اِنصاف کی چھلنی

انسان کے پاس جب طاقت ہو تو اُس سے یقینی طور پر کچھ ایسے فیصلے، اقدامات، حکم سرزد ہو جاتے ہیں کہ جو طاقت کی چکا چوند ختم ہوتے ہی اس کے سر پڑ جاتے ہیں۔ یہاں دو باتیں نہایت اہم ہیں کہ اگر آپ نے گناہ کیا ہے اور پکڑ میں آ گئے ہیں تو یقینی طور پر یہ پکڑ نفسیاتی حوالے سے آپ کو زندگی کی دوڑ میں دوبارہ لانے کے لیے نہایت اہم ہوتی ہے ۔

دوسر، اگرا آپ گناہگار ہیں اور پکڑ میں آ گئے ہیں تو وقت کا پہیہ جیسے جیسے گھومتا جاتا ہے آپ نہ صرف اپنی غلطیوں سے سبق سیکھتے ہیں بلکہ یہی بے جرم سزا آپ کی شخصیت میں حیران کن طور پر ایک مثبت تبدیلی لے کے آتی ہے اور آپ ایک مضبوط شخصیت کے طور پہ اُبھرتے ہیں۔ بے شک اس سے بہت سوں کو اختلاف بھی ہو گا لیکن حقیقتاً ان دونوں صورتوں کا جائزہ لیجیے تو کیا ہمارے ارد گرد ایسے ہی حالات کا ہم منظر نہیں دیکھ رہے؟
نواز شریف کو پہلی دفعہ جب اڈیالہ جیل روانہ کیا گیا تو مخالفین اپنے نشتر ان کو بطور مجرم سمجھ کے ان کی ذات کے بخیے ادھیڑنے کے لیے برسا رہے تھے تو حواری ان کی قید و بند کی صعوبتوں کو یاد کر کے گریہ کر رہے تھے۔

(جاری ہے)

اُس وقت بھی قلم کی نوک میں، کچھ اپنی رو میں لکھنے والے، لکھ گئے کہ یہ سزا بہر حال دونوں حوالوں سے نواز شریف کو تبدیل کرنے کا باعث بن سکتی ہے۔ ہم یہ تصور کیے بیٹھے ہیں کہ ایک سو تیس مرتبہ احتساب عدالت میں پیشی اور پھر دوسری مرتبہ نواز شریف کو جیل کا پروانہ تھما دینا صرف ایک فریق کی فتح اور ایک فریق کی شکست پہ مبنی ہے۔ لیکن اگر ہم حقیقتاً جائزہ لیں تو یہ در اصل ایک نظام کی فتح اور انا کے بت کی شکست ثابت ہو رہا ہے۔

آپ دیکھیے اس ملک کی روایت رہی ہے کہ یہاں انصاف بے اولاد تھالیکن نواز شریف ، جو اس ملک کے وزیر اعظم رہ چکے ہیں، انہوں نے تاریخ کے برعکس نہ صرف وطن واپس آنے کو ترجیح دی بلکہ حالات کا سامنا بھی کیا۔ اور دوسری مرتبہ سزا پا کے بھی وہ اپنے لہجے میں ایک ٹھہراؤ رکھے ہوئے ہیں۔ اور ان کے زمانہ ء ضمانت میں بھی ان کے لہجے میں نہ تو وہ ترشی دیکھنے میں آئی نہ جی ٹی روڈ والا گرجدار تکبر تھا۔

اس کو آپ مثبت پیرائے میں کیوں لینا گوارا نہیں کر رہے کہ ایک اتنا بڑا راہنما ملکی نظام عدل کے سامنے بذات خود پیش ہونے آیا اور الزامات کا سامنا بھی کر رہا ہے؟ اور نواز شریف جیسی قد آور سیاسی شخصیت اگر خود کو نظام ِ عدل کے تابع کر رہی ہے تو آپ اس کو دوسرا رخ کیوں دینا چاہ رہے ہیں؟ دوسری جانب نواز شریف کے لیے لمحہ فکریہ بھی ہے اور مقامِ فرد شناسی بھی کہ کون اس کڑے وقت میں کھڑا رہا اور حقیقی ساتھی ہے ،جب کہ کون موسمی پنچھی ثابت ہوا اور زبانی دعووں کا شہسوار نکلا۔

