محکمہ موسمیات نے فیصل آباد ڈویژن کے تینوں اضلاع سمیت مختلف شہروں میں بارشوں کی پیش گوئی کر دی

فیصل آباد (اُردو پوائنٹ اخبارتازہ ترین - اے پی پی۔ 16 اپریل2025ء) محکمہ موسمیات نے فیصل آباد ڈویژن کے تین اضلاع فیصل آباد، جھنگ، ٹوبہ ٹیک سنگھ سمیت مختلف شہروں میں بارشوں کی پیش گوئی کی ہے۔ محکمہ کے ترجمان کے مطابق 17 اپریل (شام) اور 18 اپریل (شام ورات) سے 20ا پریل (صبح) کے دوران فیصل آباد ڈویژن کے تین اضلاع فیصل آباد، جھنگ، ٹوبہ ٹیک سنگھ سمیت اسلام آباد،راولپنڈی، اٹک، چکوال،تلہ گنگ، میانوالی، سرگودھا، بھکر، خوشاب، جہلم، حافظ آباد، گوجرانوالہ،منڈی بہاؤالدین، گجرات، سیالکوٹ، نارووال، لاہور، قصورمیں آندھی و جھکڑ چلنے کے علاوہ گرج چمک کے ساتھ بارش کا امکان ہے جبکہ اس دوران بعض مقامات پر ژالہ باری بھی ہو سکتی ہے۔

انہوں نے بتایا کہ 18 اور 19 اپریل کے دوران ڈیرہ غازی خان، راجن پور، لیہ، کوٹ ادو، مظفر گڑھ، بہاولپور، ملتان، ساہیوال، خانیوال، پاکپتن شریف، وہاڑی اور اوکاڑہ میں بھی آندھی وجھکڑ چلنے کا امکان ہے۔

(جاری ہے)

انہوں نے بتایا کہ آندھی، جھکڑ، ژالہ باری، گرج چمک اور تیز موسلا دھار بارش کے باعث کمزور انفراسٹر کچر،بجلی کے کھمبے، درخت، گاڑیوں، سولر پینلز و غیرہ کو نقصان کا اندیشہ ہے جبکہ کاشت کار حضرات بھی اپنی فصلوں خاص طور پر گندم کی کٹائی کے معاملات موسمی حالات کے مطابق ترتیب دیں۔

انہوں نے بتایا کہ ملک کے جنوبی علاقوں میں 18 اپریل تک گرمی کی لہر،ہیٹ ویو بر قرار رہنے کی توقع ہے ۔ اسی طرح سندھ، جنوبی پنجاب اور بلوچستان کے چند علاقوں میں 18 اپریل تک گرمی کی لہر (ہیٹ ویو) بر قرار رہنے کا امکان ہے تاہم مغربی ہواؤں کا ایک سلسلہ 16 اپریل (شام) سے ملک کے بالائی علاقوں میں داخل ہونے کا امکان ہے جوکہ 20 اپریل تک موجود رہے گااور اس موسمی نظام کے زیراثر16 اپریل (شام ورات سے 20 اپریل کے دوران: چترال، دیر، سوات، شانگلہ، کوہستان، مانسہرہ، ایبٹ آباد، بلگرام، بونیر، کرم، باجوڑ، مہمند، اور کزئی، پشاور، کوہاٹ، بنوں، وزیرستان، ڈیرہ اسماعیل خان، لکی مروت، ٹانک، مری، گلیات، گلگت بلتستان (دیا میر، استور، نذر، اسکردو، ہنزہ، گلگت، گانچی اور شکر)، کشمیر،وادی نیلم، مظفر آباد، پو نچھ، ہٹیاں، باغ، حویلی، سدھنوتی، کوٹلی، بھمبر، میر پور میں وقفے وقفے سے تیز ہواؤں، آندھی اور گرج چمک کے ساتھ بارش جبکہ بعض مقامات پر موسلا دھار بارش کا امکان ہے نیز اس دوران چند مقامات پر ژالہ باری بھی ہو سکتی ہے۔

انہوں نے بتایا کہ تمام متعلقہ اداروں کو الرٹ رہنے اور کسی ناخوشگوار واقعہ سے بچنے کے لیے تمام ضروری اقدامات کرنے کی ہدایت کی گئی ہے۔