Live Updates

مودی سرکار کو سچ کڑوا لگنے لگا،نائب صدر پیپلزپارٹی سینیٹر شیری رحمان کا بھی بھارت میں ایکس اکاؤنٹ بند

ہفتہ 17 مئی 2025 22:42

اسلام آباد (اُردو پوائنٹ اخبارتازہ ترین - این این آئی۔ 17 مئی2025ء)مودی سرکار کو سچ کڑوا لگنے لگا،نائب صدر پیپلزپارٹی سینیٹر شیری رحمان کا بھی بھارت میں ایکس اکاؤنٹ بند کر دیا گیا۔ اپنے بیان میںشیری رحمان نے کہاکہ بھارت میں اظہارِ رائے پر قدغنیں نئی آہنی دیوار کی شکل اختیار کر چکی ہیں ۔ انہوںنے کہاکہ اگر مقصد معقول آوازوں کو دبانا ہے تو یہ ہندوتوا ریپبلک کی تنگ نظری اور بوکھلاہٹ کو ظاہر کرتا ہے، بھارت میں ایکس پر پابندی کا مقصد سچ بولنے والوں کو خاموش کرنا ہے۔

نائب صدر پیپلز پارٹی نے کہاکہ بھارتی حکومت کیاقدام کا مقصد پہلگام واقعے کے حقائق چھپانا اور مقبوضہ کشمیر پر اٹھائی کی آوازوں کو دبانا ہے ۔ شیری رحمن نے کہاکہ بھارت کے اس اقدام کی عالمی سطح پر مذمت ہونی چاہیے،بھارت کچھ بھی کر لے ،حقائق سے نہیں بھاگ سکتا۔

(جاری ہے)

نائب صدر پیپلزپارٹی نے کہاکہ بھارت نے پہلگام حملے کے بعد بلاجواز جارحیت کی، پاکستان نے ذمہ دارانہ انداز میں دفاع کیا ، بھارت نے پوری جنگ کی بنیاد جھوٹ پر رکھی جس کو آگے لے جانے کی کوشش کی جا رہی ہے۔

انہوںنے کہاکہ اگر بھارت نے پھر کسی مہم جوئی کی کوشش کی تو پاکستان مؤثر جواب دے گا، تاریخ اس کی گواہ ہے ۔ انہوںنے کہاکہ پاکستان نے ہمیشہ امن کی بات کی لیکن اگر دوبارہ قومی خودمختاری پر حملہ ہوا تو بھرپور جواب دیا جائے گا ۔