پنجاب، پختونخوا اور بلوچستان میں گرمی کے ستائے عوام کیلئے خوشخبری

دوروز کا انتظار،بارش برسانے والا سسٹم ایک بار پھر آئے گا، کئی مقامات پر بارش اور تیز ہواؤں کی پیش گوئی

منگل 6 مئی 2025 14:36

لاہور، پشاور، کوئٹہ(اُردو پوائنٹ اخبارتازہ ترین - این این آئی۔ 06 مئی2025ء) پنجاب، خیبر پختونخوا اور بلوچستان میں گرمی کے ستائے عوام کے لیے محکمہ موسمیات نے خوش خبری سنادی۔محکمہ موسمیات کے مطابق لاہور سمیت پنجاب بھر میں بارش برسانے والا سسٹم 2 روز بعد دوبارہ داخل ہوگا جب کہ اس وقت پنجاب کے بیشتر علاقوں میں خشک موسم کا سلسلہ جاری ہے اور آئندہ ایک سے 2 روز بارش کے امکانات نہیں ہیں۔

صوبائی دارالحکومت سمیت کئی شہروں میں گرد آلود ہوائیں چلنے کا امکان ہے جس سے موسم میں خنکی کا احساس رہے گا جبکہ ہواؤں کے چلنے سے درجہ حرارت میں کمی واقع ہو گی تاہم موسم خشک رہے گا۔لاہور میں کم سے کم درجہ حرارت 24 جب کہ زیادہ سے زیادہ درجہ حرارت 34 ڈگری سینٹی گریڈ تک جا سکتا ہے۔

(جاری ہے)

موسمیاتی ماہرین کے مطابق 2 روز بعد مغربی سمت سے بارشوں کا نیا سسٹم پاکستان میں داخل ہوگا جو موسم کو خوشگوار بنا دے گا۔

بادلوں کے اس سسٹم کے باعث پنجاب بھر میں بارش کا امکان ظاہر کیا جا رہا ہے۔اُدھر خیبر پختونخوا کے بیشتر اضلاع میں موسم جزوی طور پر ابر آلود رہنے کی توقع ہے۔ چترال، دیر، سوات، بونیر، مالاکنڈ، مانسہرہ، بٹگرام سمیت بعض علاقوں میں گرج چمک کے ساتھ بارش ہو سکتی ہے۔پشاور میں درجہ حرارت 36 ڈگری سینٹی گریڈ ریکارڈ کیا گیا ہے جب کہ ڈیرہ اسماعیل خان میں 32 اور بنوں میں 35 ڈگری رہا۔

اسی طرح چترال 31، دیر بالا 29، کالام 24 اور مالم جبہ میں 20 ڈگری سینٹی گریڈ درجہ حرارت ریکارڈ کیا گیا۔علاوہ ازیں بلوچستان کے بیشتر علاقوں میں موسم گرم اور خشک رہنے کی پیش گوئی کی گئی ہے۔ خضدار، لسبیلہ اور گردونواح میں تیز ہواؤں اور گرج چمک کے ساتھ بارش کا امکان ظاہر کیا گیا ہے۔کوئٹہ میں زیادہ سے زیادہ درجہ حرارت 33 جب کہ قلات میں 27 ڈگری ریکارڈ کیا گیا۔ اس کے علاوہ زیارت کا درجہ حرارت 21، ڑوب 36، سبی 41 اور تربت میں 43 ڈگری سینٹی گریڈ ریکارڈ کیا گیا۔ نوکنڈی 42، چمن 36، گوادر 38 اور جیوانی میں 39 ڈگری سینٹی گریڈ تک درجہ حرارت ریکارڈ ہوا۔