الٰہ دین کاچراغ

الٰہ دین کے چراغ کے حیرت انگیزکارناموں سے ساری دنیاواقف ہے لیکن کہانیوں کے علاوہ حقیقی شکل میں آج تک کسی نے اسے نہیں دیکھا لیکن آپ پریشان نہ ہوں ہم آپ کی یہ خواہش بھی پوری کیے دیتے ہیں آپ سوچ رہیں ہوں گے کہ اس کے لئے ہمیں کوہ کاف کی پہاڑیوں پرجانا پڑے گایاکسی بوسیدہ غاریاویران قبرستان میں مہینوں چِلّے کاٹنے پڑیں گے توایسابالکل نہیں اس لئے کہ وقت کے ساتھ ساتھ الٰہ دین کے چراغ نے بھی خودکوتبدیل کرلیاہے اب وہ انسانوں کی دنیامیں ہی رہتاہے اوراس میں ہرگذرتے دن کے ساتھ جدت آتی چلی جارہی ہے وہ انسانوں سے بہت مانوس ہوچکاہے کیونکہ وہ جانتا ہے کہ دورحاضر کاانسان بہت کمزورہے وہ کسی دیوہیکل جن کودیکھناتودورکی بات اس کے تصور سے بھی کانپ اٹھتا ہے توآیئے ہم آپ کوآج الہ دین کے چراغ کاپتہ بتلائے دیتے ہیں اس کے لئے آپ ایک لمحہ کے لئے اپنی آنکھیں بندکریں اوراپنی جیب میں ہاتھ ڈالیں اوراس میں پڑے ہوئے موبائل کونکالیں اوراس کے بعداس کے اوپراپنی انگلیوں کوپھیریں اوراسکے کرشمات دیکھتے چلے جائیں جی دوستوبالکل آج کاموبائل وسوشل میڈیا الٰہ دین کے چراغ سے بھی کئی گنازیادہ ہوش رُباطلسمات کامجموعہ ہے اوراس نے پوری دنیاکے ہرباشندے کواپنے سحرمیں مدہوش کیاہواہے دیودیرک قولمین اپنی کتاب سوشل نامکس میں لکھتے ہیں کہ ہرپانچ لوگوں میں سے ایک کاتعلق انٹرنیٹ ہے کی وجہ سے بنتا ہے۔

(جاری ہے)

ایک ریسرچ کے مطابق صرف فیس بک صارفین کی تعداددنیاکے تیسرے بڑے ملک کی آبادی کے مساوی ہے۔سوشل میڈیاہماری روزمرہ زندگی میں ایک جزولاینفک بن چکاہے جس کاجادوسرچڑھ کربول رہاہے۔یہ ایک طلسم ہوش رُباہے کہ جس کی سحرانگیزی نے فقیروں کوبادشاہ اورشاہوں کوگدابنادیا،پلک جھپکنے میں عزت داروں کی پگڑیاں اُچھالیں توکہیں ذلت کی اندھیرنگری سے نکال کرشرافت کاتاج پہنادیا۔

وہ الٰہ دین کاچراغ جسے آج کی دنیاسوشل میڈیاکے نام سے پکارتی ہے آیئے اس کے طلسماتی جوہرکاجائزہ لیتے ہیں ۔ سوشل میڈیاکی مددسے دنیاگلوبل ویلج کی شکل اختیارکرچکی ہے سینکڑوں میل دورہوتے ہوئے بھی رابطہ باہمی کی وجہ سے ہم ایک دوسرے سے بہت قریب ہوچکے ہیں۔اس کی مددسے جدیدٹیکنالوجی کوعمل میں لاتے ہوئے بیروزگاری کے ناسورکوختم کیاجاسکتاہے جیساکہ یوٹیوب چینل اکاونٹ کی مددسے آپ اپنے شوق کی تسکین کیساتھ خاطرخواہ پیسے بھی کماسکتے ہیں۔

اس کی ایک بہت بڑی سہولت کے اس کی مددسے آپ خودکومتعارف کرواسکتے ہیں۔آپ کے پاس تحریروتقریرسمیت کوئی بھی ہنرہے تواس کے لئے آپ کے لئے بہت سی راہیں ہموارہیں۔ایک وقت تھاکہ لوگ اپنی تحریرکوچھپوانے کے لئے صرف اخبارات وجرائد تک محدودتھے اورانکی اشاعت وترسیل میں خاصی مشکلات تھیں لیکن سوشل میڈیانے اس مسئلہ کو بھی بہترطریقہ سے حل کردیا۔

