مقبوضہ کشمیر میں بھارتی شہریوں کو 25 ہزار ڈومیسائل کا اجرا غیر قانونی ہے. عمران خان

اقوام متحدہ کے سیکرٹری جنرل انتونیو گوتریس سے رابطہ ‘عالمی راہنماﺅں سے بھی بات کر رہا ہوں. وزیراعظم

Mian Nadeem میاں محمد ندیم منگل 30 جون 2020 17:50

مقبوضہ کشمیر میں بھارتی شہریوں کو 25 ہزار ڈومیسائل کا اجرا غیر قانونی ..
اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔30 جون۔2020ء) وزیر اعظم عمران خان نے بھارتی حکومت کی جانب سے مقبوضہ کشمیر میں بھارتی شہریوں کو 25 ہزار ڈومیسائل کے اجرا کو غیر قانونی قرار دیتے ہوئے کہا ہے کہ انہوں نے اس معاملے پر اقوام متحدہ کے سیکرٹری جنرل انتونیو گوتریس سے رابطہ کیا ہے. سماجی رابطے کی ویب سائٹ ٹوئٹر پر بیان جاری کرتے ہوئے انہوں نے کہا کہ میں نے اقوام متحدہ کے سیکرٹری جنرل سے رابطہ کیا ہے اور میں دیگر عالمی راہنماﺅں سے بھی بات کر رہا ہوں‘انہوں نے کہا کہ بھارت کی اس نا قابل قبول پیش قدمی کو روکنا ضروری ہے، اس سے کشمیریوں کے قانونی اور بین الاقوامی طور پر ضمانت شدہ حقوق پر مزید زد پڑتی ہے اور جنوبی ایشیا میں امن و سلامتی کو شدید نقصان پہنچتا ہے.

ایک اور ٹوئٹ میں عمران خان نے کہا کہ پہلے مقبوضہ جموں و کشمیر پر غیر قانونی قبضہ جمانے کی بھارتی کوشش اور اب 25 ہزار بھارتی شہریوں کو ڈومیسائل سرٹیفکیٹس کے اجرا سمیت مقبوضہ وادی میں آبادی کا تناسب بدلنے کے تمام بھارتی حربے سراسر غیرقانونی اور چوتھے جنیوا کنونشن سمیت بین الاقوامی قانون اور سلامتی کونسل کی قراردادوں کے منافی ہیں‘۔

(جاری ہے)

واضح رہے کہ ترک نشریاتی ادارے کی ایک رپورٹ کے مطابق 18 مئی سے اب تک مسلم اکثریتی مقبوضہ جموں و کشمیر میں تقریبا 25 ہزار غیر مقامی افراد کو ڈومیسائل سرٹیفکیٹ دیے گئے ہیں جسے مقامی سیاست دانوں نے علاقے کے آبادیاتی پروفائل کو خراب کرنے کے اقدام کا آغاز قرار دیا ہے.

خیال رہے کہ شہریت سے متعلق یہ ایک قسم کا سرٹیفکیٹ ہے جو کسی شخص کو علاقے میں رہائش اور سرکاری ملازمت کا اہل بناتا ہے جو گزشتہ سال تک صرف مقامی آبادی کے لیے مختص تھا ریڈیو پاکستان کی رپورٹ کے مطابق وزیر برائے اطلاعات ونشریات شبلی فراز نے بھی عالمی برادری پر زور دیا کہ وہ مقبوضہ کشمیرمیں بے گناہ کشمیریوں کے خلاف بھارتی مظالم کا نوٹس لے.

