چند سیاستدان ملک دشمنوں کیساتھ ملکر اقتدار لینا چاہتے ہیں، یہ بھی دہشتگردی ہے‘ حنیف عباسی

جن خطرات سے ہم دو چار ہیں، ان سے نمٹنے کے لیے سب کو ایک ہونا پڑے گا‘وزیر ریلوے کی میڈیا سے گفتگو

جمعرات 10 اپریل 2025 23:15

چند سیاستدان ملک دشمنوں کیساتھ ملکر اقتدار لینا چاہتے ہیں، یہ بھی دہشتگردی ..

لاہور (اُردو پوائنٹ اخبارتازہ ترین - این این آئی۔ 10 اپریل2025ء) وفاقی وزیر ریلوے حنیف عباسی نے کہا ہے کہ چند سیاست دان پاکستان کے دشمنوں کے ساتھ مل کر اقتدار حاصل کرنا چاہتے ہیں، یہ عمل بھی دہشت گردی ہے،جن خطرات سے ہم دو چار ہیں، ان سے نمٹنے کے لیے سب کو ایک ہونا پڑے گا۔لاہور میں مغلپورہ ریلوے ورکشاپ کے دورے کے بعد میڈیا سے گفتگو کرتے ہوئے حنیف عباسی نے کہا کہ جو سیاستدان اقتدار میں آنے کے لیے دشمنوں کی مدد لیتے ہیں اور دوست ممالک کو پاکستان کے ساتھ تعاون کرنے سے روکتے ہیں، ایسا کرنا بھی دہشت گردی ہی ہے۔

انہوں نے کہا کہ حکومت دن رات محنت کر رہی ہے، ایک دو سال میں کسی مقام پر ملک کو لے کر جائیں گے، پاکستان ہم سب کے لیے بہت عظیم ہے، ہمیں اپنی پوری صلاحیتیں پاکستان کی ترقی کے لیے استعمال کرنی چاہئیں۔

(جاری ہے)

حنیف عباسی نے کہا کہ جن خطرات سے ہم دو چار ہیں، ان سے نمٹنے کے لیے سب کو ایک ہونا پڑے گا، 70ارب ڈالر کا بزنس صرف منرلز سے آرہا ہے، گوادر پورٹ کسی کے باپ دادا کی نہیں، 1958 میں پاکستان نے خریدی ہے، پاک فوج نے دہشت گردوں کو انہی کے گھر میں جاکر مارا ہے۔

وفاقی وزیر ریلوے نے کہا کہ پسماندگی کا جو تاثر دیا جارہا ہے وہ بالکل غلط ہے، جس طرح حکومت کام کر رہی ہے، 2سے 3سال میں ہم منزل پر پہنچ جائیں گے۔انہوں نے کہا کہ جعفر ایکسپریس پر حملے کے بعد بھارت چیخ چیخ کر جو کہہ رہا تھا، ایک سیاسی پارٹی کے لوگ بھی وہی بات کر رہے تھے۔حنیف عباسی نے کہا کہ 2017میں اگر میاں نواز شریف کی حکومت کو ختم نہ کیا جاتا تو آج حالات کچھ مختلف ہوتے۔

انہوں نے کہا کہ پیپلز پارٹی کے ساتھ ہماری گھر والی بات ہے، نہروں سمیت دیگر مسائل بیٹھ کر حل کرلیں گے، اللہ تعالی صدر مملکت کو صحت دے۔ان کا کہنا تھا کہ ریلوے کے ختم ہونے والے ذیلی اداروں کے ملازم واپس آجائیں گے، کنٹریکٹ ملازمین کے بارے میں کچھ نہیں کہہ سکتا، یہ ورکشاپس بہت اہمیت کی حامل ہیں، اگر مکینیکل کام بہتر نہ ہوتو ٹرین آپریشن متاثر ہوتا ہے، ہمارے مزدوروں کے پاس بہت اسکلز ہیں، جو دنیا کے تمام ممالک کا مقابلہ کرسکتے ہیں۔وفاقی وزیر نے کہا کہ ریلوے حکام کو ہدایت کی ہے کہ 5 تاریخ سے پہلے مزدوروں کی تنخواہ ملنی چاہیے۔مسائل حل کرنے کے لیے تمام وسائل بروئے کار لائیں گے۔وفاقی وزیر ریلوے نے بتایا کہ مغل پورہ ریلویز ورکشاپ میں جدید مشینیں لائی جائیں گی۔