Live Updates

پی ٹی آئی والے اقتدار میں آنے کیلئے این آر او مانگ رہے ہیں، طلال چوہدری

بدھ 28 اگست 2024 22:58

اسلام آباد (اُردو پوائنٹ اخبارتازہ ترین - این این آئی۔ 28 اگست2024ء) پاکستان مسلم لیگ (ن) کے سینیٹر طلال چوہدری نے کہا ہے کہ پاکستان تحریک انصاف (پی ٹی آئی) گروپ بندی کا شکار ہے، یہ لوگ اقتدار میں آنے کے لیے این آر او مانگ رہے ہیں۔پاکستان مسلم لیگ (ن) کے رہنما سینیٹر طلال چوہدری نے میڈیا سے گفتگو کرتے ہوئے کہا کہ دوسروں کے خلاف کرپشن کا بیانیہ گھڑنے والے اسکینڈلز کے ریکارڈز توڑتے جا رہے ہیں۔

انہوں نے کہا کہ پی ٹی آئی کے اندر تقسیم اور گروپس کھل کر سامنے آ چکے ہیں جن کا مقصد کرپشن کی رقم میں سے زیادہ سے زیادہ حصہ وصول کرنا ہے، دراصل یہ ان کی اقتدار پر تک پہنچنے کی لڑائی ہے۔انہوںنے کہاکہ اپنے آپ کو انقلابی اور نظام میں تبدیلی کا نعرہ لگانے والے اقتدار تک پہنچنے کے لیے کوئی بھی کندھا چاہتے ہیں، پورا ملک پھر سے اپنے آپ کو انقلابی جماعت کہنے والوں کا تماشا دیکھ رہا ہے۔

(جاری ہے)

طلال چوہدری نے کہا کہ یہ اپنے کیسز کو معاف کرانے کے لیے این ار او چاہتے ہیں اور اقتدار میں پہنچنے کے بعد کرپشن اور لوٹ مار کے پیسے کا زیادہ سے زیادہ حصہ چاہتے ہیں۔انہوں نے کہا کہ خیبرپختونخوا حکومت بنے ابھی 4 مہینے نہیں ہوئے تھے اور اسکینڈلز کے ریکارڈز توڑے جا رہے ہیں، جس وزیر نے بانی پی ٹی آئی عمران خان کو شکایت لگائی کہ وہاں پر سڑکیں بنانے کے لیے مختص رقم سڑکوں کی تعمیر کی بجائے وزیراعلیٰ اور باقی رہنماؤں تک جا رہی ہے، اسی وزیر کو فارغ کر دیا گیا۔

انہوںنے کہاکہ عمران خان نے یہ پہلی دفعہ نہیں کیا جس نے بھی شکایت لگائی، چاہے وہ اکبر ایس بابر ہو یا دوسرے بانی پارٹی رہنما ہوں، انہوں نے ہمیشہ نشاندہی کرنے والوں کو فارغ کیا اور کرپشن اور لوٹ مار کرنے والوں کو انہوں نے ہمیشہ تحفظ دیا۔مسلم لیگ (ن) کے سینیٹر نے کہا کہ بنی گالہ سے بانی پی ٹی آئی خود ہدایات دیتے رہے ،اس کی کئی مثالیں موجود ہیں، اس وزیر سے پہلے بھی جس نے شکایت لگائی اسے فارغ کر دیا گیا۔انہوں نے کہا کہ پی ٹی آئی کا پورا بیانیہ ہی دوسروں کے خلاف کرپشن کی بنیاد پر گھڑا گیا مگر ان پر یہ کیسز حقیقت پر مبنی ہیں جس کے بے شمار ثبوت موجود ہیں، 190 ملین پاؤنڈ، توشہ خانہ ،پشاور میٹرو ، سونامی ٹری سمیت کس کس کیس کی بات کی جائے۔