پاکستانی سائبر ٹیم نے آپریشن بنیان مرصوص میں بھارتی دفاعی، مواصلاتی نظام کو شدید نقصان پہنچایا، تفصیلات سامنے آگئیں

اسلام آباد(اردوپوائنٹ اخبار تازہ ترین۔15 مئی 2025)پاکستانی سائبر ٹیم نے آپریشن بنیان مرصوص میں بھارتی دفاعی، مواصلاتی نظام کو شدید نقصان پہنچایا، تفصیلات سامنے آگئیں،بھارتی سائبر جارحیت کے خلاف افواج پاکستان نے ” آپریشن بنیان مرصوص“ کے تحت دشمن کو زبردست اور منہ توڑ جواب دیا،آج نیوز کے مطابق انتہائی باخبر ذرائع کا کہنا ہے کہ پاکستان کی سائبر ٹیم نے کئی بھارتی دفاعی، مواصلاتی، صنعتی اور توانائی کے اہم ڈھانچوں کو نشانہ بناتے ہوئے انہیں شدید نقصان پہنچایا۔

ذرائع کے مطابق آپریشن میں پاکستان نے بھارتی نیشنل، ایسٹرن، ناردرن اور ویسٹرن لوڈ ڈسپیچ سینٹرز کو ہیک کرکے ملک بھر میں بجلی کی عارضی معطلی کی صورت میں 80 فیصد صارفین کو اندھیرے میں دھکیل دیا۔

(جاری ہے)

ذرائع کا کہنا ہے کہ آپریشن کے دوران پاکستانی سائبر ماہرین نے بھارتی پاور انفراسٹرکچر، پیٹرولیم سیکٹر، ایئر فورس کمیونیکیشن، ریلوے نیٹ ورک، سرکاری ای میل سسٹمز اور او ٹی پی انفراسٹرکچر تک رسائی حاصل کرکے نہ صرف انہیں ہیک کیا بلکہ کئی نظاموں کو مکمل طور پر ناکارہ بھی بنایا۔

ذرائع کا یہ بھی کہنا ہے کہ انتباہی انداز میں کئے گئے حملے میں ہندوستان پٹرولیم کارپوریشن لمیٹڈ اور اندرا پرستھا گیس لمیٹڈ کے مکمل ڈیٹا بیس کو ہیک اور ناکارہ بنایا گیا۔ اس کے علاوہ 4400 سے زائد سرکاری و عوامی کمیونیکیشن راوٹرز کو تباہ کر دیا گیا۔صرف اترپردیش میں 3600 سے زائد، جموں و کشمیر میں 600 سے زائد اور مہاراشٹرا میں 4600 سے زائد پاور فیڈرز کی سپلائی ہیک کرکے منقطع کی گئی۔

پنجاب لوڈ ڈسپیچ سینٹر کے 2 مین AI سرورز اور ریاست کرناٹک کے 235 سے زائد ونڈ و سولر گرڈز کو بھی نشانہ بنایا گیا۔ذرائع کا کہنا ہے کہ بھارت کے تین بڑے ہوائی اڈوں: دہلی، ممبئی اور کولکتہ کے سرورز بھی ہیک کر دئیے گئے جبکہ بھارتی فضائیہ کی ناردرن، سدرن اور ویسٹرن ایئر کمانڈز کے مواصلاتی نظام کو بھی تباہ کن خلل کا سامنا کرنا پڑا۔بھارتی حکومتی و عسکری اداروں بشمول وزارت دفاع، فضائیہ، بارڈر سیکیورٹی فورس، ہندوستانی ریلوے، ایروناٹکس لمیٹڈ، اور منفرد شناختی اتھارٹی پر DDoS حملے کئے گئے جس سے ان کے ای میل اور اندرونی کمیونیکیشن سسٹمز بری طرح مفلوج ہو گئے۔

بھارتی ریلوے کے بھی درجنوں سرورز کو ہیک کیا گیا جس کے باعث کئی علاقوں میں ٹرین سروسز معطل ہوئیں۔ آپریشن کے دوران بھارت بھر کے 3500 سے زائد سی سی ٹی وی کیمرے بھی ہیک کئے گئے جن میں سرکاری عمارتیں، ہسپتال، سڑکیں اور دیگر عوامی زونز شامل ہیں۔اسی طرح مقبوضہ جموں و کشمیر میں 250 سے زائد آئی ایس پیز کے راوٹرز کو بھی ہیک کرکے ناکارہ بنا دیا گیا جبکہ مجموعی طور پر 90 سے زائد سرکاری اور کارپوریٹ ویب سائٹس کا ڈیٹا ہیک کر لیا گیا۔

اسی طرح مقبوضہ جموں و کشمیر میں 250 سے زائد آئی ایس پیز کے راوٹرز کو بھی ہیک کرکے ناکارہ بنا دیا گیا، جبکہ مجموعی طور پر 90 سے زائد سرکاری اور کارپوریٹ ویب سائٹس کا ڈیٹا ہیک کر لیا گیا۔ذرائع کے مطابق ”معرکہ بنیان مرصوص“ ایک مربوط اور پیشہ ورانہ سائبر آپریشن تھا جو افواج پاکستان کے جدید ترین سائبر وارفئیر ڈویژن کی جانب سے بھارت کی مسلسل اشتعال انگیزیوں کے جواب میں انجام دیا گیا۔ یہ کارروائی دشمن کیلئے نہ صرف ایک سخت پیغام ہے بلکہ سائبر میدان میں پاکستان کی واضح برتری کا عملی ثبوت بھی ہے۔