لٹل ماسٹر حنیف محمد کی دسویں برسی منائی گئی

ْکراچی(اُردو پوائنٹ اخبارتازہ ترین - این این آئی۔ 11 اگست2026ء) پاکستان کرکٹ کے عظیم بلے باز اور سابق کپتان حنیف محمد کی دسویں برسی عقیدت و احترام سے منائی گئی۔ اس موقع پر کرکٹ حلقوں اور شائقین کی جانب سے ’’لٹل ماسٹر‘‘ کے نام سے شہرت رکھنے والے عظیم بلے باز کو خراجِ عقیدت پیش کیا گیا۔حنیف محمد نے اپنے شاندار کرکٹ کیریئر کے دوران متعدد یادگار ریکارڈز قائم کیے اور پاکستان کو عالمی کرکٹ میں نمایاں مقام دلانے میں اہم کردار ادا کیا۔

انہیں آئی سی سی کرکٹ ہال آف فیم میں شامل کیا گیا جبکہ حکومت پاکستان نے ان کی خدمات کے اعتراف میں صدارتی تمغہ برائے حسن کارکردگی سے بھی نوازا۔حنیف محمد 21 دسمبر 1934 کو جونا گڑھ، متحدہ ہندوستان میں پیدا ہوئے۔ ان کے بھائی وزیر محمد، رئیس محمد، مشتاق محمد اور صادق محمد نے بھی پاکستان کی جانب سے ٹیسٹ کرکٹ کھیلی۔

(جاری ہے)

ان کی والدہ امیر بی بی بھی کھیلوں سے گہرا شغف رکھتی تھیں اور متحدہ ہندوستان کی ویمن بیڈمنٹن چیمپئن رہ چکی تھیں۔

انہوں نے 1952 میں بھارت کے خلاف پاکستان کی جانب سے ٹیسٹ ڈیبیو کیا اور اپنے کیریئر میں 55 ٹیسٹ میچز کی 97 اننگز میں 12 سنچریوں اور 15 نصف سنچریوں کی مدد سے 3 ہزار 915 رنز بنائے۔جنوری 1958 میں ویسٹ انڈیز کے خلاف برج ٹاؤن ٹیسٹ حنیف محمد کے کیریئر کی یادگار ترین اننگز کا گواہ بنا، جہاں انہوں نے 337 رنز اسکور کرکے پاکستان کی جانب سے پہلی ٹرپل سنچری بنانے کا اعزاز حاصل کیا۔

پاکستان کی ٹیم پہلی اننگز میں 106 رنز پر آؤٹ ہوکر فالو آن کا شکار ہوئی تو حنیف محمد نے دوسری اننگز میں 970 منٹ تک کریز پر ڈٹے رہتے ہوئے 337 رنز کی تاریخی اننگز کھیلی اور اپنی ٹیم کو یقینی شکست سے بچایا۔ وہ ٹیسٹ میچ کے تقریباً پانچوں دن میدان میں رہنے والے پہلے کرکٹر بھی قرار پائے۔1959 میں کراچی کی جانب سے بہاولپور کے خلاف فرسٹ کلاس میچ میں حنیف محمد نے 499 رنز کی تاریخی اننگز کھیلی اور سر ڈان بریڈمین کا ریکارڈ توڑ دیا۔

ان کا یہ ریکارڈ 1994 تک قائم رہا، جسے بعد میں ویسٹ انڈیز کے عظیم بلے باز برائن لارا نے توڑا۔حنیف محمد طویل علالت کے بعد 11 اگست 2016 کو کراچی میں انتقال کرگئے تھے۔ ان کی وفات کے بعد دنیا بھر سے انہیں خراجِ عقیدت پیش کیا گیا جبکہ گوگل نے بھی خصوصی ڈوڈل کے ذریعے پاکستان کے عظیم کرکٹر کو یاد کیا۔حنیف محمد کی آخری خواہش تھی کہ ان کے نام سے کرکٹ اکیڈمی قائم کی جائے جہاں نوجوان کھلاڑیوں کو تربیت دے کر ملک کے لیے مستقبل کے بہترین کرکٹرز تیار کیے جاسکیں۔ ان کی شاندار خدمات، ریکارڈز اور پاکستان کرکٹ کے لیے گراں قدر کردار آج بھی قومی کرکٹ کی تاریخ کا روشن باب ہیں۔