سیاست میں شائستگی

سیاست اور اخلاقیات کا چولی دامن کا ساتھ ہے سیاست دان قوم کے نمائندے ہوتے ہیں انہیں اپنے اخلاق سے ثابت کرنا ہوتا ہے کہ وہ ایک مہذب قوم کے نمائندے ہیں ان کے الفاظ قوم کے جذبات ہوتے ہیں لہذا بولتے ہوئے شائستگی کے پہلو کو مدنظر رکھنا ان کے لیے لازمی ہوتا ہے
سیاست دان کو ووٹ دینے کی ایک وجہ یہ بھی دیکھی جاتی ہے کہ وہ کتنا خوش اخلاق اور اچھا بولنے والا ہے کسی بھی شخص کی زبان اس کی تربیت کا پتہ دیتی ہے کیوں کہ بولنا گھر والوں سے سیکھا جاتا ہے جس طرح گھر والے بولتے ہیں اس کا بچے پر گہرا اثر ہوتا ہے اسی طرح جب ایک لیڈر بولتا ہے تو اس کے پیروکار اس کو سنجیدگی سے لیتے ہیں اس لیے ایک سیاستدان کی زبان اس کے راہنماء کا پتا دیتی ہے
جب قوم کا نمائندہ گری ہوئی زبان استعمال کرے گا تو اس کا اثر قوم پر بھی پڑے گا ایسا نہیں ہو سکتا کہ قوم کا نمائندہ گفتگو کرے اور اس کا قوم پر اثر نہ ہو بالکل اسی طرح اگر قوم کا نمائندہ شائستہ زبان استعمال کرے گا تو اس کا اثر بھی قوم پر آۓ گا
لیکن کیا آج سیاست دان بولتے ہوئے شائستگی کا خیال رکھتے ہیں؟ یہ ہمارا آج کا موضوع ہے افسوس کے ساتھ کہنا پڑتا ہے کہ سیاست میں اخلاقیات کا فقدان پیدا ہو چکا ہے ہماری سیاسی جماعتوں کے بعض راہنماء آج اخلاقیات سے عاری زبان استعمال کرنے میں لگے ہوئے ہیں وہ چاہتے ہیں کہ وہ جو بولیں اسے صحیح بولا جاۓ اگر ایسا نہیں ہوتا تو وہ جو چاہیں زبان استعمال کریں آج بات اس حد تک جا پہنچی ہے کہ بات کی بجائے ہاتھ چل جاتے ہیں وہ بھی پارلیمنٹ میں چاہے کوئی سابق وزیر ہو یا موجودہ اس بات کا دھیان نہیں رکھتا کہ اس کے ہر عمل سے قوم کو ایک سبق جاۓ گا اگر وہ غیر شائستہ زبان استعمال کرتا ہے تو ظاہر ہے قوم کو منفی سبق جانا ہے لیکن اس بات کو سوچنے کی بجائے وہ اپنے مقصد میں لگے ہوتے اور وہ مقصد ہوتا ہے کہ بس میں سامنے بیٹھے شخص پر چڑھائی کر دوں بھلے کچھ بھی بولنا پڑے اس دوران وہ زبان کی شائستگی پر سمجھوتہ کر جاتا ہے
سیاست میں اخلاقیات کا معیار دن بدن گرتا جا رہا ہے کوئی سیاست دان کسی کو گالی دے رہا ہے تو کوئی کسی کو سرعام تھپڑ مار رہا ہے کسی سیاست دان کی نازیبا ویڈیو آ جاتی ہے اس سب سے ہمارے نوجوان براہ راست متاثر ہو رہے ہیں کیوں کہ جنہوں نے ان کے لیے عملی نمونہ بننا تھا وہ اخلاقیات کا خیال ہی نہیں رکھ رہے
لیکن جہاں غیر شائستہ زبان بولنے والے سیاستدان ہیں وہی زبان سے نکلنے والے الفاظ کو شائستگی میں ڈھالنے کا ہنر رکھنے والے سیاستدان بھی موجود ہیں یہ کم لیکن مؤثر سیاست دان ہیں یہ عوام کے سامنے اپنی رائے بہترین انداز میں رکھنے کا ہنر جانتے ہیں درحقیقت یہی وہ لوگ ہیں جن کی وجہ سے سیاست کا مثبت چہرہ بھی عوام کے سامنے ہوتا ہے لیکن یہ بہت کم ہیں کیوں کہ اکثریت وہی ہے جو اپنی بات منوانے کے لیے کسی بھی حد تک گری ہوئی زبان استعمال کر سکتے ہیں
اس امر کی اشد ضرورت ہے کہ اچھا بولنے والے سیاستدانوں کو آگے لایا جائے اور جو سیاست دان گری ہوئی زبان استعمال کرے اس کا پارٹی چیئرمین اسے پارٹی سے نکالے کیوں کہ جب تک قوم کے نمائندے ایسی زبان استعمال کریں گے نوجوانوں کی سیاسی تربیت ممکن ہی نہیں نوجوان جو دیکھے گا وہی سیکھے گا اس لیے نوجوانوں کے سیکھنے کے لیے قائدانہ صلاحیتوں سے معمور سیاستدانوں کو آگے لایا جائے تا کہ مستقبل میں شائستہ زبان استعمال کرنے والے سیاستدان آ سکیں۔