اسی کے ساتھ ضمنی حوالے سے نواز لیگ کے حواری اس پوری کاروائی کو اپنے قائد کے خلاف انتقامی کاروائی ثابت کرنے پہ کیوں تلے ہوئے ہیں۔اُن کو تو بہر حال خوش ہونا چاہیے کہ جس طرح فلیگ شپ ریفرنس سے نواز شریف بری ہوئے تو اللہ کرئے کہ مستقبل قریب میں وہ وہ باقی الزامات سے بھی پیچھا چھڑائیں۔ اور شو مئی قسمت اگر الزام جرم ثابت بھی ہو تو کم از کم وہ اپنے کیے کی سزا بھگتنے کے بعد ہمیشہ کے لیے بری الذمہ تو ہو جائیں گے۔

ہاں یہ بہر حال ووٹر پہ ہے کہ جرم ثابت اگر ہو تو سزا بھگتنے کے بعد وہ نواز شریف سے سوال کرنے کا حق بہر حال رکھتے ہیں اور اگر غلطی کا ازالہ کرنا چاہیں تو عوام انہیں موقع دے سکتی ہے اور اگر وہ ہٹ دھرمی سے میں نا مانوں کی رٹ پہ قائم و دائم رہیں تو فیصلہ بہرحال عوام کے ہاتھ میں ہے پھربھی۔ اس سزا سے ابھی تک کیا پایا نواز شریف نے؟ آپ دیکھیے جی ٹی روڈ بیانیہ جو ملک کے لیے خطرناک تھا وہ معدوم ہوا، یہ نواز شریف کی ذات میں بہت بڑی تبدیلی ہے اور عوام کے دل میں کسی نہ کسی وقت یہ نقطہء ان کے حق میں جائے گا۔

اس پورے قصے میں بیگم کلثوم نواز کی علالت، اور پھر ان کا انتقال ہونا، حیران کن نہیں کہ نواز شریف نے اس پورے معاملے کو پوائنٹ اسکورنگ کے لیے استعمال نہیں کیا؟ کیا آپ کے نزدیک بطور انسان نواز شریف کا تبدیل ہوتا یہ رویہ مملکت کے مفاد میں نہیں ہے؟ اس پورے کیس میں دوسرا مثبت پہلو تلاش کیجیے کہ ہمارے حال و مستقبل کے حکمران خیانت کرتے ہوئے ہزار بار شاید سوچنا شروع کر دیں کہ اس ملک کا نظام عدل اتنا طاقتور ہو رہا ہے کہ وہ کسی کو بھی کٹہرے میں لا کھڑا کر سکتا ہے۔

جب ایک سابق وزیر اعظم انصاف کی چھلنی سے گزر رہا ہے تو باقی کون بچ پائے گا؟ لیکن ہم یہ پہلو بھی نہ صرف سوچنا نہیں چاہتے بلکہ اس سوچ کا رُخ کرنا بھی ہمارے لیے شجرِ ممنوعہ سا ہے۔
نواز شریف ایک مرتبہ پھر پسِ زنداں ہوئے۔ نقارہء انصاف ایک مرتبہ پھر پوری آواز سے بجا ہے ۔ لیکن ہم ان دونوں صورتوں میں مثبیت تلاش کرنے کے بجائے منفی رجحانات کا نہ صرف راگ الاپ رہے ہیں بلکہ ان رجحانات کا جوش و خروش سے پرچار کر رہے ہیں۔

نواز شریف کو سزا و طلبی اس بات کی جہاں دلیل ہے کہ قانون و عدل کا ہاتھ اُن کے گریباں تک بھی پہنچ رہا ہے جنہوں نے خود ساختہ استثنیٰ حاصل کر رکھا تھا تو وہیں یہ تمام عمل اس بات کی بھی واضح دلیل ہے کہ اگر نواز شریف انصاف کی چھلنی سے چھن گئے اور اپنا وجود برقرار رکھا تو ان کا نہ صرف سیاسی قد بڑھ جائے گا بلکہ یقینی طور پر اصلاحی حوالے سے ان کی ذات پہ بھی اس کا مثبت اثر پڑے گا۔