مسلم لیگ (ن) کے کارکنوں کے احتجاجی مظاہرے

رمضان اصغر:
پانامہ کیس کا فیصلہ آنے پر اپوزیشن جماعتوں نے جشن منایا، مٹھائیاں تقسیم کیں اور ڈھول کی تھاپ پر رقص کئے جبکہ حکمران جماعت مسلم لیگ (ن) کے کارکنوں نے احتجاجی مطاہرے کئے۔ لاہور میں پانامہ کیس کا فیصلہ سنتے ہی پی ٹی آئی کے کارکن سڑکوں پر نکل آئے اور خوشیاں منائیں جبکہ (ق)لیگ کے کارکنوں نے گو نواز گو کے نعرے لگاتے ہوئے رقص کیا۔

پانامہ کیس کا فیصلہ آتے ہی متعدد مسلم لیگی مرد خواتین کارکنوں کی حالت غیر ہوگئی۔ نواز شریف کیلئے ان کے بہائے جانے والے آنسو حقیقی غم کا نتیجہ تھا کہ ٹی وی کیمروں کیلئے ایکٹنگ کا سامان اس حوالے سے سارا دن سیاسی حلقوں میں ان مناظر کا چرچا رہا۔ آنسو بہانے والی خاتون رہنما شائستہ پرویز ایم این اے اور صدر کلچرل ونگ پنجاب مسز نسرین اختر نمایاں تھیں جبکہ وحید گل ایم پی اے فیصلہ سن کر بے ہوش ہوگئے۔

(جاری ہے)

انہیں سروسز ہسپتال لے جایا گیا جہاں ان کا بلڈپریشر خطرناک حد تک ہائی پایا گیا۔ مسلم لیگی رہنماؤں خواجہ احمد حسان،خواجہ عمران نذیر،ڈپٹی میئر میاں طارق اور لیگیوں کا ان کی عیادت کیلئے ہسپتال میں تانتا بندھا رہا۔ فیصلے کے بعد قومی اسمبلی کے حلقوں میں مختلف چوراہوں پر کارکن نکل آئے اور فیصلے کے خلاف احتجاج کیا۔ مسلم لیگ (ن) لاہور کے صدر محمد پرویز ملک، رکن اسمبلی شائستہ پرویز ملک، جنرل سیکرٹری خواجہ عمران نذیر، سید توصیف شاہ، دپٹی میئر نذیر خان سواتی، میاں طارق، عمران گورایا سمیت دیگر لیگی رہنماؤں نے وزیر اعظم کے خلاف نااہلی کے فیصلے پر پارٹی دفتر میں ہنگامی اجلاس سے خطاب کرتے ہوئے کہا پارٹی کی طرف سے احتجاج کے لئے کوئی کال نہیں دی گئی تھی کارکن اپنے قائد سے محبت کا اظہار کے لئے باہر آئے ہیں، انہوں نے کہا تاحیات نااہلی کے فیصلے سے انتقام کی بو آرہی ہے اور یہ سمجھ سے بالاتر ہے ، تاحیات نااہلی کا فیصلہ قوم کبھی قبول نہیں کرے گی۔

اس موقع پر عبدالوحید، عامر خان،چوہدری عبدالمجیدچن نمبردار، رانا احسن شرافت، نسیم بانو، سمیرا امجد، ثمرہ نذیر،سمیت دیگر کثیر تعداد میں چیئرمین وکارکن اور عہدیداروں کی تعداد موجود تھی۔ موہنی روڈ سے چیئرنگ کراس تک صوبائی وزیر بلال یسٰین اور چیئرمین قیصر امین بٹ کی قیادت میں نکلنے والی ریلی کے اختتام پر کارکنوں سے خطاب میں بلال یسین نے مطالبہ کیا جن لوگوں کے پانامہ لیکس میں نام ہیں ان سب کے خلاف بلا تفریق کاروائی ہونی چاہیے تب ہم سمجھیں گے انصاف کا بول بالا ہوگا۔

کارکنوں کے طرف سے قیادت کے حق میں نعرے بازی بھی کی گئی۔لبرٹی چونک میں خطاب کرتے ہوئے خواجہ عمران نذیر نے کہا نواز شریف عوامی لیڈر ہیں اور 18کروڑ عوام کے اب بھی وزیراعظم ہیں، انہیں عوام کے دلوں سے کوئی نہیں نکال سکتا۔ اس موقع پر دونوں پارٹیوں کے کارکنوں نے لاتوں ،مکوں اور لاٹھیوں کا آزادانہ استعمال کیا جس سے دونوں پارٹیوں کے تین کارکن زخمی ہوگئے۔

ادھر مسلم لیگ ن کے کارکن لبرٹی مارکیٹ،داتا دربار، شاہدرہ، لاہور پریس کلب باہر ، ٹھوکر نیاز بیگ ودیگر مقامات پر نکل آئے انہوں نے نوا ز شریف کے حق میں نعرے بازی کی۔ سڑک پر ٹائر جلا کر ٹریفک معطل کر دی۔ عوامی تحریک کا دفتر سیکرٹریٹ گونواز گو کے نعروں سے گونج اٹھااور کارکنوں نے مٹھائیاں بانٹیں اور نواز شریف کیخلاف نعرے لگائے۔
تحریک انصاف کے چیئرمین سیکرٹریٹ اور لاہور آفس میں جشن منایا گیا، کارکنوں نے ڈھول کی تھاپ پر بھنگڑے ڈالے ،مٹھائیاں تقسیم کیں اور ایک دوسرے کو مبارکباد دیں۔

