ایشیا کپ سپر فور راؤنڈ؛ فخر زمان متنازعہ فیصلے کا شکار

دبئی ( اُردو پوائنٹ اخبارتازہ ترین۔ 21 ستمبر 2025ء ) ایشیاء کپ سپر فور راؤنڈ کے اہم میچ میں فخر زمان متنازعہ فیصلے کا شکار ہوگئے۔ تفصیلات کے مطابق دبئی کرکٹ سٹیڈیم میں کھیلے جا رہے میچ میں اوپنر بلے باز فخر زمان 9 گیندوں پر 15 رنز بنا کر ہاردیک پانڈیا کا شکار بنے اور ناقص امپائرنگ کی بھینٹ چڑھ گئے کیوں کہ بھارتی وکٹ کیپر نے جب فخر زمان کا کیچ پکڑا تو گیند گراؤنڈ کو چھو رہی تھی، تاہم اس کے بعد بھارت کیخلاف پاکستان بلے بازوں نے بھرپور ’لاٹھی چارج‘ کیا اور پاکستان نے 10 اوورز میں ایک وکٹ کے نقصان کے 91 رنز بنائے، جس میں صاحبزادہ فرحان کی ففٹی شامل ہے۔

قبل ازیں ایشیاء کپ سپر فور راؤنڈ کے میچ میں بھارت نے پاکستان کے خلاف میچ کا ٹاس جیتا جس کے بعد بھارتی کپتان سوریا کمار یادو نے پاکستان کے خلاف اس ہائی وولٹیج میں ٹاس جیت کر پہلے فیلڈنگ کا فیصلہ کیا ہے، تاہم پاکستان اور بھارت کے کپتان آج پھر ٹاس کے بعد بغیر ہاتھ ملائے روانہ ہوگئے، اس میچ میں بھی اینڈی پائی کرافٹ ہی میچ ریفری ہیں، پاکستانی پلیئنگ الیون میں 2 تبدیلیاں کی گئی ہیں، فہیم اشرف اور حسین طلعت کو ٹیم میں شامل کیا گیا ہے، پاکستان آج کے اہم میچ میں صائم ایوب، صاحبزادہ فرحان، فخر زمان، حسین طلعت، فہیم اشرف، سلمان علی آغا، محمد نواز، محمد حارث (وکٹ کیپر)، شاہین شاہ آفریدی، حارث رؤف اور ابرار احمد کے ساتھ میدا میں اترا ہے جب کہ بھارتی ٹیم میں بھی دو تبدیلیاں کی گئی ہیں، جسپریت بمراہ اور ورون چکرورتی کو دوبارہ شامل کیا گیا۔

(جاری ہے)

بتایا جارہا ہے کہ پاکستان اور بھارت کے درمیان اب تک دبئی میں کھیلے گئے چاروں میچز میں بعد میں بیٹنگ کرنے والی ٹیم نے فتح حاصل کی، گزشتہ میچ میں بھارت کی فتح ہوئی تاہم 2021ء کے ٹی ٹوئنٹی ورلڈکپ میں پاکستان نے دس وکٹوں سے ریکارڈ فتح بھی اسی گراؤنڈ میں حاصل کی تھی جب کہ 2022ء کے ٹی ٹوئنٹی ایشیا کپ میں گروپ میچ میں بھارت نے پاکستان کو پانچ وکٹوں سے شکست دی تھی لیکن سپر فور میں پاکستان نے پانچ وکٹوں سے کامیابی حاصل کی تھی، لہذا سابقہ ریکارڈ کی روشنی میں اس میدان میں ٹاس جیت کر پہلے بولنگ کرنے کا فیصلہ کرنے والی ٹیم کو فائدہ پہنچ سکتا ہے۔