ٹریفک قوانین کی پاسداری کے لئے ہم سب کو کردار ادا کرنا ہوگا،شرجیل میمن

کراچی(اُردو پوائنٹ اخبارتازہ ترین - این این آئی۔ 14 جنوری2025ء)سندھ کے سینئر وزیر شرجیل انعام میمن نے کہا ہے کہ کراچی یونیورسٹی روڈ سے عوام کو پہنچنے والی تکلیف کا احساس ہے، اس سال ڈبل ڈیکر بسیں چلانے کی کوشش کریں گے، کوشش ہے کہ جام صادق پل بھی اپریل 2025 میں مکمل کرلیا جائے، بطور قوم ہماری ترجیحات تبدیل ہوتی جارہی ہیں، حادثات کی وجہ سے انسان اپنی جان گنوا بیٹھتے ہیں، کچھ معذوری کا شکار ہوتے ہیں، ہماری ترجیح یہ ہونی چاہئے کہ کسی طرح انسان ذات کی خدمت کی جا سکتی ہے، روڈ سیفٹی جیسا منفرد خیال انسان ذات کی خدمت سے واقف ذہنوں میں آتا ہے، ٹریفک قوانین کی پاسداری کے لئے ہم سب کو کردار ادا کرنا ہوگا۔

کراچی میں کنزیومر ایسو سی ایشن آف پاکستان کے زیر اہتمام کنزیومر روڈ سیفٹی ایوارڈ کی تقریب سے بطور مہمان خصوصی خطاب کرتے ہوئے سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ، شرجیل انعام میمن نے کہا کہ کنزیومر روڈ سیفٹی ایوارڈ کی کامیاب تقریب پر تمام منتظمین کو مبارکباد دیتا ہوں، یہ تنظیم ایک بہت ہی شاندار کام کر رہی ہے، جس کا مقصد انسانوں کی زندگیاں بچانا ہے۔

(جاری ہے)

انہوں نے کہا کہ ہمیں ٹریفک قوانین کا احترام کرنے ہی ضرورت ہے، بچوں کو ٹریفک قوانین کے بارے پڑھانا چاہئے، عوا کو آگہی کی بھی ضروت ہے، چند لمحوں کی جلدبازی کی وجہ سے لوگ اپنی زندگی خراب کرتے ہیں اور دوسروں کے لئے بھی پریشانی کا سبب بنتے ہیں۔سینئر وزیر شرجیل انعام میمن نے کہا کہ کم عمر بچے اگر گاڑی چلاتے ہیں تو یہ ان کے والدین کی لاپرواہی اور غلطی ہے، ٹریفک قوانین سے متعلق آگہی کے لئے میڈیا کردا ادا کرے، صرف ٹریفک قوانین کی خلاف ورزی نہیں ہوتی، دیگر بھی بہت سے منفی نتائج کا سامنا کرنا پڑتا ہے۔

انہوں نے کہا کہ ہم نے ماضی میں دیکھا کہ کراچی میں ٹریفک کے جوانوں کو چن چن کر ان کی ٹارگٹ کلنگ کی گئی، لیکن یہ پھر بھی ہمت نہیں ہارے، ٹریفک پولیس کے جوان کڑی دھوپ اور شدید گرمی خواہ سردی میں یہ گھنٹوں کھڑے ہو کر کام کرتے ہیں، اگر ٹریفک کے جوان آپ کو روکتے ہیں تو وہ آپ کی حفاظت کے لئے روکتے ہیں، ٹریفک کے سپاہی ہمارے قومی ہیروز ہیں۔انہوں نے کہا کہ چیئرمین بلاول بھٹو زرداری، صدر آصف علی زرداری اور وزیر اعلی کی واضح ہدایات ہیں کہ ماس ٹرانزٹ کو بڑھایا جائے، ماحولیاتی آلودوگی بھی ہمارے لئے بہت بڑا چیلنج ہے، حکومت سندھ پہلی بار ماحول دوست ای وی ٹیکسی سروس شروع کرنے جا رہی ہے، جس سے ماحول اور ملک دونوں کو فائدہ پہنچے گا، روزگار کے نئے مواقع میسر آئیں گے۔

انہوں نے کہا کہ کراچی کے یونیورسٹی روڈ سے عوام کو پہنچنے والی تکلیف کا احساس ہے، ریڈلائن پروجیکٹ میں تاخیر کی کچھ وجوہات ہیں، کوشش ہے 2 سال میں مکمل کر لیں۔وزیر اطلاعات سندھ نے مزید کہا کہ ٹریفک قوانین سے ناواقف لوگوں کو ڈرائیونگ لائسنس نہیں ملنا چاہیے، شہریوں کو ٹریفک قوانین کے حوالے سے ذمہ داری کا مظاہرہ کرنا چاہیے۔انہوں نے کہا کہ بطور قوم ہماری ترجیحات تبدیل ہوتی جارہی ہیں، اگر ٹریفک پولیس ہمیں روک رہی ہے تو وہ ہماری بہتری کیلیے ہے، ٹریفک کا سپاہی نیشنل ہیرو ہے۔

شرجیل انعام میمن نے یہ بھی کہا کہ ٹریفک پولیس کو مزید سہولیات دینے کی ضرورت ہے، ہم سب کو مل کر اسے پروموٹ کرنا چاہیے۔انہوں نے کہا کہ اس سال ڈبل ڈیکر بسیں بھی چلانے کی کوشش کریں گے، حکومت سندھ پہلی ماحول دوست ای وی ٹیکسی سروس شروع کرنے جارہی ہے۔صوبائی وزیر اطلاعات نے کہا کہ کراچی میں ٹریفک پولیس کے جوانوں کی چن چن کر ٹارگٹ کلنگ کی گئی۔تقریب کے موقع پر سینئر وزیر شرجیل انعام میمن نے روڈ سیفٹی میں گراں قدر خدمات سر انجام دینے والے ٹریفک پولیس کے جوانوں اور کنزیومر ایسو سی ایشن پاکستان کے کارکنان کو بھی شیلڈز سے نوازا گیا۔