تجدیدِ درس ہے اک کربلا

کربلا ہار جیت نہیں ہے ۔ یہ تو وہ ریت ہے جو امام حسین نے قرباں ہو کے آنے والوں کے لئے مثالی بنا دی ہے ۔ کربلا تو ایک درس ہے جو ہر برس اس زخم کو تازہ کرتا ہے جس پہ عرش بھی مغموم ہے اور زمین کا فرش بھی ۔ کربلا سر کٹانے کا نہیں سر حق کے لئے نیزے پہ چڑھانے کا نام ہے ۔ کربلا میدان نہیں بلکہ پردہ قرطاس پہ نمایاں وہ داستان ہے جس میں آل نبی نے ہر ذرے کا اپنے لہو سے منہ دھلایا ہے۔

سورج کی کرنوں کو گواہ بنایا ہے کہ جب مقتل سجتا ہے تو قربانی کے لئے ہمیشہ شاہ ہی آگے بڑھ کے عظمتوں کے مینارہ بنتا ہے ۔ ان کی شان و شوکت تو ایسی ہوتی ہے کہ ہر کوئی کہتا ہے کہ نوک نیزہ پہ سج کے نکلا ہے جو وہ کسی سردار کا سر لگتا ہے اور ہر دل کی آواز پہ یہ ہی دھڑکتا ہے ۔
حسین کی قربانی آج یہ بھی سبق پڑھاتی ہے کہ ضروری نہیں کہ اکثریت راہ باطل پہ قدم بڑھاتی قابل تقلید ہوتی ہے بلکہ ان کا رستہ روکنا ہی وہ جہاد ہے جو جانوں سے کیا جاتا ہے اور جابر کے سامنے حق کا نعرہ ہی بہادروں کا شعرہ ہوتا ہے ۔

(جاری ہے)

ایک طرف یہ تجدید ہے اس قربانی کی جو حضرت اسماعیل علیہ السلام نے دی تو دوسری طرف یہ حضرت نوح علیہ السلام کی اس سنت کی تکرار ہے کہ خدا کی راہ میں ہستیاں دیکھی جاتی ہیں – بندوں کی تعداد سچ جھوٹ کا فیصلہ نہیں کرتی ہے-
 قربانی و ایثار کا جذبہ ان کے خیموں میں نمو پاتا ہے جن میں بھوک ہے پیاس ہے اور صرف ایک آس ہے کہ خدا کے سامنے جب حاضر ہوں تو قدموں میں استقامت ہو ۔

سینے چھدے ہوں لیکن چہروں پہ نہ ندامت ہو ۔ حضرت امام حسین کے لئے بھی کسی سرحدی ملک میں چلے جانے پہ اصرار تھا اور حسین کی جان کو امان تھی لیکن اس دن اگر حسین جھک جاتے تو تا قیامت باطل حق کو یونہی جھکاتا- بے شک حسین وہ ہے جو دہکتی آگ کے شعلوں پہ سویا، جس نے اپنے خون سے عالم کو دھویا، جو جواں بیٹے کی میت پر نہ رویا ۔ وہ جس نے سب کچھ کھو کے پھر بھی کچھ نہ کھویا بلکہ حسین تو وہ جوانوں کا سردار ہے جو حوض کوثر کی سرکار ہے وہ ہونٹوں پہ پیاس سجائے سب کو آب بقا پلاتا ہے ۔

آنے والے شہیدوں کو اپنے بازوں میں سجاتا ۔ فخر سے سر اٹھاتا رب کے حضور پیش کر کے فخر سے دہراتا ہے کہ اے رب ذوالجلال یہ ہے وہ نڈر جو تیرے حضور میں تیری رضا بجا لاتا ہے ۔ وہ زمین پہ بستے ہر پیر و جواں کا حوصلہ یوں بڑھاتا ہے
سانحہ کربلا دین اسلام کی وہ گھڑی ہے جو کہتی ہے حق و سچ اپنا آپ منواتا ہے- امام حسین رضی اللہ عنہ کو کربلا تک لے آنے والا حر بن یزید ریاحی اس سچائی کی چٹان کے سامنے سر نگوں ہوا اور عمر بن سعد سے کہنے لگا کہ سانچ کو آنچ نہیں
غرض کربلا تو سارے کا سارا وہ درس ہے جس کو سمجھنے میں امت محمدی صلی اللہ علیہ وسلم کی سرفرازی و سر بلندی ہے ۔

ہر سال تاریخ اسے دہراتی اور ہمیں سکھاتی ہے