وفاقی وزیر داخلہ شیخ رشید کی حکومت اور فوج میں کسی بھی نوعیت کے اختلاف کی سختی سے تردید

اسلام آباد (اُردو پوائنٹ اخبارتازہ ترین - این این آئی۔ 15 اکتوبر2021ء) وفاقی وزیر داخلہ شیخ رشید نے حکومت اور فوج میں کسی بھی نوعیت کے اختلاف کی سختی سے تردید کرتے ہوئے کہا ہے کہ اگلے جمعہ تک سب ٹھیک ہوجائے گا، معاملات طے ہوچکے ہیں، طریقہ کار کا اعلان 7 دن میں ہوجائیگا،بعض باتوں کا جواب عمران خان ہی دے سکتے ہیں، مجھے اندازہ ہے، کیا کرنا ہے فیصلہ عمران خان کا ہی ہوگا،الیکٹرانک ووٹنگ سے متعلق بیٹھ کر فیصلہ کریں، اپوزیشن سیاسی باتیں کرے، پاکستان میں کوئی الیکشن ایسانہیں جس پر دھاندلی کا الزام نہ لگا ہو،میری زندگی کا مشن ہے کہ طاقتور کو کمزور اور کمزور کو طاقتور کیا جائے، راولپنڈی میں کوئی بدمعاش کسی کی جائیداد پر قبضہ نہیں کرسکتا۔

ایک انٹرویو میں شیخ رشید نے حکومت اور فوج میں کسی بھی نوعیت کے اختلاف کی تردید کی۔

(جاری ہے)

شیخ رشید احمد نے کہا کہ مجھے اندازہ ہے لیکن اس کے باوجود بعض باتوں کا جواب وزیراعظم عمران خان ہی دے سکتے ہیں۔انہوں نے کہا کہ لوگ بہت جلدی گھبرا جاتے ہیں، اس معاملے پر عمران خان نے پارلیمانی پارٹی کو اعتماد میں لے لیا ہے۔وفاقی وزیر نے کہا کہ میرے پاس جو اطلاعات ہیں، اس کے مطابق سب کچھ طے ہوچکا ہے، ہوسکتا ہے اگلے روز اعلان ہو جائے یا پیر کو ہوجائے بہرحال جمعہ تک سب ٹھیک ہوجائے گا۔

انہوں نے کہا کہ بعض باتوں کا جواب عمران خان ہی دے سکتے ہیں، مجھے اندازہ ہے، لیکن کیا کرنا ہے فیصلہ عمران خان کا ہی ہوگا۔شیخ رشید نے ایک سوال کے جواب میں کہا کہ ایسے معاملات میری زندگی میں لاتعداد مرتبہ آئے ہیں، عمران خان کے ساتھ آیا ہوں، اسی کے ساتھ جائوں گا۔وفاقی وزیر داخلہ نے کابینہ اجلاس میں بتایا کہ اٴْن کی آرمی چیف جنرل قمر جاوید باجوہ کی ملاقات ہوئی ہے اور معاملات طے ہوگئے ہیں۔

اٴْنہوںنے کہاکہ دونوں سائیڈ مطمئن ہیں، سب حالات ٹھیک ہیں، پہلی بار دیکھ رہا ہوں کہ کابینہ میٹنگ کی باتیں باہر آرہی ہیں۔شیخ رشید نے کہا کہ عمران خان نے قوم اور پارٹی کو اعتماد میں لیا، کوئی اختلاف نہیں ہے اور کس چیز کا اختلاف نہ ہی ہوگا، وزیراعظم کی خوش قسمتی ہے کہ انہیں ایسی ناکارہ اپوزیشن ملی ہے۔انہوں نے کہا کہ حکومت کا چوتھا سال ہے، اس سال کارکردگی دکھانی ہے، پانچواں سال تو الیکشن کا ہوتا ہے۔

ن لیگ میں اختلافات کی طرف کی اشارہ کرتے ہوئے وفاقی وزیر داخلہ نے کہا کہ امریکی ناظم الامور سے چچا اور بھتیجی نے علیحدہ علیحدہ ملاقاتیں کی ہیں۔ انہوںن یکہاکہ الیکٹرانک ووٹنگ سے متعلق بیٹھ کر فیصلہ کریں، اپوزیشن سیاسی باتیں کرے، پاکستان میں کوئی الیکشن ایسانہیں جس پر دھاندلی کا الزام نہ لگا ہو۔شیخ رشید نے کہا کہ الیکٹرانک ووٹنگ پر آج ہم قانون سازی کردیں، الیکشن کمیشن عمل درآمد کا پابند ہے۔

قبل ازیں راولپنڈی میں تقریب سے خطاب کرتے ہوئے شیخ رشید نے کہا کہ پچھلے سال سے کوشش کر رہا ہوں کہ راولپنڈی میں یونیورسٹی کا قیام ہوسکے، نالہ لئی کا پی سی ون منظور ہوگیا ہے۔شیخ رشید نے کہا کہ سی ایس ایس میں ٹاپ کرنے والی خاتون راولپنڈی میں رکشا ڈرائیور کی بیٹی ہے، راولپنڈی میں آئی ٹی یونیورسٹی ہونی چاہیے۔وزیر داخلہ نے کہا کہ وزیراعظم نالہ لئی کے سنگ بنیاد کی تقریب میں شرکت کریں گے، 26 سال سے نالہ لئی ایکسپریس وے کا خواب دیکھ رہا تھا۔

شیخ رشید نے کہا کہ ڈاکٹر عبدالقدیر خان نے مجھے کہا تھا شیخ رشید بچیوں کی تعلیم پر زور دینا، دنیا کی کوئی طاقت ہمیں شکست نہیں دے سکتی کیونکہ ہماری بیٹی پڑھی لکھی ہے۔وزیر داخلہ نے کہا کہ نالہ لئی ایکسپریس وے، رنگ روڈ منصوبہ، ویمن یونیورسٹی کی منظوری پر وزیر اعلیٰ کا شکر گزار ہوں، انشاء اللّٰہ آئی ٹی یونیورسٹی بھی بنائیں گے۔شیخ رشید نے کہا کہ راولپنڈی کنٹونمنٹ میں 74 سال سے کوئی کالج نہیں بنا، ہم نے بنایا، ڈھوک حسٴْو کے کالج میں 5 ہزار بچیاں زیر تعلیم ہیں، 25 دسمبر کو نالہ لئی ایکسپریس وے منصوبے کا افتتاح کریں گے۔