{کرک، گیس سے بھرے پلاسٹک بیگز میں آگ لگنے سے 10 افراد جھلس گئے

اتوار 10 دسمبر 2023 22:55

+کرک (اُردو پوائنٹ اخبارتازہ ترین - آن لائن۔ 10 دسمبر2023ء) گیس سے بھرے پلاسٹک بیگز میں آگ لگنے سے 10 افراد جھلس کر زخمی ہوگئے۔افسوسناک واقعہ تحصیل بانڈہ کے علاقہ عیسک خماری میں پیش آیا جہاں پلاسٹک کے بڑے تھیلوں میں موجود قدرتی گیس میں آگ لگنے سے دھماکہ ہوگیا جس میں بچوں سمیت 10 افراد جھلس کر زخمی ہوگئے۔

(جاری ہے)

اطلاع ملتے ہی ریسکیو 1122 کی ٹیمیں موقع پرپہنچ گئیں، زخمیوں کو تحصیل ہیڈکوارٹر ہسپتال منتقل کیا گیا جبکہ دو زخمیوں کو تشویشناک حالت میں پشاور منتقل کردیا گیا۔

کے پی میں گھروں میں قدرتی گیس کی عدم فراہمی کے سبب لوگ سوئی ناردرن کی مین ڈسٹری بیوشن لائن میں سوراخوں سے وال لگا کر پلاسٹک کے تھیلوں میں گیس بھر کر گھر لے جاتے ہیں، چلتے پھرتے یہ بم بڑے حادثے کا سبب بن جاتے ہیں۔واضح رہے کہ ضلعی انتظامیہ نے پہلے ہی خطرے کے پیش نظر پلاسٹک بیگز میں گیس بھروانے پر دفعہ 144 لگا کر پابندی عائد کررکھی ہے۔ ۔