کویت میں پاکستانیوں کو ملازمتوں کے نئے مواقع ملنے کا امکان

کویت سٹی ( اُردو پوائنٹ اخبارتازہ ترین ۔ 16 مئی 2023ء ) خلیجی ملک کویت میں پاکستانیوں کے لیے ملازمتوں کے نئے مواقع پیدا ہونے کا امکان ہے جہاں طب، نرسنگ اور ریڈیولاجی جیسے تکنیکی شعبوں میں پاکستانی طبی عملے سے فائدہ اٹھایا جاسکتا ہے۔ مقامی میڈیا کے مطابق کویت میں ہیلتھ انشورنس ہاسپٹلز کمپنی (ضمان) نے کویت میں تعینات پاکستانی سفیر ملک محمد فاروق کی میزبانی کی جہاں انہیں کمپنی کی جانب سے فراہم کردہ خدمات، صحت کے نظام کے مربوط آپریشن، اس کے مستفید ہونے والوں اور طب کے حصول کے لیے حاصل کردہ تازہ ترین پیشرفت کے بارے میں بریفنگ دی گئی، اس دورے میں طبی ٹیموں اور صحت کی دیکھ بھال سے متعلق تکنیکی عملے سے متعلق متعدد موضوعات پر تبادلہ خیال کیا گیا۔

بتایا گیا ہے کہ پاکستانی سفیر کے دورے میں احمدی گورنریٹ کے ضمان ہسپتال کا ایک جامع فیلڈ ٹور شامل تھا، جس میں سی ای او ثامر العرب، متعدد کمپنی لیڈرز اور سفارت خانے کے نمائندے شامل تھے، جہاں انہوں نے ہسپتال کے مختلف کلینکس، ریڈیولاجی، لیبارٹری کی خدمات، علاج کے کمروں اور استقبالیہ پر پہنچنے والے مریضوں کا جائزہ لیا۔

(جاری ہے)

معلوم ہوا ہے کہ دورے کے دوران مشترکہ تعاون اور پاکستان کی طبی ٹیموں سے فائدہ اٹھانے کے طریقہ کار پر گفتگو ہوئی، کیوں کہ کمپنی کو ضمان ہسپتالوں اور بنیادی صحت کی دیکھ بھال کے مراکز میں مختلف طبی عملے کی ضرورت ہے، جس کے لیے طب، نرسنگ، ریڈیولاجی جیسے تکنیکی شعبوں میں پاکستانی طبی عملے کی اہلیت سے فائدہ اٹھانے کی خواہش کا اظہار کیا گیا۔

اپنے دورے کے دوران سفیر پاکستان ملک فاروق نے اس اہم کردار پر زور دیا جو ضمان ماڈل اپنے بنیادی صحت کی دیکھ بھال کے مراکز اور ہسپتالوں کے ذریعے کویت میں صحت کی دیکھ بھال کی سطح کو بڑھانے کے لیے استعمال کرتا ہے، انہوں نے صحت کے شعبے میں کویت کے ساتھ پاکستان کے قریبی تعلقات پر روشنی ڈالی اور صحت کی دیکھ بھال و رہائشیوں کو فراہم کی جانے والی خدمات کے معیار میں مزید تعاون کی خواہش ظاہر کی۔