پولیس نے نیازی اڈا سیل کردیا، ہزاروں مسافروں کو مشکلات کا سامنا

پی پی 146 سے حمزہ شہباز کے مقابلے میں کاغذات نامزدگی جمع کروائے جس کے بعد دھمکیاں دی گئیں،رات گئے پولیس کی بھاری نفری آئی اور اڈا سیل کر دیا۔نیازی ایکسپریس کے مالک بجاش نیازی کا موقف

مقدس فاروق اعوان پیر 20 مارچ 2023 16:12

پولیس نے نیازی اڈا سیل کردیا، ہزاروں مسافروں کو مشکلات کا سامنا

لاہور ( اُردو پوائنٹ اخبارتازہ ترین ۔20 مارچ 2023ء ) سوشل میڈیا پر خبریں گردش کر رہی ہیں کہ پولیس نے پاکستان کی سب سے بڑی ٹرانسپورٹ کمپنی نیازی ایکسپریس کا اڈا سیل کردیا جہاں سے روزانہ ہزاروں افراد سفر کرتے ہیں۔ نیازی اڈے کے مالک بجاش نیازی ہیں جنہوں نے پی پی 146 سے پی ٹی آئی کی ٹکٹ کے لیے کاغذات نامزدگی جمع کروائے ہیں۔کہا جا رہا ہے کہ بجاش نیازی کوعمران خان کا ساتھ دینے کی وجہ سے انتقام کا نشانہ بنایا جا رہا ہے۔

اس حوالے بجاش نیازی نے ایک ویڈیو پیغام میں کہا ہے کہ میرا نیازی ایکسپریس کے نام سے ٹرانسپورٹ کا کام ہے۔میں نے 146 سے کاغذات نامزدگی بھی جمع کروائے تھے جس کے بعد مجھے کاروبار بند کرنے کی دھمکیاں دی جا رہی تھیں۔100 سے 150 کے درمیان پولیس اہلکار آئے اور ہمارا کاروبار بند کر دیا۔

(جاری ہے)

ہمارے پاس ہائیکورٹ کا اسٹے آرڈر بھی موجود ہے اس کے باوجود انتقامی کارروائی کی جا رہی ہے۔

ہم مقبوضہ کشمیر میں نہیں پاکستان میں رہتے ہیں۔

۔اسی حوالے سے اردو پوائنٹ نے بھی خصوصی کوریج کرتے ہوئے بتایا کہ نیازی اڈا بند ہونے کی وجہ سے ہزاروں مسافر خوار ہو رہے ہیں۔بجاش نیازی کے مطابق انہوں نے حمزہ شہباز شریف کے مدمقابل کاغذاتِ نامزدگی جمع کروائے جس کے بعد ان کا کاروبار بند کر دیا گیا۔نیازی اڈا کے بکنگ انچارج نے اردو پوائنٹ سے گفتگو میں بتایا کہ ہمیں اڈا بند کرنے کے حوالے سے کوئی نوٹس نہیں دیا گیا،رات گئے پولیس اہلکاروں کی نفری آئی اور ٹرمینل بند کر دیا۔

گاڑیاں بند کرکے سواریوں کو بھی باہر نکال دیا گیا۔ہمیں اتنا بھی وقت نہیں دیا گیا کہ اپنے مسافروں کو اطلاع کر سکیں۔ابھی تک ہمیں اڈا سیل کرنے کی وجہ نہیں بتائی گئی۔ایک گھنٹے میں ہماری کم از کم 8 بسیں جاتی ہیں،400 سواریاں ایک گھنٹے میں سفر کرتی ہیں جس سے اندازہ لگایا جا سکتا ہے کہ کتنی تعداد میں مسافروں کو مشکلات کا سامنا کرنا پڑ رہا ہے۔مزید کیا کہا ویڈیو میں ملاحظہ کیجئے :