رمضان امت مسلمہ کے اتحاد، بھائی چارے اور سلامتی کا مقدس مہینہ ہے،فیصل کریم کنڈی

ہفتہ 15 مارچ 2025 23:04

اسلام آباد(اُردو پوائنٹ اخبارتازہ ترین - آن لائن۔ 15 مارچ2025ء)پاکستان پیپلز پارٹی کی رہنما سابقہ ممبر صوبائی اسمبلی محترمہ ثانیہ کامران نے گزشتہ شب گورنر خیبر پختونخوا فیصل کریم کنڈی کی جانب سے پاکستان میں تعینات مسلم ممالک کے سفراء کے اعزاز میں منعقدہ افطار ڈنر میں شرکت کی۔افطار ڈنر میں قائمقام صدر پاکستان اور چئیرمین سینٹ سید یوسف رضا گیلانی نے خصوصی دعوت پر شرکت کی، افطار ڈنر میں مسلم ممالک ترکی، ملائشیا، انڈونیشیا، قازقستان، نائجریا، موروکو، بحرین، اعزازی سفیر تیونس، اردن،آذربائیجان، دارالاسلام، سوڈان، شام، تاجکستان، صومالیہ کے سفیروں کی شرکت ہوئی۔

افطار ڈنر میں سعودی عرب،افغانستان،ایران،مصر اور لیبیا کیسفیروں کے نمائندے بھی شریک ہوئے، افطار ڈنر میں وفاقی وزیر مذہبی امور سردار محمد یوسف، وزیراعظم کے مشیر داخلہ پرویز خٹک، ارکان قومی اسمبلی عاصمہ ارباب عالمگیر، سردار فتح اللہ خان میانخیل، چیئرمین بینظیر انکم سپورٹ پروگرام روبینہ خالد، ممبر صوبائی اسمبلی احمد کریم کنڈی، ارباب زرک، سمیت وزارت امور خارجہ کے افسران بھی شریک تھے ۔

(جاری ہے)

گورنر خیبر پختونخوا کی میزبانی میں افطار ڈنر میں مسلم امہ کے اتحاد، وحدت اور اسلامو فوبیا کے بڑھتے رحجان پر تفصیلی تبادلہ خیال کی گئی،مسلم ممالک کے سفراء نے عالمی سطح پر امت مسلمہ کے اتحاد کیلئے پاکستانی حکومت و عوام کے کردار کو سراہا۔مسلم ممالک کے سفراء نے خیبر پختونخوا میں گورنر فیصل کریم کنڈی کی صوبائی ترقی و قیام امن کیلئے سنجیدہ کوششوں کی بھی تعریف کی۔

آخر میں افطار ڈنر سے خطاب کرتے ہوئے گورنر خیبرپختونخوا فیصل کریم کندی کا کہنا تھا ماہ رمضان امت مسلمہ کے اتحاد، بھائی چارے اور سلامتی کا مقدس مہینہ ہے، عصر حاضر کا تقاضا ہے کہ تمام مسلم ممالک یکجا ہو کر امت مسلمہ کے مفادات اور دنیا میں بڑھتے ہوئے اسلامو فوبیا کے رحجان کے خاتمہ کیلئے ٹھوس مشترکہ جامع حکمت عملی تیار کریں، اسلام امن اور خیر کا دین ہیجس میں انسانیت کی بھلائی اور دیگر مذاہب کے احترام کا درس دیا گیا ہے۔