پنجاب کی جامعات میں سات اہم شعبوں پر قائم کنسورشیمز کی حتمی سفارشات وزیر اعلی مریم نواز کو ارسال

لاہور (اُردو پوائنٹ اخبارتازہ ترین - این این آئی۔ 29 مارچ2024ء) گورنر پنجاب محمد بلیغ الرحمن کی خصوصی ہدایت پر پنجاب کی جامعات میں سات اہم شعبوں پر قائم کنسورشیمز کی حتمی سفارشات رپورٹ کی صورت میں وزیر اعلی پنجاب مریم نواز شریف کو ارسال کر دی گئیں۔گورنر پنجاب نے وزیر اعلی پنجاب کو حکومت پنجاب کے انتظامی محکموں کو کنسورشیمز کی سفارشات پر فوری عمل کرنے کی ہدایات جاری کرنے کی تاکید کی ہے۔

قبل ازیں ،گورنر پنجاب نے ستمبر 2022 میں مری میں منعقدہ وائس چانسلرز کی تین روزہ کانفرنس میں سات(07) اہم موضوعات کی نشاندہی کی اور چیئرپرسن پنجاب ہائر ایجوکیشن کمیشن کو وائس چانسلرز اور فیکلٹی ممبران پر مشتمل کنسورشیمز قائم کرنے کے احکامات جاری کیے تھے۔ جن اہم موضوعات پر کنسورشیمز قائم کیے گئے وہ مندرجہ ذیل ہیں: گورنس اینڈفنانس، کلائمیٹ چینج، انٹرپرینورشپ، کیریکٹر بلڈنگ، ڈرگز اینڈ نارکاٹکس کنٹرول، ویمن ایمپاورمنٹ، پروموشن ف ٹیکنالوجی۔

(جاری ہے)

واضح رہے کہ گورنر پنجاب نے کنسورشیمز میں گہری دلچسپی لیتے ہوئے ان کے متعدد اجلاسوں کی گورنر ہائوس میں صدارت کی۔ کنسورشیمز کے متعدد اجلاس جامعات کے اندر بھی منعقد ہوئے۔ اس طرح کئی مہینوں پر محیط ان کاوشوں کے نتیجے کے طور پر حتمی سفارشات مرتب کی گئیں۔ان سفارشات کا مقصد مقامی مسائل کے مقامی حل تجویز کرنا ہے۔ اس کے ساتھ ساتھ جامعات میں تخلیق علم و تحقیق کوفروغ دینا ہے۔ مزید برآں، معاشرے کو درپیش مسائل کے حل کے لیے پالیسی سازی انتظامی اقدامات میں معاونت کرنا ہے۔