صحافت اور پاکستان میں صحافت

صحافت کو کسی بھی ملک میں ایک اہم ستون سمجھا جاتا ہے صحافت عوام کو باخبر رکھنے میں اولین درجہ رکھتی ہے صحافی چاہے تو عوام صحیح اور بر وقت خبریں حاصل کر سکتی ہے اور اگر وہی صحافی چاہے تو عوام جھوٹی خبروں کا شکار ہو جاۓ اس طرح صحافت عوام کی ذہن سازی میں اہم کردار ادا کرتی ہے
ایک صحافی کا کام خبر حاصل کرنے کے بعد اس میں کوئی تبدیلی کیے بغیر عوام تک پہنچانا ہوتا ہے یعنی وہ اس میں کسی قسم کا ایسا اضافہ یا کمی نہیں کر سکتا جس سے عوام کے سامنے سچ چھپ جائے صحافت نام ہے جھوٹ روکنے کا
 اگر کوئی صحافی جھوٹ پھیلاتا ہے تو اسے پتا ہونا چاہیے کہ وہ صحافت نہیں کر رہا بلکہ جھوٹ کی ترویج کر رہا ہے اور یہ اس کے پیشہ کے منافی ہے
صحافی کا کام اپنی خبر کو اپنی مرضی اور خواہش سے بالاتر رکھنا ہوتا ہے اگر خبر میں خواہش شامل ہو جاۓ تو خبر دم توڑ جاتی ہے خواہش حاوی ہو جاتی ہے اور خواہش کا خبر پر حاوی ہونا صحافت کی موت ہوتا ہے صحافت کی موت صحافی کی صلاحیتوں کی موت ہوتی ہے اس طرح صحافت اور صحافی دونوں معیار سے گر جاتے ہیں
دنیا بھر میں جتنے بھی نامور صحافتی ادارے ہیں ان کی پہچان یہی ہے کہ وہاں موجود صحافی خبر کو خواہش سے زیادہ فوقیت دیتے ہیں ان کے لیے خبر زیادہ اہم ہوتی ہے اور یہی جذبہ ان کے کام کو عظیم بنا دیتا ہے اور وہ بغیر ہچکچاہٹ کے آگے بڑھتے ہیں اور دنیا بھر میں اپنا لوہا منواتے ہیں
ساتھ ہی دنیا میں کچھ صحافی"ڈیپ پاکٹس" کے نام سے جانے جاتے ہیں وہ صحافی بد دیانتی کی اعلیٰ مثال ہوتے ہیں وہ خبر پر ذاتی خواہشات کو فوقیت دیتے ہیں امراء اور کرپٹ سیاست دان ان کا استعمال کر کے من پسند خبریں اور تجزیہ حاصل کرتے ہیں اس ضمن میں استعمال ہونے والے لوگوں کو صحافی کا نام نہیں دیا جا سکتا ایسے لوگ صحافت کے نام پر دھبہ ہوتے ہیں
جب بات پاکستان میں صحافت کی ہو تو یہاں کئی دوسرے شعبوں کی طرح صحافت بھی زوال ترین ہے یہاں صحافت بڑے بڑے لوگوں کی لونڈی بن چکی ہے صحافت بک رہی ہے ایسی بھی ویڈیوز سامنے آئیں کہ پروگرام کے بیچ میں اینکرز کو کالز آرہی ہیں کہ ملک صاحب (ایک مشہور بزنس ٹائیکون) سے ایسے سوال نہ کریں جن کا جواب ان کے پاس ہو اس کے علاوہ ایسی کال ریکارڈنگز بھی لیک ہو چکی ہیں جن میں صحافی حضرات مشہور سیاستدانوں سے ہدایت لے رہے ہوتے ہیں پاکستان میں صحافیوں کے سب سے مشہور گروہ کو لفافہ گروپ یا واٹس ایپ گروپ کہا جاتا ہے یہ ایسا گروپ ہے جو لفافہ لے کر واٹس ایپ پر چند لوگوں (کرپٹ سیاست دانوں) سے ہدایت لیتے ہیں اور جیسا ان کا ایجنڈا ہو اسے میڈیا میں لاتے ہیں اور کوشش کرتے ہیں اسے لوگوں کے ذہن میں رچا بسا دیں لیکن وہی چند ایک ایسے بھی صحافی ہیں جو اپنی روزی اپنی زندگی کو خطرہ میں ڈال کر لوگوں تک حقیقی خبریں پہنچاتے ہیں اور درحقیقت یہی وہ لوگ ہیں جن کی وجہ سے صحافت کی لاج باقی ہے یہی وہ لوگ ہیں جو صحافت کا فخر ہیں ان میں سے کئی لوگ اپنی جانیں پیش کر چکے ہیں ان کے خون سے صحافت سیراب ہوئی ہے یہی لوگ ہیں جن کی وجہ سے لوگوں کا صحافت پر یقین باقی ہے
اس ساری گفتگو کا یہی نتیجہ اخذ کیا جاسکتا ہے کہ ہر شعبے کی طرح صحافت میں بھی اچھے برے دونوں طرح کے لوگ ہیں یہاں بھی کالی بھیڑیں موجود ہیں اور یہی پر حق اور سچ کے لیے ڈٹ جانے والے بھی موجود ہیں لیکن اس شعبہ میں بہتری کے لیے نوجوان نسل کو آگے آنا ہو گا وہی اس شعبے میں تبدیلی لا سکتی ہے۔