فیس بک ،ٹویٹرکی مددسے ہم اپنی تحریرکوباآسانی دسروں تک پہنچاکرپذیرائی حاصل کرسکتے ہیں۔ہمارے پیارے رسول حضرت محمدصلی اللہ علیہ وسلم کا ارشادہے کہ خوشخبری ہے ایسے شخص کے لئے جس کواللہ تعالی خیرکے لئے چابی بنائے۔مطلب وہ نیکی کوپھیلانے کاذریعہ بنے اس حدیث مبارکہ کی روسے ہم سوشل میڈیاپراگرکوئی اچھی بات شئیرکرتے ہیں توجتنے لوگ اس کوپڑھتے یاسنتے ہیں توجہاں ان سینکڑوں لوگوں کو اس کا اجرملتاہے وہیں شئیرکرنے والا ان سب کے ثواب میں برابرکا شریک ہوتاہے۔

فیس بک کے ذریعے ہم اپنے بچھڑے ہوئے دوستوں کوبھی ڈھونڈنکال سکتے ہیں۔اوران سے اپنے دْکھ سْکھ شئیرکرکے اپنے دل کا بوجھ ہلکا کرسکتے ہیں۔ واٹس اپ، میسنجردیگرٹولزکے ذریعہ مختلف اداروں میں کام کرنے والے لوگ مختلف واٹس اپ گروپس کے ذریعہ ایک دوسرے سے نہ صر ف رابطہ میں رہتے ہیں بلکہ پی ڈی ایف کتابیں اورڈاکومنٹس بھی شئیرکرسکتے ہیں۔
ای میل کے ذریعے ہم اپنی قیمتی دستاویزات ،مقالہ جات ،اسائنمنٹس ،تصاویر،اوربہت سارے ضروری کاغذات بہت ہی مختصروقت میں اپنے دوستوں کو بھیج سکتے ہیں۔

سوشل میڈیاکے ذریعہ مظلوم ومقہورستم زدہ لوگ ارباب حل وعقدتک اپنے مسائل کی شنوائی کرسکتے ہیں اورایسے بیسیوں واقعات ہیں کہ سوشل میڈیا پروائرل ہونے والی خبرو ں اورویڈیوزکی بدولت حق سے محروم کو اس کاجائز حق مل گیا۔
ا س الٰہ دین کے چراغ کااگرغلط استعمال ہواتواس کے نقصانات فوائدپرغالب آجائیں گے لہذان سے احترازبھی ضروری ہے مثلا
سوشل میڈیا پرجہاں سچ پرمبنی تحقیقی رپورٹس شائع ہوتی ہیں وہیں جھوٹی اوربے بنیادباتوں کاچرچااس سے بھی کئی گْنازیادہ دیکھنے میں آتا ہے حالانکہ ہمارے پیارے نبی صادق الامین صلی اللہ علیہ وسلم کا ارشادہے کہ آدمی کے جھوٹاہونے کے لئے یہی کافی ہے کہ وہ ہرسنی سنائی بات کو بغیرتحقیق کے بیان کردے۔

اسکے ذریعہ سے شریف وسفیدپوش لوگوں کو بلیک میل کیاجانامعمول بنتاچلاجارہاہے ان کوجھوٹے الزامات کی آڑمیں ذلیل ورسواکیا جاتا ہے۔وقت ایک انمول دولت ہے لیکن بدقسمتی سے سوشل میڈیاکے ذریعہ سے اس کا بے دریغ استعمال کیا جاتا ہے اوربہت ساراوقت فضول وبے معنی چیزوں کی نشرواشاعت میں ضائع کردیاجاتا ہے۔نوجوانوں کے اندربے راہ روی اورفحاشی وعریانی کا عنصربڑھتا چلاجارہاہے کم عمری اورناتجربہ کاری کی وجہ سے وہ اپنے ہاتھوں اپنے پاوٴں پرکلہاڑی ماررہے ہیں۔

طالبعلموں کے لئے زمانہ طالبعلمی میں بغیرضرورت شدیدہ کے سوشل میڈیاکااستعمال انکی پڑھائی کے راستے میں بہت بڑی دیوارثابت ہوسکتا ہے۔نوجوان لڑکے اورلڑکیوں میں سوشل میڈیاکے ذریعہ سے ہونے والے روابط کی وجہ سے نا صرف انکو بلکہ انکے والدین کو بھی رسوائی کا سامنا کرنا پڑتا ہے۔الٰہ دین کاچراغ دورحاضرکاجدید ومئوثرترین طلسم ہے لیکن اس سے فائدہ وہی اٹھاسکتاہے جواس کااستعما ل جانتاہواس لئے اس کامثبت استعمال کریں اوراپنے مَن کی ہردلی مرادپوری کریں۔