بچے قوم کامستقبل ہیں، معیاری تعلیم کی فراہمی پرکوئی سمجھوتہ نہیں ہوناچاہئیے،حاجی غلام علی

پشاور(اُردو پوائنٹ اخبارتازہ ترین - این این آئی۔ 16 جون2023ء) گورنرخیبرپختونخوا حاجی غلام علی نے کہاہے کہ تعلیمی شعبہ میں ترقی کی سوچ اپنانی چاہئیے جس کیلئے میرٹ پرفیصلہ کرناضروری ہے، تمام ترحکومتی وسائل کی فراہمی کے باوجود اگر سرکاری تعلیمی اداروں کی کارکردگی بہتر نہ ہو تو اس پر ضرور سوچناچاہئے،بچے ہمارے ملک وقوم کامستقبل ہے اوراس ملک کی ترقی وخوشحالی کیلئے بچوں کومعیاری تعلیم کی فراہمی پرکوئی سمجھوتہ نہیںہوناچاہئے۔

ان خیالات کااظہارانہوں نے سٹی یونیورسٹی آف سائنس اینڈ ٹیکنالوجی پشاور کے دورہ کے دوران پشاور ماڈل ایجوکیشنل انسٹیٹوٹ(PMEI) کی افتتاحی تقریب سے بحیثیت مہمان خصوصی خطاب کرتے ہوئے کیا۔ گورنرنے پشاور ماڈل ایجوکیشنل انسٹیٹیوٹ کے نئے منصوبے پشاور ماڈل سفائر کا سنگ بنیاد بھی رکھا۔

(جاری ہے)

تقریب میں نگران صوبائی وزیربرائے صنعت وتجارت عدنان جلیل، سیکرٹری محکمہ ابتدائی وثانوی تعلیم معتصم باللہ اورصدر سٹی یونیورسٹی محمد صبورسیٹھی، غیورسیٹھی، پراجیکٹ ڈائریکٹر ایوب سیٹھی اوردیگر شریک تھے۔

سٹی یونیورسٹی پہنچنے پر انتظامیہ نے گورنر اوردیگرمہمانوں کا شانداراستقبال کیا اور اپنے مصروف شیڈول میں وقت دینے پر گورنر کاشکریہ ادا کیا۔ گورنرنے اس موقع پر معیاری تعلیم کی فراہمی میں سٹی یونیورسٹی کے مالکان اورانتظامیہ کو خراج تحسین پیش کیااور کہاکہ سٹی یونیورسٹی اور اس کے زیرانتظام سکولز، کالجز گذشتہ کئی دھائیوں سے بچوں کو کم فیسوں پر معیاری تعلیم فراہم کررہے ہیں جوکہ قابل تحسین ہے۔

انہوں نے کہاکہ سٹی یونیورسٹی کے زیراہتمام تعلیمی اداروں کی تعلیمی خدمات کا معترف ہوں جس کا بارہاں ذکر سرکاری تعلیمی اداروں کی تقریبات اور کانوکیشن میں بھی کرچکا ہوں۔سیٹھی صاحبان نے صوبے میں معیاری تعلیم کی فراہمی کی بنیاد رکھی ہے جو کہ لائق ستائش ہے۔سٹی یونیورسٹی سمیت صوبے میں معیاری تعلیمی خدمات میں مصروف پرائیویٹ سیکٹر کو اپنی مکمل معاونت کا یقین دلاتا ہوں کیونکہ میرا اس بات پر یقین ہے کہ جدید دور سے ہم آھنگ تعلیم کے حصول کے بغیر ترقی کا سفر طے کرنا ممکن نہیں۔

تقریب کے اختتام پر گورنر خیبرپختونخوا کو اعزازی شیلڈ بھی پیش کی گئی جبکہ گورنر نے ادارے کی جانب سے نگران صوبائی وزیر عدنان جلیل، سیکرٹری تعلیم معتصم باللہ اور چیئرمین پشاور تعلیمی بورڈپروفیسرنصراللہ خان یوسفزئی کو بھی شیلڈ پیش کی۔علاوہ ازیں گورنرسے وزیرستان سے چیئرمین مفتی مصباح اللہ، چیف آف وزیرستان ملک نصر اللہ اور چیف آف کابل خیل ملک عبدالقادر کی سربراہی میں 11 رکنی نمائندہ وفد اور ضلع کرم سے تین اقوام چمکنی، موسٰی زئی اور علی شیرزئی کی22 رکنی عوامی نمائندہ وفد نے ملک حیات خان چیف آف چمکنی،مولاناقوت خان فاروقی اورمفتی نورباچا کی قیادت میں گورنرہاؤس میں الگ الگ ملاقات کی اور گورنرکو ضلع کرم اور وزیرستان کے عوام کودرپیش مسائل ومشکلات سے آگاہ کیا اور ان مسائل ومشکلات کے حل کیلئے گورنر سے آئینی کردار ادا کرنے کی درخواست کی۔

گورنر نے ضم اضلاع وزیرستان اور کرم کے وفود سے ملاقاتوں کے دوران کہا کہ ضم اضلاع کے عوام نے بے پناہ قربانیاں دی ہے جس کا پوری قوم اعتراف کرتی ہے۔انضمام کے بعد قبائلی عوام کو مشکلات کا سامنا کرنا پڑ رہا ہے جس کا آئین اور قانون کے مطابق حل نکالا جائیگا۔ وفاقی حکومت اور خاص طور پر وزیراعظم شہبازشریف، وفاقی وزیر منصوبہ بندی وترقیات احسن اقبال اور نگران وزیراعلی محمداعظم خان کی خواہش ہے کہ ضم اضلاع کے مسائل ومشکلات ترجیحی بنیادوں پرحل کئے جائیں۔

انہوں نے کہا کہ قبائلی اضلاع کے عوام کی محرومیوں کا ازالہ کیا جائیگا اور اس ضمن میں تمام وسائل بروئے کار لائے جا رہے ہیں۔انہوں نے کہاکہ ضم اضلاع کے عوام بہت جلد ترقی و خوشحالی کے دور میں شامل ہوجائیں گے۔ وفود نے مسائل کے حل میں دلچسپی لینے اورموقع پر ہی احکاما ت جاری کرنے پر گورنر کاشکریہ ادا کیا۔دریں اثناء گورنرسے سابق وفاقی وزیراورپاکستان پیپلزپارٹی کے مرکزی ایگزیکٹیو کمیٹی کے رکن انور سیف اللہ خان نے بھی گورنر ہاؤس میں ملاقات کی۔ ملاقات میں ملک کی موجودہ معاشی صورتحال سمیت عوامی فلاح وبہبودسے متعلق امور پرتبادلہ خیال کیاگیا۔