پاکستان کے دشمن ہماری معاشی کامیابیوں سے خائف ہیں، وزیراعظم شہباز شریف

اسلام آباد(اردوپوائنٹ اخبار تازہ ترین۔18اپریل 2025)وزیراعظم شہباز شریف کا کہنا ہے کہ پاکستان کے دشمن ہماری معاشی کامیابیوں سے خائف ہیں، دہشت گردوں کو عبرتناک شکست دیں گے کہ وہ پاکستان کی طرف میلی آنکھ سے دیکھنے کی جرات نہیں کر سکیں گے، دہشت گردی کو جڑ سے اکھاڑنے کیلئے جہاد جاری رہے گا،وزیراعظم شہباز شریف کی زیر صدارت امن و امان کی صورتحال پر اجلاس ہوا جس میںوفاقی وزیر داخلہ محسن نقوی،وزیراعظم کے مشیر برائے بین الصوبائی روابط رانا ثناءاللہ،وزیر مملکت برائے داخلہ طلال چوہدری ،وفاقی وزیر قانون اعظم نذیر تارڑ،وفاقی وزیر احد خان چیمہ اور عطاءاللہ تارڑ ،وزیراعلیٰ خیبرپختونخواہ کے مشیر اطلاعات بیرسٹر سیف، وزیر داخلہ گلگت بلتستان شمس الحق لون، وزیر داخلہ آزاد جموں و کشمیر کرنل ریٹائرڈ وقار نون سمیت چاروں صوبوں ، گلگت بلتستان اور آزاد جموں و کشمیر کے چیف سیکرٹریز اور انسپکٹرز جنرل پولیس، چیف کمشنر اسلام آباد کیپیٹل ٹیریٹری، آئی جی اسلام آباد پولیس اور دیگر متعلقہ سرکاری اداروں کے افسران نے بھی شرکت کی۔

(جاری ہے)

اجلاس میں ملک میں امن و امان کے قیام کے حوالے سے اقدامات پر تفصیلی بریفنگ دی گئی۔دوران اجلاس بریفنگ میں بتایا گیا کہ نیکٹا میں قومی و صوبائی انٹیلی جنس فیوڑن اینڈ تھریٹ اسیسمنٹ مرکز قائم کیا جا چکاہے ۔ پنجاب کے 10 شہروں میں سیف سٹی منصوبہ کام کر رہا ہے۔ کراچی، حیدرآباد، سکھر، لاڑکانہ، میرپور خاص اور نوابشاہ میں سیف سٹی منصوبے لگائے جا رہے ہیں۔

بریفنگ کے دوران مزید بتایاگیا کہ سمگلنگ کی روک تھام کے حوالے سے مختلف شاہراہوں اور پلوں پر ڈیجیٹل انفورسمنٹ سٹیشنز کا قیام عمل میں لایا جا رہا ہے۔ اہم شہروں کے گردونواح میں غیر قانونی تعمیرات ختم کرنے کیلئے کارروائیاں ہو رہی ہیں۔ پشاور میں سیف سٹی منصوبہ منظور ہو چکا ہے، ڈیرہ اسماعیل خان، بنوں، لکی مروت میں سیف سٹی منصوبے لگائے جائیں گے، گوادر سیف سٹی منصوبہ جلد مکمل کر لیا جائے گا، قومی شاہراہ 25 N اور قومی شاہراہ 40 N پر واقع تمام اہم شہروں میں سیف سٹی منصوبہ لگایا جائے گا۔

دوران اجلاس یہ بھی بتایاگیا کہ ملک بھر میں بھکاریوں کیخلاف بھی کریک ڈاو¿ن کیا جا رہا۔ بھکاریوں کو بیرون ملک سفر سے روکنے کیلئے اقدامات کئے جا رہے ہیں۔ اسلام آباد میں فارنزک سائنس ایجنسی قائم کی جا چکی ہے جبکہ پنجاب میں فارنزک سائنس ایجنسی کو مزید بہتر بنایا جا رہا ہے۔اجلاس سے خطاب کرتے ہوئے وزیراعظم شہباز شریف نے کہا کہ ملک کے اہم شہروں میں سیف سٹی منصوبوں کو جلد از جلد مکمل کیا جائے۔

دہشت گردی کے خلاف وفاق اور صوبوں کا ملکر کام کرنا خوش آئند ہے۔دہشت گردی کے خلاف کارروائیوں کیلئے تمام اداروں اور صوبوں کی کوششیں لائق تحسین ہیں۔اس موقع پر وزیراعظم نے ہدایت کی کہ سمگلنگ کے خلاف تمام ادارے اپنی کوششیں مزید تیز کریں۔ انسانی سمگلنگ کے نیٹ ورک کے گرد گھیرا مزید تنگ کیا جائے۔ انسانی سمگلروں کو قانون کے شکنجے لایا جائے۔انہوں نے کہا کہ دہشت گردی کے خاتمے کیلئے وفاقی حکومت صوبوں کی استعداد بڑھانے کیلئے تعاون کرے گی۔ پاکستان کے دشمن ہماری معاشی کامیابیوں سے خائف ہیں۔تمام اختلافات بھلا کر دہشت گردی کے خاتمے کیلئے مل کر کام کرنا ہے۔ سکیورٹی فورسز کے جوان دہشت گردوں سے نبرد آزما اور جانوں کا نذرانہ پیش کر رہے ہیں۔