فیک نیوز پر قابو پانا ضروری، پیکا ایکٹ کی آڑ میں حکمران اپنے مذموم مقاصد آگے نہ بڑھائیں‘حافظ نعیم الرحمن

آزادی اظہارکو یقینی بنایا جائے، پیکا ایکٹ کیخلاف جدوجہد میں جماعت اسلامی صحافتی تنظیموں کا بھرپور ساتھ دے گی امیر جماعت اسلامی حافظ نعیم الرحمن کا صدر سی پی این ای کاظم خان کی قیادت میں ملنے والے وفد سے ملاقات میں اظہار خیال

جمعرات 15 مئی 2025 21:35

لاہور (اُردو پوائنٹ اخبارتازہ ترین - این این آئی۔ 15 مئی2025ء)امیر جماعت اسلامی حافظ نعیم الرحمن نے کہا ہے کہ فیک نیوز پر قابو پانا ضروری ہے مگر پیکا ایکٹ کی آڑ میں حکمران اپنے مذموم مقاصد آگے نہ بڑھائیں،آزادی اظہارکو یقینی بنایا جائے، پیکا ایکٹ کیخلاف جدوجہد میں جماعت اسلامی صحافتی تنظیموں کا بھرپور ساتھ دے گی۔ ان خیالات کا اظہار انھوں نے کاظم خان کی قیادت میں ملنے والے سی پی این ای کے وفد سے ملاقات میں کیا۔

وفد میں غلام نبی چانڈیو سیکریٹری جنرل،ایاز خان سینئر نائب صدر،تنویر شوکت ڈپٹی سیکریٹری،ارشاد عارف چیئرمین میڈیا فری کمیٹی، اعجازالحق سابق سیکریٹری جنرل اور وقاص طارق جوائنٹ سیکریٹری پنجاب شامل تھے۔ملاقات میں جماعت اسلامی کے سیکریٹری جنرل امیرالعظیم اور سیکریٹری اطلاعات شکیل احمد ترابی بھی موجود تھے۔

(جاری ہے)

حافظ نعیم الرحمن نے کہا ہے کہ اس وقت جب بھارت کو شکست ہوئی تو قوم میں جذبہ اور اتفاق رائے موجود ہے تو پیکا ایکٹ جیسے اقدامات سے قوم میں اضطراب اور نااتفاقی بڑھے گی، امیر جماعت اسلامی نے حکومت سے پیکا ایکٹ کو فوری واپس لیکر بڑے پیمانے پر مشاورت کے بعد اتفاق رائے سے قانون سازی کر نے کا مطالبہ کردیا۔

حافظ نعیم الرحمن نے کہا کہ پیکا ایکٹ کے حوالے سے صحافیوں کی جو بھی سرگرمی ہوئی جماعت اسلامی اس میں شرکت کرے گی۔ انہوں نے کہا کہ پاک بھارت جنگ کے دوران پاکستان کے میڈیا نے پیشہ وارانہ مہارت کا مظاہرہ کیا اور ذمہ دار میڈیا کے طور پر سامنے آیا، اس کے برعکس بھارتی میڈیا کی کوریج دنیا بھر میں جگ ہنسائی کا مرکز بنی۔ کاظم خان اور سی پی این ای کے وفد کے شرکاء کا کہنا تھا کہ جنگ سے قبل پاکستانی میڈیا کے خلاف مہم چلائی جاتی تھی کہ غیر ذمہ دار اور قومی سلامتی کے خلاف خبریں دی جاتی ہیں لیکن جنگ کے بعد حکومت اور فوج کے ترجمان نے خود اعتراف کیا کہ پاکستان کے میڈیا نے کمال ذمہ داری کا مظاہرہ کیا ہے۔

ڈی جی آئی ایس پی آر بھی ملکی میڈیا کا شکریہ ادا کر چکے ہیں۔حافظ نعیم الرحمن نے میڈیا ہائوس کے کارکنان کی تنخواہوں کی ادائیگی بروقت اور یقینی بنانے کے حوالے سے بھی بات کی جس پر سی پی این ای کے صدر کاظم خان نے اتفاق کرتے ہوئے کہا سی پی این ای اسے اپنے ایجنڈے میں شامل کرے گی۔انہوں نے کہا کہ اس پر مکمل عمل درآمد وفاقی اور صوبائی حکومتوں کی جانب سے بقایا جات ملنے پر ہوگا۔