ایشیاء کپ سے قبل بھارت کو بڑا دھچکا، ہیڈکوچ راہول ڈریوڈ کورونا میں مبتلا

نئی دہلی (اردو پوائنٹ تازہ ترین اخبار ۔ 23 اگست 2022ء ) ایشیاء کپ 2022ء کے لیے بھارتی کرکٹ ٹیم دبئی کیلئے روانہ ہوگئی ہے تاہم ہیڈکوچ راہول ڈریوڈ کورونا وائرس میں مبتلا ہوگئے ہیں۔ بھارتی میڈیا کی رپورٹس کے مطابق ہیڈ کوچ راہول ڈریوڈ کا کوویڈ ٹیسٹ مثبت آیا ہے جس کے باعث ان کی ایشیاء کپ کے لیے ٹیم کے ہمراہ شرکت مشکوک ہوگئی ہے۔

(جاری ہے)

رپورٹس میں کہا گیا ہے کہ راہول ڈریوڈ کی کورونا رپورٹ مثبت آنے کے بعد نیشنل کرکٹ اکیڈمی کے سربراہ وی وی ایس لکشمن ایشیاء کپ 2022ء میں اپنا کردار کرتے نظر آئیں گے۔

قبل ازیں زمبابوے کے خلاف سیریز کے لیے راہول ڈریوڈ نے اسکواڈ کے ہمراہ سفر نہیں کیا تھا، انہیں سلیکشن کمیٹی نے بیٹنگ کوچ وکرم راٹھور اور بولنگ کوچ پارس مہمبرے کے ساتھ آرام دیا تھا۔ دوسری جانب ایشیاء کپ کا آغاز 27 اگست سے ہوگا جب کہ گروپ راؤنڈ میں بھارت اور پاکستان 28 اگست کو آمنے سامنے ہوں گی۔