آزاد کشمیر انتخابات میں عمران خان کی کامیابی سے بھارت بہت خائف ہے، فواد چوہدری

الیکشن میں عوام نے بڑھ چڑھ کر بلے پر مہر لگائے،انشاء اللہ کشمیر میں پی ٹی آئی ہی حکومت بنائے گی، وزیر اطلاعات

اتوار 25 جولائی 2021 22:10

آزاد کشمیر انتخابات میں عمران خان کی کامیابی سے بھارت بہت خائف ہے، ..

پنڈدادنخان (اُردو پوائنٹ اخبارتازہ ترین - این این آئی۔ 25 جولائی2021ء) وفاقی وزیر اطلاعات و نشریات چوہدری فواد حسین نے کہا ہے کہ آزاد کشمیر انتخابات میں عمران خان کی کامیابی سے بھارت بہت خائف ہے، الیکشن میں عوام نے بڑھ چڑھ کر بلے پر مہر لگائے،انشاء اللہ کشمیر میں پی ٹی آئی ہی حکومت بنائے گی۔ میڈیا سے گفتگو کرتے ہوئے انہوں نے کہا کہ بھارتی میڈیا نے کشمیر کے حوالے سے عمران خان حکومت کی بھر پور مخالفت کی، آزاد کشمیر میں عمران خان کی حکومت بننے سے انڈیا کو بہت بڑ ادھچکا لگے گا۔

انہوںنے کہاکہ پنڈدادنخان پی ٹی آئی کا گڑھ ہے ،وہ پی ٹی آئی امیدوار کو ووٹ دینے پر شہریوں کا شکریہ ادا کرتے ہیں۔ کشمیر یوں کو مبارکباد دیتے ہوئے وفاقی وزیر نے کہا کہ پاکستان کے اندر آزادانہ، منصفانہ انتخابی عمل مقبوضہ کشمیر کے عوام کو امید اور جلا بخشتی ہے۔

(جاری ہے)

انہوں نے کہا کہ ایک دن ضرور مقبوضہ کشمیر کے عوام آزادانہ انتخابات میں حق رائے دہی استعمال کریں گے ۔ انہوںنے کہاکہ پاکستان اور کشمیر میں مجموعی طور پر انتخابی عمل پرامن رہا ہے۔انہوں نے کہا کہ بد قسمتی سے ایک واقعہ کے دوران پی ٹی آئی کارکن شہید ہوا ہے۔ پیپلز پارٹی کے کچھ لوگوں نے پولنگ کے دوران کئی جگہوں پر حملے کئے ہیں۔چوہدری فواد حسین نے کہا کہ پچاس فیصد سے زائد ٹرن آؤٹ ہونا ایک مثبت پیش رفت ہے۔