لائیو سٹاک کی ترقی اور پیداواری صلاحیت کو بڑھانا ہماری حکو مت کی ترجیحات ہیں، محب اللہ خان،

گوشت ،دودھ کی پیداوار میں اضافے کیلئے صوبائی حکومت بہتر حکمت عملی سے مختلف سکیمیں شروع کررہی ہے، معاون خصوصی وزیر اعلی خیبرپختونخوا

ہفتہ 3 جنوری 2015 22:31

پشاور(اُردو پوائنٹ اخبارتاز ترین۔ 3جنوری2015ء) وزیر اعلیٰ کے معاون خصوصی برائے لائیو سٹاک و امداد باہمی محب اللہ خان نے کہا ہے کہ گوشت اور دودھ کی پیداوار میں اضافے کے لئے صوبائی حکومت بہتر حکمت عملی سے ایسی سکیمیں شروع کرنا چاہتی ہے جس سے نہ صرف ضروریات کو پورا کیا جا سکے۔ بلکہ اسکے ساتھ ساتھ معیشت کو بھی مزید مستحکم کیا جا سکے۔ یہ بات انہوں نے پشاور میں ڈائریکٹر جنرل لائیو سٹاک (توسیع) کے دفتر میں ایک اعلیٰ سطحی اجلاس کی صدارت کرتے ہوئے کہی۔

اجلاس میں سیکر ٹری لائیو سٹاک و ذراعت محمد ہمایون خان، سپیشل سیکرٹری ذراعت عثمان یعقوب، ایڈیشنل سیکرٹری لائیوسٹاک شوکت یوسفزئی، ڈائریکٹر جنرل توسیع ڈاکٹر شیر محمد ، ڈائریکٹر جنرل ریسرچ ڈاکٹر غفران اللہ، ڈائریکٹر فشریز شریف اللہ، کوآپریٹو رجسٹرار فدا محمد، چیف پلاننگ آفیسر احمد سعید خان اور دیگر متعلقہ حکام موجود تھے۔

(جاری ہے)

اجلا س کے دوران 2015 سالانہ ترقیاتی منصوبوں پر غور و خوص کیا گیا اور اس حوالے سے مفید آراء و تجاویز پیش کی گئیں۔

اجلاس کے دوران اے ڈی پی میں منظوری کے لئے جن نئی سکیموں کو پیش کرنے پر غور کیا گیا ان میں سوات، مردان، ہری پور، نوشہرہ اور ڈی آئی خان کے لئے کمیونٹی ڈیری ڈویلپمنٹ پراجیکٹ خیبر پختونخوا، رنڈڈوٹرنری انسٹیٹیوٹ، ٹریننگ انسٹی ٹیوٹ پشاور، سوات، ایبٹ آباد اور ڈی آئی خان کے لئے، میٹ اینڈ ڈیری ڈویلپمنٹ پروگرام، موبائل وٹرنری کلینکس یونٹس اور بریڈنگ فارمز کی ری ہیبلیٹشن اور مظبوطی وغیرہ شامل ہیں ۔ صوبائی وزیر نے کہا کہ یہ ایسی سکیمیں ہیں جن سے پیداواری صلاحیت کو بڑھانے کے ساتھ مویشی پال کسان بھائیوں کی فلاح و بہبود اور مزید ترقی بھی ممکن ہو سکے گی۔