یونس خان کے سی ایل کے لیگ کمشنر مقرر

لاہور (اُردو پوائنٹ اخبارتازہ ترین - اے پی پی۔ 14 جولائی2026ء) پاکستان کرکٹ ٹیم کے سابق عظیم کپتان یونس خان کو باضابطہ طور پر خیبر پختونخوا چیمپئنز لیگ (کے سی ایل) کا لیگ کمشنر مقرر کر دیا گیا ہے۔ترجمان پی سی بی کے مطابق یونس خان اپنی نئی ذمہ داری میں لیگ کے کرکٹ آپریشنز، قواعد و ضوابط، تکنیکی امور، ٹورنامنٹ کے ڈھانچے اور مجموعی کرکٹ معاملات کی نگرانی کریں گے تاکہ ٹورنامنٹ کا انعقاد اعلی ترین پیشہ ورانہ اور بین الاقوامی معیار کے مطابق یقینی بنایا جا سکے۔

اس سے قبل پاکستان کرکٹ ٹیم کے سابق کپتان شاہد خان آفریدی کو خیبر پختونخوا چیمپئنز لیگ کا برانڈ ایمبیسیڈر مقرر کیا گیا تھا۔ لیگ میں پاکستان کے موجودہ اور سابق بین الاقوامی کرکٹرز کی بڑی تعداد بھی شرکت کرے گی۔

(جاری ہے)

خیبر پختونخوا چیمپئنز لیگ کی شاندار افتتاحی تقریب 18 جولائی کو شام 6 بجے کرکٹ سٹیڈیم، پشاور میں منعقد ہوگی، جہاں لیگ کے باضابطہ شیڈول، آئندہ سرگرمیوں، ٹیلنٹ ہنٹ پروگرام اور متعدد اہم اعلانات سے پردہ اٹھایا جائے گا۔

افتتاحی تقریب میں وزیراعلی خیبر پختونخوا، گورنر خیبر پختونخوا، سینئر سرکاری حکام، کاروباری و کارپوریٹ برادری کے نمائندگان، سرمایہ کار، میڈیا نمائندگان، پاکستان کے سابق اور موجودہ بین الاقوامی کرکٹرز سمیت مختلف شعبہ ہائے زندگی سے تعلق رکھنے والی ممتاز شخصیات شرکت کریں گی۔شام کی نمایاں ترین سرگرمیوں میں معروف پاکستانی گلوکارہ آئمہ بیگ اور پشتو موسیقی کے ممتاز گلوکار رحیم شاہ کی لائیو میوزیکل پرفارمنس بھی شامل ہوگی۔ یہ تقریب کرکٹ، موسیقی، ثقافت اور تفریح کا یادگار امتزاج ثابت ہونے کی توقع ہے۔