سپریم کورٹ کے فیصلے سے قبل ہی ماڈل ٹاؤن سیکرٹریٹ میں بڑی سکرین نصب کرکے فیصلے سننے کا اہتمام کیا گیا تھا۔ صدر لاہور تحریک انصاف ولیداقبال ،میاں حماد اظہر سمیت دیگر مرکزی اور بانی اراکین اس موقع پر موجود تھے۔
تحریک لبیک یارسول کے سربراہ اور تحریک صراط مستقیم کے بانی ڈاکٹر محمد اشرف آصف جلالی کی اپیل پر ملک بھر میں میاں نواز شریف کے نااہل ہونے پر نماز جمعہ کے بعد شکرانے کے نوافل ادا کئے گئے، مٹھائیاں تقسیم کی گئیں۔

مسلم لیگ ن کے حامی میاں نواز شریف سے اظہار یکجہتی کے لئے لاہور ہائیکورٹ کے گیٹ سے جی پی او تک ریلی نکالی اور نواز شریف کے حق میں نعرے لگائے۔ سپریم کورٹ کے فیصلے کے حق میں لاہور ہائیکورٹ بار نے بارروم سے جی پی او چوک تک ریلی نکالی ، صدر لاہور ہائیکورٹ بار چوہدری ذوالفقار علی اور سیکرٹری سپریم کورٹ بار آفتاب باجوہ نے فیصلے کے حق میں مشترکہ پریس کانفرنس کرتے ہوئے پانامہ کیس کے فیصلے کو تاریخی قراردیا ۔

لاہور ہائیکورٹ بار میں وکلا نے خوشی کا اظہار کیا اور ”گونواز گو“ کے نعرے لگائے ‘ وکلا نے مٹھائی تقسیم کرتے ہوئے ایک دوسرے کو مبارکباد دی۔ پارٹی سمیت دیگر سیاسی جماعتیں خاموش رہیں تاہم شام پانچ بجے کے قریب مسلم لیگ (ن) یوتھ ونگ مرید کے کی طرف سے آفتاب گیلانی، یوتھ کونسلر حافظ حسن سلیمان ، کونسلر شیخ قاسم ریاض ،کونسلرشہباز احمد ورک کی قیادت میں جی ٹی روڈ پر ٹائر جلا کر ٹریفک بلاک کردی گئی۔

کاہنہ میں مسلم لیگ ن کے کارکن رانا مبشر اقبال کی قیادت میں اکٹھے ہوگئے اور نواز شریف سے اظہار یکجہتی کرتے ہوئے فیروز پور روڈ پر آگئے اور ان کے حق میں شدید نعرے بازی شروع کردی کارکن تقریبا دو گھنٹے تک فیروز پور روڈ پر نعرے بازی کرتے رہے۔ مسلم لیگ ن کے مشتعل کارکنوں نے شاہدرہ چوک بلاک کرکے ٹائر جلائے جس کے باعث کاروں کی قطاریں لگ گئیں۔

ایمبولینس گاڑیاں بھی پھنس گئیں۔ تحریک انصاف کی جانب سے مرکزی سیکرٹریٹ میں شکرانے کے نوافل ادا کئے گئے مٹھائی تقسیم کی گئی اور بھنگڑے ڈالے گئے۔
کاروباری برادری نے عدلیہ کی جانب سے پاناما کیس پر فیصلے پر ملے جلے ردعمل کا اظہار کیا ہے۔ ایف پی سی سی آئی کے نائب صدروریجنل چیئرمین منظور الحق ملک کہا عدلیہ کو خراج تحسین پیش کرتے ہیں۔

ثابت ہوگیا کہ عدلیہ طاقتور کا احتساب بھی کرسکتی ہے ۔ مسلم لیگ (ن)ٹریڈرزونگ پنجاب کے سینئر نائب صدر خواجہ خاوررشید نے کہا کہ وزیراعظم کو پانامہ کیس میں سزا نہیں ہوئی اور ان پر کوئی کرپشن ثابت نہیں ہوئی۔ وزیراعظم کو سی پیک پاکستان میں لانے کی سزا ملے گی۔ صدر آل پاکستان انجمن تاجران اشرف بھٹی نے کہا کہ عدلیہ کے فیصلے کا احترام کرتے ہیں لیکن وقت بتائے گا کہ فیصلہ درست تھا کہ نہیں ۔

انہوں نے کہا کہ نواز شریف عوامی لیڈر ہیں انکو عوام نے منتخب کیا تھا انہیں عوام کے دلوں سے کوئی نہیں نکال سکتا۔ صدر آل پاکستان انجمن تاجران خالد پرویز نے کہا ہے کہ تاجروں کو ٹیکس چور سمجھنے والے وزیر خزانہ اسحاق ڈار خود ٹیکس چوری پر سپریم کورٹ سے نااہل ہوگئے ہیں یہ چھوٹے تاجروں کی بددعائیں ہیں جو رنگ لائی ہیں۔