کرکٹ آسٹریلیا کا پاک بھارت سیریز کرانے میں پھر دلچسپی کا اظہار

ہم تمام ممبر ممالک کے ساتھ اپنے تعلقات کی قدر کرتے ہیں، نک ہوکلے کی گفتگو

بدھ 27 مارچ 2024 14:38

کرکٹ آسٹریلیا کا پاک بھارت سیریز کرانے میں پھر دلچسپی کا اظہار

میلبرن (اُردو پوائنٹ اخبارتازہ ترین - این این آئی۔ 27 مارچ2024ء) کرکٹ آسٹریلیا کے سی ای او نک ہوکلے نے کہا ہے کہ پاک بھارت کرکٹ کے لیے ہم اپنا کردار ادا کرنا پسند کریں گے۔میلبرن کرکٹ گراؤنڈ میں پاک بھارت مداحوں کی تقریب کے موقع پر میڈیا سے گفتگو کرتے ہوئے نک ہوکلے نے کہا کہ ہم تمام ممبر ممالک کے ساتھ اپنے تعلقات کی قدر کرتے ہیں۔نک ہوکلے نے کہا کہ ہم پاکستان اور بھارت کی دوبارہ میزبانی کر نے کے لیے پٴْرجوش ہیں، اگر ہم پاک بھارت کرکٹ کے لیے کوئی مدد کرسکتے ہیں تو یہ بہت اچھی بات ہے۔

(جاری ہے)

انہوں نے کہا کہ میں سمجھتا ہوں کہ یہ کئی لحاظ سے باہمی سیریز کا معاملہ ہے، باہمی سیریز کو ممکن بنانا دوسروں کا کام ہے لیکن اگر ہم کوئی مدد کرسکتے ہیں تو یہ ہمیں کر کے اچھا لگے گا۔نک ہوکلے نے کہا کہ اگر کوئی موقع ملتا ہے تو ہمیں پاک بھارت سیریز کی میزبانی کر کے اچھا محسوس ہوگا، پاک بھارت میچز کم از کم آنے والے سیزن میں ممکن نہیں، شیڈول بہت مصروف اور پیچیدہ بھی ہے۔انہوںنے کہاکہ نیویارک میں پاکستان اور بھارت کے میچ کے سب منتظر ہیں، ہم یہ مقابلے زیادہ سے زیادہ دیکھنا چاہتے ہیں۔