطابق بحرین نے ایک اہم فیصلے کے ساتھ مشرق وسطیٰ میں تارکین وطن کے لیے اولین منزل کے طور پر ایک بار پھر اپنی پوزیشن مستحکم کرلی ہے، ملک اب اپنی وسیع تارکین وطن کمیونٹی کو میعاد ختم ہونے سے پہلے دنیا میں کہیں سے بھی اپنے رہائشی اور ورک پرمٹ کی تجدید کرنے کی اجازت دیتا ہے، اس فیصلے کا اعلان وزارت داخلہ کے انڈر سیکرٹری برائے نیشنلٹی، پاسپورٹ اور رہائشی امور شیخ ہشام بن عبدالرحمن الخلیفہ نے کیا۔

بتایا گیا ہے کہ یہ سروس تجارتی اور سرکاری دونوں شعبوں میں کام کرنے والے غیر ملکیوں کے ساتھ ساتھ رجسٹرڈ مزدوروں اور گھریلو ملازمین کے لیے بھی دستیاب ہے، یہ سہولت لیبر مارکیٹ ریگولیٹری اتھارٹی (LMRA) کے ساتھ مل کر پیش کی جاتی ہے۔

(جاری ہے)

معلوم ہوا ہے کہ رہائشی اجازت ناموں کی تجدید بحرین کے نیشنل پورٹل کے ذریعے کی جا سکتی ہے اور ورک پرمٹ کی تجدید غیر ملکی انتظامی نظام یا سرکاری لیبر مارکیٹ ریگولیٹری اتھارٹی کے ذریعے کی جا سکتی ہے، اس حوالے سے اتھارٹی کے سی ای او نیبراس محمد طالب نے کہا کہ یہ سروس آجروں کو بحرین سے باہر سے اپنے ملازمین کے ورک پرمٹ کی آن لائن تجدید کرنے کی اجازت دیتی ہے، بشرطیکہ تجدید کا عمل پرمٹ کی میعاد ختم ہونے سے پہلے مکمل ہو جائے۔

اس حوالے سے کہا گیا ہے کہ یہ اہم قدم تجدید کے عمل کو تیز کرنے اور غیر ملکی کارکنوں کے لیے کاروباری مالکان اور سرمایہ کاروں کے مطالبات کو پورا کرنے کی کوشش کا حصہ ہے، آجر ایکسپٹرییٹ مینجمنٹ سسٹم کے ذریعے ورک پرمٹ کی تجدید بھی کرسکتے ہیں، مطلوبہ مدت کا انتخاب کرکے ادائیگی کے عمل کو مکمل کرسکتے ہیں، متبادل طور پر وہ تجدید کے عمل کو مکمل کرنے اور متعلقہ فیس ادا کرنے کے لیے لیبر مارکیٹ ریگولیٹری اتھارٹی کے ذریعے مجاز بینکوں میں سے کسی ایک کا دورہ کرسکتے ہیں۔