پنجاب گورنمنٹ پالیسی کے تحت 42ہزار ٹن گندم کی خریداری کے لئے شہر میں 4 سنٹرز قائم کر دئیے گئے ہیں‘ ڈی سی او لاہور

پیر 27 اپریل 2015 22:56

لاہور(اُردو پوائنٹ اخبار تازہ ترین۔ 27اپریل۔2015ء ) ڈی سی او لاہور کیپٹن(ر)محمد عثمان نے کہا ہے کہ ضلعی انتظامیہ لا ہور نے پنجاب گورنمنٹ پالیسی کے تحت 42ہزار ٹن گندم کی خریداری کے لئے شہر میں 4 سنٹرز قائم کر دئیے ہیں اور اس ضمن میں تمام تر انتظامات مکمل کر لیے گئے ہیں۔ انہوں نے کہا کہ شہر میں گندم کی خریداری کے لیے کاہنہ، برکی، رکھ چھبیل اور رائیونڈ میں گندم خریداری سنٹرز قائم کیے گئے ہیں جہاں پر محکمہ ریونیو اور محکمہ خوراک کے افسران و ملازمین اپنی ڈیوٹیاں سر انجام دے رہے ہیں۔

ڈی سی او لاہور نے ایڈیشنل ڈسٹرکٹ کلکٹر لاہور ریونیو عرفان نواز میمن کو شہر میں گندم کی خریداری کے پروسس کا انچارج نامزد کیا ہے جو کہ شہر میں گندم کی خریداری کے لیے بنائے گئے تمام مراکز کی خود ما نیٹرنگ کریں گے۔

(جاری ہے)

انہوں نے تمام اسسٹنٹ کمشنرز کو بھی ہدایت کی کہ وہ گندم خریداری مراکز پر بلا امتیاز باردانہ کی تقسیم کے عمل کی شفافیت کو یقینی بنائیں اوراس ضمن میں کو ئی کو تاہی ہر گز برداشت نہیں کی جائے گی۔

اس سلسلہ میں آج ڈی سی او لاہور کیپٹن(ر)محمد عثمان نے رکھ شبیل گندم خریدار ی مرکز میں کیے گئے انتظامات کا جائزہ لینے کے لیے دورہ کیا۔اس موقع پر ڈی سی او لاہور نے کسانوں سے با ت چیت کر تے ہوئے انہیں یقین دہانی کروائی کہ گندم خریداری مراکز پر بلا امتیاز انہیں تمام سہولیات فراہم کی جائیں گی۔انہوں نے کہا کہ ضلعی انتظامیہ نے شہر میں گندم کی خریداری مراکز پر کسانوں کو باردانہ دینے کے لئے درخواستیں لینے کا سلسلہ شروع کر دیا ہے اور ان مراکز پر پہلے آئیں پہلے پائیں کی بنیاد پر باردانہ دیا جائے گا۔

انہوں نے کہا کہ 29اپریل سے باردانہ دینے کا سلسلہ شروع کیا جائے گا۔علا وہ ازیں ڈی سی او لاہور کی ہدایت پر اسسٹنٹ کمشنر (شالیمار) ارشد بھٹی نے رکھ شبیل گندم خریداری مرکز،اسسٹنٹ کمشنر (کینٹ)راؤ امتیاز احمد نے برکی گندم خریداری مرکز اور اسسٹنٹ کمشنر (رائے ونڈ)نے رائے ونڈ گندم خریداری مرکزکا دورہ کیا اور وہاں پر درخواستیں موصول کر نے کے عمل کو چیک کیا۔