Live Updates

بھارت جارحانہ کاروائیوں سے باز نہ آیا تو پھر پاکستان کی طرف سے بھی کوئی گارنٹی نہیں

سندھ طاس معاہدہ پر عملدرآمد یقینی بنایا جائے، بھارت کی آبی جارحیت کا مستقل سدباب کیا جائے، قوم کشمیر پر کسی قسم کا سمجھوتہ قبول نہیں کرے گی، امیر جماعت اسلامی حافظ نعیم الرحمن کی سکھ وفد سے ملاقات میں گفتگو

ثنااللہ ناگرہ پیر 12 مئی 2025 19:22

بھارت جارحانہ کاروائیوں سے باز نہ آیا تو پھر پاکستان کی طرف سے بھی کوئی ..

اسلام آباد ( اردوپوائنٹ اخبار تازہ ترین۔ آئی پی اے ۔ 12 مئی 2025ء ) امیر جماعت اسلامی حافظ نعیم الرحمن نے کہا ہے کہ بھارت جارحانہ کاروائیوں سے باز نہ آیا تو پاکستان کی طرف سے کوئی گارنٹی نہیں۔ قوم کشمیر پر کسی قسم کا سمجھوتہ قبول نہیں کرے گی، مسئلہ کشمیر پراقوام متحدہ کی قراردادوں کے مطابق پیش رفت ہونی چاہیے۔ سندھ طاس معاہدہ پر عملدرآمد یقینی بنایا جائے۔

اسلام آباد میں پرتاب سنگھ کی قیادت میں سکھ برادری کے وفد نے امیر جماعت سے ملاقات کی۔ وفد سے بات چیت کرتے ہوئے امیر جماعت اسلامی نے کہا کہ پوری قوم ملک کی حفاظت اور سالمیت کے لیے متحد اور یکسو ہے۔ قوم نے وطن کی حفاظت کے لیے تمام سیاسی اختلافات بھلا دئیے، یہ ایک نیک شگون ہے۔ حکومت اب ذمہ داری کا مظاہرہ کرے اور اس اتحاد کو برقرار رکھنے کے لیے فوری اور مناسب اقدامات اٹھائے۔

(جاری ہے)

امیر جماعت نے کہا کہ بھارتی جارحیت کے خلاف پاکستان کو بڑی کامیابی ملی ہے۔ مسئلہ کشمیر کے حل کے لیے کوئی کردار ادا کرنا چاہتا ہے تو بظاہر اس میں مضائقہ نہیں مگر حکمران کسی دھوکے کا شکار ہوئے بغیر مسئلہ کشمیر کے حل کے لیے اقوام متحدہ کی قرار دادوں پر عمل درآمد کے اقدام کے لیے بات چیت کریں۔ کسی عالمی رہنما کے محض بیان پر حکمرانوں کا پھولے نہ سمانا ناقابل فہم ہے۔

مسئلہ کشمیر پر کسی کمزوری کا مظاہرہ کیے بغیر اس کے لیے ہر محاذ پر کوششیں تیز کی جائیں۔ کشمیر پاکستان کی شہ رگ ہے، کشمیر کے عوام کو حق خودارادیت ملنا چاہیے۔

حافظ نعیم الرحمن نے کہا کہ بھارت اپنے ذرائع ابلاغ کے زہریلے اور منفی پروپیگنڈے کی وجہ سے دنیا میں بے نقاب و ناقابل اعتبار ہوگیا ہے۔ حکومت ہندوتوا نظریے کے پیروکاروں کا اصل چہرہ پوری دنیا کو دکھائے۔

اقوام عالم کو بتایا جائے کہ مودی حکومت کے جنونی نظریات کی وجہ سے پورے جنوبی ایشیا کے امن کو خطرہ لاحق ہے، بھارت میں مسلمانوں سمیت دیگر اقلیتیں محفوظ نہیں، انھیں نشانہ بنایا جاتا ہے۔ انھوں نے واضح کیا کہ قوم عزت اور وقار کے ساتھ کھڑی ہو تو معیشت خود ٹھیک ہو جاتی ہے، جیتی ہوئی جنگ کو میز پر نہیں ہارنا چاہیے، بھارت کی آبی جارحیت کا مستقل سدباب کیا جائے، سندھ طاس معاہدے پر اس کی روح کے مطابق عمل ہونا چاہیے۔

سکھ وفدنے پاکستان کی کامیابی پر خوشی کا اظہار کیا اور جماعت اسلامی کے موقف کو سراہا۔ اس بات کا اعادہ کیا گیا کہ پاکستان کے عوام مذہبی،فروعی، لسانی اختلافات کو بالائے طاق رکھتے ہوئے ملک کی حفاظت کے لیے اکٹھی ہے۔اس موقع پر بھارت پر پاک افواج کی برتری اور کامیابی پر مسرت کا اظہار کیا گیا۔