ترکی کی استنبول یونیورسٹی کے زیر اہتمام مسئلہ کشمیر کی علاقائی اور عالمی توجیہات کے موضوع پر آن لائن کانفرنس کے لیے ایک خصوصی پیغام میں انہوں نے کہا کہ بھارت کو عالمی قوانین اور انسانی حقوق کے متعلقہ معاہدوں کے تحت ذمہ دار ٹھہرانا چاہیے وزیر اطلاعات نے کہا کہ اقوام متحدہ اور عالمی برادری کو مقبوضہ کشمیر میں آبادی کا تناسب اور ضلعی شناخت کو تبدیل کرنے سے بھارت کو روکنے کے لیے فوری کارروائی کرنی چاہیے.

انہوں نے کہا کہ پاکستان اقوام متحدہ کی قراردادوں کے مطابق حق خودارادیت کے ناقابل تنسیخ حق کے حصول تک کشمیری عوام کی حالت زار کو عالمی سطح پر اجاگر کرتا رہے گا انہوں نے کہا کہ بھارت کورونا وائرس کی عالمی وبا کی آڑ میں اپنے توسیع پسندانہ عزائم جاری رکھے ہوئے ہے. انہوں نے کہا کہ جب بھارت نے گزشتہ سال مقبوضہ کشمیر کی نیم خودمختار حیثیت کو کالعدم قرار دیا تھا تو اس نے بھارتی آئین کے آرٹیکل 35-اے کے تحت ضمانت دیے گئے خصوصی شہریت کے قانون کو بھی ختم کردیا تھااس قانون سے آبادی کے تناسب کو برقرار رکھتے ہوئے غیر مقامیوں کو علاقے میں آباد ہونے، سرکاری ملازمتوں پر دعویٰ کرنے سے روکا گیا تھا.

رواں ماہ کے آغاز میں بھارتی ریاست بہار سے تعلق رکھنے والے بیوروکریٹ نوین کمار چودھری کو جاری کردہ ڈومیسائل سرٹیفکیٹ کی ایک تصویر سوشل میڈیا پر وائرل ہوئی تھی اپریل کے مہینے میں جاری کورونا وائرس لاک ڈاﺅن کے درمیان بھارتی حکومت نے مقبوضہ کشمیر کے لیے ڈومیسائل قوانین کو نوٹی فائی کیا تھا جس کے تحت غیر اعلانیہ تعداد میں بیرونی افراد کو رہائش اور ملازمت کا اہل بنایا گیا.

نئے قانون کے مطابق کوئی بھی شخص جو اس خطے میں 15 سال سے مقیم ہے یا اس نے وہاں 7 سال تعلیم حاصل کی ہے اور اس نے اپنی کلاس 10 یا کلاس 12 کا امتحان پاس کیا ہے وہ ڈومیسائل کا اہل ہے مقامی شہریت کا دعویٰ کرنے کے اہل بھارت کے سرکاری ملازمین کے بچے بھی ہیں جنہوں نے اس خطے میں 10 سال یا اس سے زیادہ خدمات انجام دیں. مقبوضہ کشمیر کے تمام سیاستدانوں نے کہا کہ خصوصی شہریت کے حق کے خاتمے کا مقصد خطے کی مسلم اکثریتی آبادی کو تبدیل کرنا ہے اپنا نام ظاہر نہ کرنے کی شرط پر اناطولو ایجنسی سے بات کرتے ہوئے ایک سرکاری عہدیدار نے بتایا کہ 18 مئی کو جب قانون کو نوٹی فائی کیا گیا تھا، اس وقت سے اب تک 33 ہزار افراد نے ڈومیسائل سرٹیفکیٹ کے لیے درخواست دی تھی.

انہوں نے بتایا کہ ان میں سے 25 ہزار افراد کو شہریت کے حقوق دیے گئے ہیںانہوں نے کہاکہ ہندو اکثریتی علاقے جموں کے 10 اضلاع سے تقریباً 32 ہزار درخواستیں موصول ہوئی ہیںدوسری جانب مقبوضہ کشمیر جہاں تقریباً 96.4 فیصد مسلمان رہتے ہیں، اب تک کل 720 درخواستوں میں سے 435 سرٹیفکیٹ جاری کیے جاچکے ہیں.