Live Updates

تاجروں کا ٹیکس پالیسیوں کیخلاف30 نومبرکو وزیراعظم سیکریٹریٹ کے باہر دھرنےکا اعلان

پوائنٹ آف سیل پر ڈیوائس اور سیل ٹیکس کی رجسٹریشن پیچیدہ قانون ہے، ایسی ڈیوائس کسی صورت نہیں لگنے دیں گے، ایف بی آر کو حاصل پولیس کے اختیارات واپس لئے جائیں۔ صدرآل پاکستان انجمن تاجران اجمل بلوچ

ثنااللہ ناگرہ پیر 1 نومبر 2021 19:51

تاجروں کا ٹیکس پالیسیوں کیخلاف30 نومبرکو وزیراعظم سیکریٹریٹ کے باہر ..

لاہور(اُردوپوائنٹ اخبار تازہ ترین۔ یکم نومبر2021ء) آل پاکستان انجمن تاجران نے ٹیکس پالیسیوں کیخلاف 30 نومبرکو وزیراعظم سیکریٹریٹ کے باہر دھرنا دینے کا اعلان کردیا، صدر انجمن تاجران اجمل بلوچ نے کہا کہ پوائنٹ آف سیل پر ڈیوائس اور سیل ٹیکس کی رجسٹریشن پیچیدہ قانون ہے، ڈیوائس کسی صورت نہیں لگنے دیں گے، ایف بی آر کو حاصل پولیس کے اختیارات واپس لئے جائیں۔

انہوں نے اپنے بیان میں کہا کہ جبری سیل ٹیکس رجسٹریشن کے قانون کو ختم کیا جائے، پوائنٹ آف سیل پر ڈیوائس کسی صورت نہیں لگنے دیں گے، پوائنٹ آف سیل پر ڈیوائس اور سیل ٹیکس کی رجسٹریشن پیچیدہ قانون ہے، تاجر اتنا پڑھا لکھا نہیں کہ اتنی پیچیدہ اور ٹیکنیکل زبان سمجھ سکے۔ اجمل بلوچ نے کہا کہ ایف بی آر کو دیئے گئے پولیس کے اختیارات واپس لئے جائیں، ایف اے ٹی ایف سے جان چھڑا کر آزاد تجارت کرنے دی جائے، اداروں میں کرپشن ختم کئے بغیر ملک خوشحال نہیں ہو سکتا۔

(جاری ہے)

دوسری جانب آج پشاور پریس کلب کے سامنے مسلم لیگ ن خواتین ونگ نے مہنگائی کے خلاف برتن اور روٹی اٹھا کراحتجاج کیا ۔ مسلم لیگ ن خواتین ونگ کے مہنگائی کے خلاف پریس کلب کے سامنے روٹی اور برتن اٹھا کر احتجاج کیا ،احتجاج کی قیادت مسلم لیگ ن خیبر پختونخوا کے صدر امیر مقام کررہے تھے ، مظاہرین نے حکومت کے خلاف نعرے لگائے۔ امیر مقام کا کہنا تھا کہ حکومت چلانا عمران خان کی بس کی بات نہیں، آئی ایم ایف سے کئے گئے معاہدے عوام کے سامنے لائیں، عمران خان صحافیوں کی زبانوں پر بھی تالے لگانا چاہتا ہے، ابھی پوری قوم سڑکوں پر نکلی ہے،مزید اس چور کو وقت نہیں دیتے، عمران خان ایک وعدہ بتائیں جو پورا کیا ہو، ضرورت پڑی تو لانگ مارچ کر کے اسے باہر کرینگے۔

امیر مقام کا کہنا تھا کہ نالائقی کی حد یہ ہے کہ یہ لوگ کہتے ہیں کہ روزانہ فرشتے نرخ نامے بناتے ہیں،اس قوم کو مہنگائی سے مسلم لیگ ن بچائے گی،عمران خان جنتر منتر، اور تعویذ سے ملک چلا رہا ہے،عمران خان قوم کو پیچھے لے کر جا رہا ہے۔