پاکستان کے پاس دفاع کیلئے ایک مرد مومن بھی ہے جس کا نام سید عاصم منیر ہے‘رانا ثنا اللہ

لاہور(اُردو پوائنٹ اخبارتازہ ترین - این این آئی۔ 04 مئی2025ء)وزیراعظم کے مشیر برائے سیاسی امور رانا ثنا اللہ نے کہا ہے کہ پاکستان کے پاس دفاع کے لئے ایک مرد مومن بھی ہے جس کا نام سید عاصم منیر ہے، مودی پاکستان پر ایسا وار کرنا چاہتا ہے کہ ہماری آزادی خطرے میں پڑ جائے، ابدالی میزائل کا کامیاب تجربہ ہوا ہے، مودی سن لو ابدالی میزائل ایٹمی میزائل لے کر جا سکتا ہے۔

میڈیا رپورٹ کے مطابق رانا ثنا اللہ خان نے کہا کہ کشمیر میں اتنا ظلم گزشتہ 75 سال میں نہیں ہوا جتنا ان گزشتہ آٹھ دس روز میں ہوا ہے، جتنامرضی ظلم کرلیں کشمیرکی تحریک آزادی مزید تیزہوگی اور کشمیر آزاد ہو گا۔انہوں نے کہا کہ پہلگام حملے میں میں 26 لوگ جاں بحق ہوئے ہم اس کی ہم مذمت کرتے ہیں ، پاکستان ہر قسم کی دہشتگردی کی مذمت کرتا ہے، بھارت نے اس واقعہ کو استعمال کرتے ہوئے ہمارا 1960 کا سندھ طاس معاہدہ معطل کر دیا ہے ، جو لوگ ہسپتالوں میں علاج معالجہ کے لئے گئے تھے انہیں بھی ملک سے نکال دیا ،جو لوگ یہاں علاج معالجہ یا عبادت کے لئے آئے انہیں نہیں نکالا گیا ہے ، پہلگام حملے میں جو 26 لوگ جاں بحق ہوئے وہ بے قصور تھے ، وزیراعظم پاکستان نے کہا ہے ہم ہر طرح تیار ہیں جیسے مرضی تحقیقات کروائیں۔

(جاری ہے)

انہوںنے کہا کہ بدقسمتی سے ملک میں گالی گلوچ بریگیڈ بن گئی ہے، جب وہ شخص حکومت میں تھا، تب بھی گالم گلوچ کی جاتی تھی اپوزیشن میں ہے تو بھی، گالم گلوچ کلچرکی وجہ سے ہمیں کچھ قوانین اور ترامیم کرنی پڑیں، گالم گلوچ برگیڈ کی وجہ سے ہمیں یہ قانون بنانا پڑا، صحافیوں کا اس وجہ سے گلہ ہے کہ ہم نے جو قانون بنایا یہ ان کے خلاف استعمال ہو گا۔

میں بطور ایڈوائز روزیراعظم صحافیوںکو کہتا ہوں میرے ساتھ بیٹھیں تاکہ ایسا قانون بنائیں جس سے حق سچ کے صحافی محفوظ رہیں، ایسا قانون بنائیں جس سے بدبخت گالم گلوچ والوں کے خلاف کاروائی ہو سکے ، گالم گلوچ بریگیڈ ایسی ایسی تصاویر بناتے ہیں جس سے لوگوں کے گھروں میں لڑائی جھگڑے شروع ہو چکے ہیں۔رانا ثنا اللہ کا کہناتھا کہ پاکستان کے پاس دفاع کے لئے ایک مرد مومن بھی ہے جس کا نام سید عاصم منیر ہے، مودی پاکستان میں کامیابی کے سفر کو روکنا چاہتا ہے، مودی نے آئی ایم ایف سے پاکستان کا معاہدہ ختم کرنے کا مطالبہ کیا ہے، جو مودی چاہتا ہے یہی چیز گالم گلوچ کلچر والے چاہتے ہیں، یہ سب لوگ اپنے مقاصد اور سیاست کی خاطر پاکستان کو گرانا چاہتے ہیں لیکن ایسا نہیں ہو گا۔

انہوں نے کہا کہ مودی پاکستان پر ایسا وار کرنا چاہتا ہے کہ ہماری آزادی خطرے میں پڑ جائے، ابدالی میزائل کا کامیاب تجربہ ہوا ہے، ابدالی میزائل 450 میل تک زمین سے زمین تک مار کر سکتا ہے، مودی سن لو ابدالی میزائل ایٹمی میزائل لے کر جا سکتا ہے، مودی سن لو اگر تم ہمارے ماضی کے تجربے بھول گئے ہو تو یہ دیکھ لو آج ہم پاکستان کی خاطر ہر حد تک جائیں گے۔