عوام کی مشکلات میں کمی ،معاشی اشاریے بہتری کی طرف گامزن ہیں‘ آصف زرداری

میرا چین کا دورہ کامیاب رہا ،ہم نے سی پیک کی بنیاد رکھی اور اسے کامیاب بنائیں گے‘صدر مملکت

اتوار 23 فروری 2025 13:15

لاہور(اُردو پوائنٹ اخبارتازہ ترین - این این آئی۔ 23 فروری2025ء)صدر مملکت آصف علی زرداری نے کہا ہے کہ عوام کی مشکلات میں کمی آ رہی ہے اور معاشی اشاریے بہتری کی طرف گامزن ہیں،میرا چین کا دورہ کامیاب رہا ہے ،ہم نے سی پیک کی بنیاد رکھی اور اسے کامیاب بنائیں گے۔ ان خیالات کا اظہار انہوں نے سابق گورنر پنجاب مخدوم احمد محمود کی جانب سے اپنے اعزاز میں دیئے گئے عشائیے میں شرکت کے موقع پر گفتگو کرتے ہوئے کیا۔

عشائیے میںگورنر پنجاب سردار سلیم حیدر خان، معروف بزنس مین گوہر اعجاز، نواب شہزاد سمیت متعدد اہم شخصیات شریک ہوئیں۔آصف علی زرداری نے گفتگو کرتے ہوئے ملک کی موجودہ اقتصادی صورتحال اور حکومت کی جانب سے کی جانے والی مختلف اصلاحات پر روشنی ڈالی اور انتظامیہ کی کارکردگی میں مزید بہتری لانے پر زور دیا۔

(جاری ہے)

صدر مملکت آصف علی زرداری نے اپنے حالیہ دورہ چین بارے گفتگوکرتے ہوئے کہا کہ میرا چین کا دورہ کامیاب رہا ہے اور ہم نے سی پیک کی بنیاد رکھی ہے اور اسے کامیاب بنائیں گے، چین اور پاکستان خطے کی ترقی کیلئے مشترکہ اقدامات کر رہے ہیں اور چینی کمپنیاں پاکستان میں فیکٹریاں لگائیں گی۔

آصف زرداری نے کہا کہ سندھ حکومت نے صحت اور تعلیم کے شعبے میں نمایاں کام کیا ہے ،سندھ میں نئی یونیورسٹیاں، کالجز اور ہسپتال بنائے گئے ہیں، سندھ حکومت نے سیلاب زدگان کیلئے گھر بنائے ہیں اور دیگر صوبوں کو بھی اس کی تقلید کرنی چاہیے۔