بابر اعظم کو خود غرض کہنے پر سعید اجمل ناقدین پر برس پڑے

لاہور (اردو پوائنٹ تازہ ترین اخبار ۔ 13 جنوری 2023ء ) سابق ٹیسٹ سپنر سعید اجمل نے بابر اعظم کو خود غرض بلے باز قرار دینے والے ناقدین کو کرارا جواب دیتے ہوئے دعویٰ کیا ہے کہ دائیں ہاتھ کے بلے باز میچ ونر کھلاڑی ہیں ۔ میڈیا سے بات کرتے ہوئے سابق آف سپنر نے کہا کہ اگر 28 سالہ خود غرض بلے باز ہے تو مین ان گرین کو دو یا تین مزید خود غرض بلے بازوں کی ضرورت ہے۔

35 ٹیسٹ، 113 ون ڈے اور 64 ٹی ٹونٹی میں پاکستان کی نمائندگی کرنے والے سعید اجمل نے مزید کہا کہ "بابر اعظم ایک اچھے کھلاڑی ہیں اور ان کے کھیل کے کسی بھی منفی پہلو کو ٹھیک کیا جا سکتا ہے۔" 45 سالہ کرکٹر نے آل فارمیٹ کے کپتان کی برطرفی سے متعلق حالیہ افواہوں پر بھی توجہ دلاتے ہوئے کہا کہ الگ کپتان کی ضرورت نہیں ہے۔ اسلام آباد یونائیٹڈ کے اسسٹنٹ کوچ نے کہا کہ اگر انتظامیہ تبدیلیاں چاہتی ہے تو ریڈ اور وائٹ بال کرکٹ میں الگ الگ کپتان مقرر کرے۔

(جاری ہے)

یہاں یہ بات قابل ذکر ہے کہ کراچی میں نیوزی لینڈ کے خلاف دوسرے ون ڈے میں ہوم سائیڈ کی شکست کے بعد دائیں ہاتھ کے کھلاڑی پر کڑی تنقید ہوئی ۔ اگرچہ بابر اعظم نے دوسرے میچ میں 114 گیندوں میں 79 رنز بنائے، جو سیریز کی ان کی دوسری نصف سنچری تھی لیکن سٹرائیک ریٹ سے کم ہونے کی وجہ سے انہیں تنقید کا نشانہ بنایا گیا۔ لاہور میں پیدا ہونے والے کرکٹر جاری تین میچوں کی ون ڈے سیریز میں سب سے زیادہ رنز بنانے والے کھلاڑی ہیں جس نے 72.50 کی اوسط سے 145 رنز بنائے جس میں دو نصف سنچریاں بھی شامل ہیں۔ مین ان گرین کا مقابلہ آج نیشنل بینک کرکٹ ایرینا، کراچی میں سیریز کے فیصلہ کن معرکے میں کین ولیمسن کی قیادت والی ٹیم سے ہوگا۔