آپریشن بنیان مرصوص: افواج پاکستان کی سائبر ٹیم نے بھارت کو ناکوں چنے چبوائے

اسلام آباد (اُردو پوائنٹ اخبارتازہ ترین - این این آئی۔ 15 مئی2025ء)آپریشن بنیان مرصوص میں افواج پاکستان کی سائبر ٹیم نے بھارت کو ناکوں چنے چبوادیے۔سیکیورٹی ذرائع کے مطابق افواج پاکستان کی سائبر ٹیم نے بھارت کو مختلف ڈومینز مین نقصان پہنچایا، بھارتی پاور انفرااسٹرکچر اور پیٹرولیم سیکٹر کو نقصان پہنچایا گیا۔پاکستانی سائبر ٹیم نے بھارتی قومی مواصلات کو بھی شدید نقصان پہنچایا، بھارتی سرکاری ای میل اور اوٹی پی انفرااسٹرکچر کو بھی بند کیا گیا، پاکستانی سائبر ٹیم نے بھارتی نگرانی کے نظام میں خلل پیدا کیا، کمیونیکیشن ہارڈویئر کی تباہی اور بھارتی ویب سائٹس کو ہیک کیا گیا۔

پاکستانی سائبر ٹیم نے بھارتی ہوائی اڈوں کے سرورز ٹیک ڈاؤن کیے، بھارتی فضائیہ کے مواصلاتی نظام اور ریلوے کینظام میں خلل پیدا کیا۔

(جاری ہے)

پاکستانی سائبر ٹیم نے بھارت کے نیشنل، ایسٹرن، ناردرن اور ویسٹرن لوڈ ڈسپیچ سینٹرز تک رسائی حاصل کرکے سسٹم کو بھی ہیک کیا جبکہ بھارت کے تقریباً 80 فیصد صارفین کو عارضی طور پر بجلی کی فراہمی سے بھی محروم کیا، ریاست اتر پردیش میں 3 ہزار 600 سے زائد پاور فیڈرز، مقبوضہ جموں و کشمیر میں 600 سے زائد جبکہ ریاست مہارشٹر میں 4500 سے زائد فیڈرز کی سپلائی کو ہیک اور منقطع کیا گیا۔

پاکستانی سائبر ٹیم نے پنجاب لوڈ ڈسپیچ سینٹر کے 2 مرکزری اے آئی سرورز ، ریاست کرناٹک میں 235 ونڈ اور سولر گرڈز کو ہیک اورناکارہ بنایا، ہندوستان پٹرولیم کارپوریشن لمیٹڈ، اندرا پرستھا گیس لمیٹڈ کے ڈیٹا بیس کو ہیک اور ناکارہ کردیا گیا جبکہ ساڑھے 4 ہزار کے قریب سرکاری اور پبلک سیکٹر کمیونیکیشن راؤٹرز کو بھی ناکارہ بنا دیا گیا۔افواج پاکستان کی سائبر ٹیم نے بھارتی حکومت، فوج، فضائیہ، اسٹاک ایکسچینجز اور پبلک سیکٹر تنظیموں سمیت بھارت کے تمام اہم سرورز پر حملہ کیا، جس کے نتیجے میں ای میل، او ٹی پی ورک فلو اور اندرونی مواصلات میں قومی خلل پیدا کیا گیا جبکہ سرکاری عمارتوں، شاہراہوں اور دیگر عوامی زونز کے 3500 سی سی ٹی وی کیمرے ہیک کیے گئے۔

مقبوضہ جموں و کشمیر میں 250 اہم آئی ایس پی کمیونیکیشن راؤٹرز کو ہیک کرکے ناکارہ بنادیا گیا جبکہ 90 سے زیادہ سرکاری اور کارپوریٹ سیکٹر کی ویب سائٹس کے ڈیٹا کو ہیک کرلیا گیا، جس میں بھارتی فضائیہ، ہندوستان ایروناٹکس لمیٹڈ، بارڈر سیکیورٹی فورس، ہندوستان کی منفرد شناختی اتھارٹی اور ہندوستانی ریلوے شامل ہیں۔افواج پاکستان کی سائبر ٹیم نے بھارتی ہوائی اڈوں کے سرورز کو بھی ہیک کیا، جنمیں ممبئی، دہلی اور کولکتہ شامل ہیں، آپریشن بنیان مرصوص کے دوران بھارتی فضائیہ کے مواصلاتی نظام میں خلل پیدا کیا گیا جس میں بھارتی فضائیہ کی نادرن ، سدرن اور ویسٹرن ایئر کمانڈ شامل ہیں۔