ق لیگ کا ن لیگ کے ساتھ سیٹ ایڈجسٹمنمٹ نہ کرنے کا فیصلہ

لاہور ( اردوپوائنٹ اخبارتازہ ترین ۔ 12 جنوری 2024ء) ق لیگ نے ن لیگ کے ساتھ سیٹ ایڈجسٹمنٹ ختم کردی۔آج اس سلسلے میں مسلم لیگ ق کے سربراہ چوہدری شجاعت حسین کی زیر صدارت اجلاس ہوا۔اجلاس میں ق لیگ نے ن لیگ کے ساتھ سیٹ ایڈجسٹمنٹ نہ کرنے کا فیصلہ کیا ہے۔چوہدری سالک حسین کا اس حوالے سے کہنا ہے کہ صرف اپنی ذات کی حد تک سیٹ ایڈجسٹمنٹ قبول نہیں۔ہمارے دیگر امیدوار وں کے مقابلے میں ن لیگ نے اپنے امیدواروں کو ٹکٹ جاری کر دیے ہیں۔

ن لیگ نے گجرات سے بھی میرے اور میرے بھائی چوہدری شافع حسین کے خلاف اپنے نامزد کردہ امیدواروں کو ٹکٹ جاری کردی ہیں۔سالک حسین نے کہا کہ ن لیگ نے ہمارے مطلوبہ حلقوں میں اپنے امیدوار کھڑے کر دیے ہیں، پارٹی قیادت نے فیصلہ کیا ہے کہ ہم دوہرے معیار کا شکار نہیں ہوں گے۔

(جاری ہے)

سیٹ ایڈجسٹمنٹ والے حلقوں میں بھی الیکشن لڑیں گے۔اس سے قبل ایک رپورٹ میں بتایا گیا کہ (ن )لیگ کی جانب سے پارٹی ٹکٹ کی منظوری دیتے ہوئے آئی پی پی اور ق لیگ کے لیے کئی حلقے خالی چھوڑ دیے گئے تھے۔

پنجاب میں آئی پی پی کو قومی اسمبلی کی 7 اور صوبائی اسمبلی کی 11 سیٹیں دیے جانے کا امکان تھا ۔بتایا گیا کہ (ن) لیگ نے ق لیگ کے لیے قومی اور صوبائی کی 2، 2 سیٹیں خالی چھوڑی ہیں، لاہور کے سوا پنجاب میں آئی پی پی کے لیے 5 حلقے خالی چھوڑے گئے ،جہانگیر ترین این اے 155 لودھراں سے آئی پی پی کے ٹکٹ پر الیکشن لڑیں گے۔ (ن )لیگ کی جانب سے جہانگیر ترین کو این اے 149 ملتان، نعمان لنگڑیال کو این اے 143 ساہیوال دی جائے گی،انجینئر گل اصغر کو این اے 88 خوشاب، غلام سرور خان کو این اے 54 راولپنڈی کی نشست دی جائے گی۔

اسلام آباد سے این اے 47 سے عامر کیانی کو،لاہور سے این اے 117 پر علیم خان کو ، این اے 128 سے عون چوہدری کو ایڈجسٹ کیے جانے کا امکان ہے۔سیٹ ایڈجسٹمنٹ پر ق لیگ سے بھی ن لیگ کی بات چیت جاری تھی۔امکان ظاہر کیا گیا تھا کہ (ق )لیگ کے لیے این اے 64 اور سالک حسین کے لیے پی پی 32 چھوڑے گی،پی پی 31 گجرات چوہدری شجاعت کے دوسرے بیٹے شافع حسین کے لیے چھوڑے گی،این اے 165 بہاولپور ق لیگ کے طارق بشیر چیمہ کو دیے جانے کا امکان ہے،این اے 165 سے ن لیگ کے امیدوار سعود مجید ہیں جو ٹکٹ نہ ملنے پر سینیٹ میں آ سکتے ہیں،سعود مجید کے بھتیجے سعد مسعود کو پی پی 248 سے ٹکٹ دیا گیا ہے۔