عمران خان کو جیل میں 6 کمروں پر مشتمل گھر ملا ہوا ہے، من پسند سہولیات مل رہی ہیں‘ رانا تنویر حسین

شرقپور شریف/مریدکی(اُردو پوائنٹ اخبارتازہ ترین - این این آئی۔ 02 اپریل2025ء) وفاقی وزیر فوڈ سکیورٹی اینڈ ریسرچ رانا تنویر حسین نے کہا ہے کہ عمران خان کو جیل میں 6 کمروں پر مشتمل گھر ملا ہوا ہے، من پسند سہولیات مل رہی ہیں، پی ٹی آئی والے بے بنیاد باتیں پھیلا رہے ہیں، ملک و قوم کی خاطر پی ٹی آئی سمیت کسی بھی سیاسی جماعت کے ساتھ بات کرنے کو تیار ہیں ،جعفر ایکسپریس سمیت دیگر دہشتگردی کے واقعات پر افغانستان سے بات چیت جاری ہے ، افغانستان کالعدم ٹی ٹی پی سمیت دیگر دہشتگرد گروپوں کی سرپرستی نہ کرے ، بات چیت سے مسئلہ حل نہ ہوا تو سختی سے کام لیں گے ۔

ان خیالات کا اظہار انہوں نے تحصیل ہیڈکوارٹر ہسپتال میںمریضوں کی عیادت کے بعد میڈیا سے گفتگو کرتے ہوئے کیا ۔وفاقی وزیر رانا تنویر حسین نے مریضوں میں کھانا بھی تقسیم کیا۔

(جاری ہے)

رانا تنویر حسین نے مریدکے کی ممتاز مذہبی سماجی شخصیت پیر سید زاہد شاہ گیلانی کی رہائشگاہ پر بھی میڈیا سے گفتگو کی ۔ انہوں نے کہا کہ بانی پی ٹی آئی نے توشہ خانہ میں کرپشن کی، 190 ملین پائونڈ سمیت دیگر کرپشن کے کیسز اس کے علاوہ ہیں۔

انہوں نے کہا کہ حسان نیازی کومعافی کا اختیار ہمارے پاس نہیں بلکہ صدر پاکستان کے پاس ہے ،بانی پی ٹی آئی کو ان کی جماعت والے کبھی وائس چانسلر بنوادیتے ہیں اور کبھی نوبل پرائز دلوا دیتے ہیں ،بانی پی ٹی آئی نے کون سا ایسا کام کیا ہے جو ان کو اعزاز دیا جائے۔ انہوں نے کہا کہ پاکستان کی سیاست ،معیشت اورنوجوان نسل کی اخلاقیات کی تباہی کا ذمہ دار بانی پی ٹی آئی عمران خان ہے ، انہیں جب بھی ملک و قوم کے مفاد میں مذاکرات کی پیشکش کی گئی تو انہوںنے ضد کی کہ اسٹیبلشمنٹ سے بات کریں گے حالانکہ اسٹیبلشمنٹ کہہ چکی بانی پی ٹی آئی سیاسی لوگوں سے بات چیت کریں ۔

انہوں نے کہا ہم جمہوری لوگ ہیں ،پی ٹی آئی سمیت ہر سیاسی جماعت کے ساتھ بات کرنے کو تیار ہیں ۔انہوں نے کہا دہشتگردی سمیت دیگر حالات پر پی ٹی آئی کی رضا مندی سے قومی اسمبلی سکیورٹی کمیٹی کی میٹنگ بلائی گئی ،پی ٹی آئی نے اپنے 14نام بھی دیئے لیکن عین وقت پر شرکت سے انکار کرکے ثابت کردیا ان کا مشن ہی انتشار ہے ،اب بھی پی ٹی آئی والے راضی ہوںتو ملک و قوم کے مفاد میں دوبارہ قومی اسمبلی کی سکیورٹی میٹنگ بلانے کو تیار ہیں وگرنہ حکومت تو میٹنگ کرچکی ہے ۔

انہوں نے کہا کہ وزیر اعظم مستقبل قریب میں معیشت کی بہتری کیلئے بجلی کی قیمت اور ٹیکس میں کمی کا اعلان کریں گے ،آئی ایم ایف سمیت تمام عالمی ادارے حکومت کے اقدامات کی تعریف کررہے ہیں ،آئی ایم ایف کا پروگرام بہت ضروری ہے ،یہ سچ ہے اس کی وجہ سے حکومت عوام کو جو ریلیف دینا چاہتی ہے نہیں دے پارہی تاہم آنے والا وقت خوشحالی کی نوید دے رہا ہے ۔

انہوں نے کہا پی ٹی آئی جتنے مرضی جتن کرلے عوام اسے مسترد کرچکے ہیں اس کی کوئی تحریک یااحتجاج کامیاب نہیں ہوگا اور نہ ہی مولانا فضل الرحمن کسی انتشاری ٹولے کا حصہ بنیں گے کیونکہ مولانا فضل الرحمن زیرک سیاستدان ہیں ،ان کی سیاست ہمیشہ ملک و قوم کے مفاد میں رہی ہے ۔انہوں نے کہا کہ زرعی پیداوار بڑھانے کیلئے بہت احسن اقدام کئے گئے ہیں جس کے جلد نتائج ملیں گے ،پہلی مرتبہ کسان کو مقررہ نرخ پر کھاد اور معیاری بیج اور بہت سی سہولتیں مل رہی ہیں ،وزیر اعظم میاں شہباز شریف پرعزم ہیں کہ اگلے تین چار سال میں پاکستان بڑی معیشت بن کر ابھرے گا۔