Live Updates

پاکستان پر بھارتی میزائل حملے مودی حکومت کے ہندو توا ایجنڈے کا تسلسل ہے، کل جماعتی حریت کانفرنس کی مذمت

بدھ 7 مئی 2025 17:40

سری نگر (اُردو پوائنٹ اخبارتازہ ترین - اے پی پی۔ 07 مئی2025ء) بھارت کے غیر قانونی زیر تسلط جموں وکشمیر میں کل جماعتی حریت کانفرنس نے پاکستان کی سرزمین پر بزدلانہ بھارتی حملوں کی شدید مذمت کرتے ہوئے انہیں مودی حکومت کے ہندو توا ایجنڈے کا تسلسل قرار دیا ہے۔کشمیر میڈیا سروس کے مطابق کل حریت کانفرنس کے ترجمان ایڈووکیٹ عبدالرشید منہاس نے سرینگر میں بیان میں کہا کہ پاکستان کے متعدد شہروں اور آزاد کشمیر پر رات کی تاریکی میں کئے جانے والے میزائل حملوں نے نریندر مودی کی زیر قیادت بھارت کا دہشت گرد چہرہ بے نقاب کر دیا ہے۔

انہوں نے شہید پاکستانی شہریوں کو خراج عقیدت پیش کیا اور زخمیوں کی جلد صحت یابی کی دعا کی ۔ترجمان نے کہا کہ بھارت جموں وکشمیر پر فوجی طاقت کے بل پر قابض ہے اور اس نے ریاستی دہشت گردی کے ذریعے کشمیریوں کا جینا دو بھر کر دیا ہے ۔

(جاری ہے)

انہوں نے کہا کہ بھارت کشمیریوں کی منصفانہ تحریک آزادی اور پاکستان کو بدنام کرنے کے لئے فالس فلیگ آپریشن کرتا ہے۔

ترجمان نے کہا کہ پاکستان نے رات کی تاریکی میں کی جانے والی بھارتی دہشت گردی کا موثر اور مضبوط جواب دیا جس سے کشمیریوں کے حوصلے بلند ہوئے ہیں۔ انہوں نے کہا کہ بھارت کی جموں وکشمیر میں حیثیت ایک غاصب اور ظالم وجابر کے سوا کچھ نہیں جبکہ کشمیری پاک فوج کو اپنا محافظ تصور کرتے ہیں۔کل جماعتی حریت کانفرنس کے ترجمان نے واضح کیا کہ جموں وکشمیر عالمی سطح پر تسلیم شدہ متنازعہ خط ہے ، تنازعہ کشمیر کو حل کیے بغیر خطے میں پائیدار امن و استحکام ہرگز ممکن نہیں ہے۔

انہوں نے کہا کہ بھارت کی ریاستی دہشت گردی کشمیریوں کے جذبہ آزادی کو ختم کرنے میں ہرگز کامیاب نہیں ہو گی۔ترجمان کل جماعی حریت کانفرنس نے اقوام متحدہ پر زور دیا کہ وہ نہتے کشمیریوں پر گزشتہ 77برس سے جاری بھارتی ریاستی دہشت گردی کا نوٹس لے او ر تنازعہ کشمیر کو اپنی پاس کردہ قراردادوں کے مطابق حل کرانے کے لئے کردار ادا کرے۔