Live Updates

تنہائی اختیار کر کے اللہ سے رجوع کریں، احمد شہزاد

ٹیسٹ کرکٹر نے اپنے سوشل میڈیا پیغام میں قرآن کریم کی آیت کا ترجمہ بھی شیئر کیا

Zeeshan Mehtab ذیشان مہتاب جمعرات مارچ 17:47

تنہائی اختیار کر کے اللہ سے رجوع کریں، احمد شہزاد
لاہور(اردو پوائنٹ تازہ ترین اخبار۔26مارچ2020ء) پاکستان میں کورونا وائرس سے پیدا ہونے والی مشکلات بڑھتی جا رہی ہیں، ایسے میں شہریوں میں آگاہی اور احتیاطی تدابیر پھیلانے میں پاکستان کی شوبز انڈسٹری اور کھلاڑی اپنا بھرپور کردار ادا کر رہے ہیں۔ 28 سالہ قومی کرکٹر احمد شہزاد کا کورونا وائرس سے متعلق کہنا ہے کہ’’اس مشکل وقت میں دنیا سے تنہائی اختیار کر کے اللہ تعالیٰ سے رجوع کریں، ساتھ ہی اللہ سے مدد اور گناہوں کی معافی بھی مانگی جائے۔

احمد شہزاد نے اپنے سوشل میڈیا کے پیغام میں قرآن کریم کی آیت کا ترجمہ بھی شیئر کیا‘‘۔
یاد رہے کہ دنیا بھر میں ہزاروں اموات کا باعث بننے والا مہلک کورونا وائرس پاکستان میں بھی تیزی سے پھیل رہا ہے اور ایک ماہ کے دوران یہاں کیسز کی تعداد 1100 سے تجاوز کرگئی۔

(جاری ہے)

26 فروری 2020ء کو پاکستان میں وائرس کا پہلا کیس سامنے آیا تھا اور آج ایک ماہ مکمل ہونے تک ملک میں کورونا وائرس کے مزید 40 نئے کیسز سامنے آنے سے تعداد 1118 ہوگئی ہے۔

اس عالمی وبا نے دنیا بھر میں تباہی مچا دی ہے اور 21 ہزار سے زائد افراد ہلاک اور 4 لاکھ 74 ہزار سے زائد متاثر ہوچکے ہیں۔پاکستان کے کیسز پر نظر ڈالیں تو اس ایک ماہ کے عرصے میں سندھ میں سب سے زیادہ 421 کیسز رپورٹ ہوئے، جس کے بعد پنجاب کے کیسز کی تعداد 335 ہے۔ بلوچستان میں 131 کیسز اور خیبرپختونخوا میں 121 کیسز ہیں جبکہ اسلام آباد میں یہ تعداد 25 تک پہنچ چکی ہے۔

گلگت بلتستان میں 84 اور آزاد جموں کشمیر میں ایک کیس رپورٹ ہوا ہے۔پاکستان میں کورونا وائرس سے پہلی ہلاک 18 مارچ کو سامنے آئی جبکہ اسی روز دوسری موت کی بھی تصدیق کردی گئی۔ 18 مارچ کو خیبرپختونخوا کے وزیر صحت تیمو جھگڑا نے مردان میں پہلے شخص کے کورونا وائرس کی وجہ سے انتقال کرجانے کے بارے میں آگاہ کیا۔ بعد ازاں کچھ ہی دیر میں انہوں نے ہنگو میں دوسرے فرد کی موت کی تصدیق کی۔

20 مارچ کو ملک کے سب سے بڑے شہر کراچی میں وائرس سے ایک مریض کا انتقال ہوا تو اس طرح تعداد 3 تک جا پہنچی۔22 مارچ کو خیبرپختونخوا میں ہی ایک اور مریض کے انتقال کی خبر سامنے آئی تو کچھ ہی دیر بعد گلگت بلتستان میں کورونا وائرس سے متاثرہ افراد کا علاج کرنیوالا ڈاکٹر اسی عالمی وبا کا شکار ہوکر جان کی بازی ہار گیا۔23 مارچ کو بلوچستان حکومت کی جانب سے صوبے میں کورونا وائرس کا پہلا مریض دم توڑ گیا۔

جہاں ایک طرف متاثرہ افراد کی تعداد میں اضافہ سامنے آرہا تھا وہیں 24 مارچ کو پنجاب میں بھی پہلی ہلاکت سامنے آگئی۔ پنجاب میں ہونے والی یہ موت ملک میں مقامی سطح پر منتقل ہونیوالے کیس سے پہلا انتقال تھا۔ علاوہ ازیں 25 مارچ کو بھی ملک میں ایک اور موت کی تصدیق ہوئی اور راولپنڈی میں 50 سالہ خاتون دم توڑ گئیں، جس کیساتھ ہی ملک میں مجموعی طور پر 8 اموات ہوگئیں۔
کرونا وائرس کی تباہ کاریاں سے متعلق تازہ ترین معلومات