سینیٹ ضمنی انتخاب؛ ایم کیو ایم پاکستان کا پیپلز پارٹی کی حمایت سے انکار، اپنا امیدوار لانے کا فیصلہ

کراچی ( اُردو پوائنٹ اخبارتازہ ترین۔ 28 اپریل 2025ء ) سینیٹ کے ضمنی انتخاب میں ایم کیو ایم پاکستان نے پیپلز پارٹی کی حمایت سے انکار کرتے ہوئے نکہت مرزا کو ٹکٹ جاری کرنے کا فیصلہ کرلیا۔ تفصیلات کے مطابق ایم کیو ایم پاکستان نے پیپلز پارٹی کے رہنما تاج حیدر کے انتقال کے باعث خالی ہونے والی سینیٹ کی نشست پر انتخاب میں حصہ لینے کا فیصلہ کیا ہے، اس حوالے سے کنوینر ایم کیو ایم پاکستان ڈاکٹر خالد مقبول نے سینیٹ انتخاب کے لیے نگہت مرزا کو پارٹی ٹکٹ بھی جاری کردیا، ذرائع کا کہنا ہے کہ ایم کیو ایم پاکستان کی امیدوار نگہت مرزا آج ہی اپنا پارٹی ٹکٹ آر او کو جمع کرائیں گی۔

بتایا گیا ہے کہ پاکستان پیپلز پارٹی نے گزشتہ روز ایم کیو ایم پاکستان سے سینیٹ انتخاب سے دستبردار ہونے کی درخواست کی تھی جس کے لیے پی پی رہنماؤں کے ایک وفد نے صوبائی وزیر ناصر حسین شاہ کی قیات میں ایم کیو ایم پاکستان کے بہادر آباد دفترکادورہ کیا، وفد میں صوبائی وزیر سعید غنی، جنرل سیکریٹری وقار مہدی اور سہیل انور سیال بھی شامل تھے، پیپلز پارٹی کے وفد کا مقصد سینیٹ انتخابات میں ایم کیو ایم کی حمایت حاصل کرنا اور دونوں جماعتوں کے درمیان اہم سیاسی مشاورت کرنا تھا، ملاقات کے دوران پیپلز پارٹی کے رہنماؤں کا استقبال ایم کیو ایم پاکستان کے اپوزیشن لیڈر سندھ اسمبلی علی خورشیدی نے کیا، جس کے بعد دونوں پارٹیوں کے رہنماؤں کے درمیان تفصیلی بات چیت کی گئی، ایم کیو ایم پاکستان کے رہنماؤں میں ڈاکٹر فاروق ستار، سیدامین الحق اور نسرین جلیل اس ملاقات میں شریک تھے۔

(جاری ہے)

فاروق ستار نے میڈیا سے گفتگو کرتے ہوئے کہا کہ پیپلز پارٹی کا وفد سینیٹ الیکشن کے حوالے سے ہم سے بات کرنے آیا اور اس ملاقات کا مقصد سینیٹ انتخابات میں وقار مہدی کی حمایت حاصل کرنا ہے، ہم دونوں جماعتوں کے درمیان سیاسی ہم آہنگی کے حوالے سے بات کر رہے ہیں، انتخابی ملاقاتوں سے ہٹ کر عوامی فلاح کے کاموں پر بھی توجہ دینی چاہیے اور دونوں جماعتوں کو معاہدوں کی رکاوٹوں پر بات کرنی چاہیے۔

ناصر حسین شاہ نے اس موقع پر کہا کہ کراچی میں مکمل بہتری کے لئے بہت زیادہ فنڈز کی ضرورت ہے اور کینالز کے مسئلے پر ایم کیو ایم نے پیپلز پارٹی کو کھل کر حمایت دی ہے، دیگر مسائل کے حل کے لئے ملاقاتوں کا سلسلہ جاری رہے گا اور نئی نہروں اور بلدیاتی اداروں کے مسائل پر بھی بات چیت کی جائے گی، یہ ملاقات دونوں جماعتوں کے درمیان سیاسی تعلقات کو مزید مستحکم کرنے کی کوشش کے طور پر دیکھی جا رہی ہے۔